1 Petras 5

₁Dje koi samaadj ke barkwa hai, ham oelogse maangiela ekahie dardja waala ghat bienaai karke koetjh poetjhe. Ham aapan aakhie se dekhlie hai kaise Kriest hamlog khaatien doekh oethaais hai. Aur djab oe lautke aaiga aur aapan maahaanta dekhaaiga, tab ham toelogke saath oman bhie bhaag lebe. ₂Ham toelogke bienaai kariela Parmeswar ke samaadj ke log ke barhia se sewa kare ke, djaise ekgo bhera tjaraawe waala aapan djhoend bhera ke dekh-bhaal kare hai. Ie kaam karaai se na kar, bakie khoesiaalie se. Aisane Parmeswar ke barhia lage hai. Bhie aapan kaam na kar koetjh ienaam paawe khaatien, bakie aapan diel se. ₃Aur ie kaam bhie na kariehe barkwa khele khaatien, bakie sadhaaran se samaadj logan ke dekhaihe kie oelogke aapan djiewan kaise bietaawe ke tjaahie. ₄Tab djab sab se maahaan dekh-bhaal kare Waala lautke aaiga, tab oe toelogke ieddjat kariega. Okar soekh toelog khaatien rahiega djaise ekgo maala djaun kabhie na djhoeraaiga.

₅Naudjawaan logan, ham toelogse bienaai kariela barkwan ke baat soene ke. Toelog sab koi ke tjaahie apane ke doesarkwan ke aage tjhota maane ke. Ghamandie logan Parmeswar ke doesman hai, bakie oe bhalaai kare hai dje apane ke tjhota maane hai. ₆Ohie khaatien apane ke Parmeswar ke aage nietja kar. Oe maahaan Waala hai. Tab oe aapan tem par toelogke oetja dardja deiga. ₇Aapan sab sotj-phiekier Parmeswar ke haath me saup de, oe toelogke sewa kare hai.

₈Aapan djiewan samhaar aur djagte rahoe. Djaise ekgo ser aapan bhoekh ke patwaawe khaatien goerdjke koetjh khaaik khodje hai, oisane saitaan khodjke maange hai tose paap karwaawe aur tor bieswaas naas kar dewe. ₉Okar djhoeth baat na soen aur aapan bieswaas pakarle rahoe. Jaad kar kie doenia bhar me ekwan iesaai bhaai logan ke bhie aisan doekh oethaawe ke pare hai.

₁₀Parmeswar toelogke sab rakam bhalaai kare hai. Oe toelogke tjoenies hai Kriest ke sanghe sada ke lieje biesaal soekh me rahe ke. Ek tjhota tem khaatien toelogke doekh oethaawe ke parie, tab oe toelogke poera kariega aur toelogke bieswaas barhaaiga, djeme toelog ekdam se okare par bharosa kariehe aur hardam okar baat soeniehe. ₁₁Oke sab saktie hai sada ke lieje! Aisahie to hai.

₁₂Ham djaaniela kie Selfaanas ekgo bharosaadaar iesaai bhaai hai toelog khaatien. Oe hamme sahaaita karies hai ie tjhota tjietthie liekhe ke. Ham maangiela toelogke diel me hiemmat pahoetjaawe aur toelogke jaad karwaawe kie Parmeswar hamlogke sattje ke sab rakam se bhalaai kare hai djaise ham ie tjietthie me liekhlie baatie. Oman pakarle rahiehe.

₁₃Hia Baabielon sahar ke iesaai bhaai-bahien logan toelogke jaad kare hai. Parmeswar toelogke saath ohoelogke aapan djaatie ghat tjoenies hai. Aur hamaar iesaai ke beta Markas toelogke bhie jaad kare hai.

₁₄Apane log me prem se tjoemma de.

Parmeswar sab koi ke sjaantie dewe djaun Kriest me saamiel hai.