1 Tiemotias 4

₁Bakie Pawietr Aatma kholke bolies hai kie aane waala samai me koi koi aapan bieswaas Kriest me tjhor dei. Oesab bahakaawal djaai oe manai ke dwaara djaun ke bhoet tjalaaiga. ₂Aisan djhoetthe siekhaawe waalan doesara ke dhokha dewe hai aur aapan man dabaawe hai. ₃Iesab bole hai kie na thiek hai biaah kare ke aur koetjh khaaik bhie mienaahie hai. Bakie Parmeswar to ie sab tjiedj banaais hai, aur djaun log okar sattjaai djaane hai aur okare me bieswaas kare hai, oelog oke dhanbaad karke ie sab tjiedj kaam me laai sake hai. ₄Djetana tjiedj Parmeswar banaais hai, sab attjha hai. Aur djab koi eke kaam me laawe hai, tab oke tjaahie Parmeswar ke jaad karke dhanbaad dewe ke. Ehie khaatien koi ke na tjaahie okar banaawal tjiedj nahakaare ke. ₅Oe bolies hai kie ie sab attjha hai, aur djab hamlog praatna me ose koetjh manglie, tab hamlog bhie lei sakiela.

₆Beta, djab toe ie sab baat doesar iesaai bhaai-bahien ke siekhaihe, tab toe ek attjha Kriest Jiesoe ke naukar rahiehe. Tab dekhal djaai kie toe aapan bieswaas ke biese me thiek se siekhle hai. ₇Toe boerhia logan ke and-band baat na soen, aur kausies kar aapan djiewan Parmeswar khaatien bietaawe ke. ₈Siekhe khele ke thora faida hai koi ke dehie khaatien, bakie siekhe Parmeswar ke rasta par tjale ke bahoet faida hai, ab ke djiewan khaatien aur bhie mare ke baad. ₉Ie baat satj hai aur maane laaik ke hai. ₁₀Hamlog ohie khaatien bahoet kausies kariela aur bahoet moesiebat sahiela. Hamlog to bieswaas kariela kie djienda Parmeswar sab iensaan ke batjaawe Waala hai, bieses karke okar bieswaasie log ke. ₁₁Toke tjaahie ie sab baat hoewa ke iesaai logan ke hoekoem deike thiek se siekhaawe ke.

₁₂Tjaahe toe djawaan baate, tabbo koi ke na tjaahie toke tjhota maane ke. Toke tjaahie aapan baat, tjaal-tjalan, prem, bieswaas, aur safa djiewan se ekwan iesaai logan ke dekhaawe ke kaise rahe ke tjaahie. ₁₃Toke tjaahie oelogke khaatien Parmeswar ke baat parhe ke aur oesabke ie baat se soedhaare ke aur ekar matlab samdjhaai dewe ke djab talak ham na aabe. ₁₄Djab samaadj ke barkwan aapan haath tor oeppar rakhies raha, tab Parmeswar aapan ek sanesia dwaara toke kartab deis hai okar khaat kaam kare ke. Ie gjaan na tjhor de, bakie hardam kaam me laaw. ₁₅Sab koi ke tjaahie dekhe ke kaise toe auro attjha barkwa howe hai. Ohie se toke tjaahie aapan kaam me bhieral rahe ke aur epar aapan dhiaan ekdam se lagaawe ke. ₁₆Aapan tjaal-tjalan ke khiaal kar aur thiek se dekh kaun tjiedj aur kaise toe ekwan ke siekhaihe. Djab toe aise karat rahiehe tab apane ke aur ekwan ke oelta bieswaas se batjaihe.