Mateus 24

₁Baka di Yesus kba taki ala den sani disi, A kmoto ini a mamakerki. Di a gwe, den man fu En bigin sori En tapu den bigi oso di ben de ini a dyari fu a mamakerki. ₂Ne Yesus taigi den taki: “Un e si ala den sani disi? Fu tru Mi e taigi un taki: Den alamala o broko te na gron. No wan ston o tan na tapu wan trawan.”

₃Baka dati Yesus ben sidon tapu a Oleifbergi, dan den man fu En kon den wawan na En. Den aksi En taki: “Masra, taigi unu: Oten a sani dati o psa? San o de a marki di o sori tak' Yu e kon baka, èn tak' a kba fu a ten disi doro?”

₄Yesus piki den taki: “Un mus luku bun tak' no wan sma no kori unu! ₅Bika furu sma o du leki den na Mi. Den o taki tak' den na a Mesias, èn den o kori furu sma. ₆Un o yere tak' kondre e feti èn tak' feti de fu broko, ma un no mus skreki, bika den sani disi mus fu psa. Ma dati a no a kba ete. ₇Bika a wan folku o feti nanga a tra folku, èn a wan kondre o feti nanga a trawan. Na difrenti presi angriten o de èn a gron o seki hebi tu. ₈Ma ala den sani disi na soso a bigin fu a tranga ten di o kon.

₉Den o grabu unu, dan den o gi un abra na sma di o pina unu, èn di o kiri unu. Fu Mi ede no wan sma fu no wan folku o man si un na ai. ₁₀Ini a ten dati furu sma o lasi bribi ini Mi, a wan sma o tyari a trawan gi lanti èn den no o man si makandra na ai. ₁₁Furu sma o du leki den na profeiti èn den o kori furu sma. ₁₂Libisma o kon takru sote, tak' furu sma no sa lobi trawan moro. ₁₃Ma Gado sa ferlusu a sma di sa hori doro te na a kba. ₁₄A Bun Nyunsu disi tak' Gado bigin tiri libisma, sa panya na heri grontapu fu ala folku kan kisi a okasi fu yere en. Dan fosi grontapu o kba.”

₁₅“A profeiti Daniel ben taki tak' den o poti wan groskin-sani ini a Santa Presi di o pori a heri mamakerki. Suma e leisi a sani disi mus suku fu ferstan en. Te un si a sani disi, ₁₆dan den sma di de ini Yudea mus lon go na den bergi. ₁₇A sma di de tapu a daki fu en oso, no mus saka go na gron fu go teki sani ini en oso. ₁₈Èn a sma di de ini en gron, no mus drai go baka fu go teki en krosi. ₁₉Den uma di de nanga bere, nanga den di abi pikin na bobi a pisten dati, o de fu sari. ₂₀Un mus begi tak' un no o abi fu lowe ini a kowruten noso tapu wan sabadei. ₂₁Bika wan bigi pinaten o kon. Noiti ete sowan ten ben de sensi grontapu meki te leki now, èn noiti moro sowan ten o kon baka. ₂₂Efu Gado no ben syatu a ten disi, no wan sma bo tan na libi. Ma Gado o syatu a ten fu den sma ede di A ben teki gi Ensrefi.

₂₃Efu wan sma sa taigi unu ini a ten dati taki: ‘Luku, a Mesias de dyaso,’ noso: ‘Luku, A de drape,’ no bribi en. ₂₄Bika sma o kon di o du leki den na a Mesias, trawan o du leki den na profeiti. Den o du wondru èn den o meki un si bigi marki. Nanga dati den o suku fu kori den sma di Gado ben teki gi Ensrefi. ₂₅Luku bun! Mi e warskow unu na fesi. ₂₆Efu sma sa taigi unu taki: ‘Luku, a Mesias de ini a dreisabana,’ no go. Efu den sa taigi un taki: ‘Luku, a Mesias de ini wan kamra,’ no bribi den. ₂₇Bika leki fa faya e koti na loktu na a wan sei èn a de fu si te na a tra sei, na so a sa de te a Manpikin fu Libisma o drai kon baka na grontapu.” ₂₈Dan Yesus taki: “Pe a dedeskin didon, na drape yu e si tingifowru.”

₂₉“Let' na baka a pinaten fu den dei dati, a son o kon dungru èn a munkenki no o gi faya. Den stari o fadon kmoto na loktu, èn ala den makti di de na loktu o seki. ₃₀Dan a marki di e sori tak' a Manpikin fu Libisma o kon, sa de fu si na heimel. Ala folku na grontapu sa bari krei te den si a Manpikin fu Libisma e kon tapu den wolku nanga krakti nanga bigi glori. ₃₁Dan nanga a tranga babari fu wan tutu, A o seni den engel fu En go fu tyari den sma kon na wan di A ben teki gi Ensrefi. Den o tyari den kmoto fu den fo sei pe a winti e kmoto, fu a wan sei fu heimel go te na a tra sei.

₃₂Un teki wan figabon leki eksempre. Te a bigin sproiti èn a bigin gi nyun wiwiri, dan un sabi tak' a dreiten de fu kon. ₃₃Na so un mus sabi tu tak' te un e si ala den sani disi, dan a ten de krosbei, a de let' na mofodoro. ₃₄Fu tru Mi e taigi un taki: Ala den sani disi o psa te den sma fu a ten disi de na libi ete. ₃₅Wan dei heimel nanga grontapu no o de moro, ma den sani san Mi taki o tan fu têgo.”

₃₆“No wan sma sabi a dei nanga a yuru te a o psa. Den engel di de na heimel no sabi, èn a Manpikin srefi no sabi. Na a P'pa wawan sabi. ₃₇Soleki fa a ben de ini a ten fu Noa, na so a sa de te a Manpikin fu Libisma o drai kon baka. ₃₈Bika ini a ten fosi Gado sungu grontapu, den sma ben e nyan, den ben e dringi, èn trow ben e trow, te leki a dei di Noa go ini a bigi sipi. ₃₉Den no ben sabi ete san e psa te leki a bigi frudu kon wasi den alamala gwe. Na so a o de te a Manpikin fu Libisma o drai kon baka. ₄₀A dei dati tu man sa de ini den gron e wroko. A wan den o tyari gwe, èn a trawan o tan na baka. ₄₁Tu frow o mara na den miri. A wan den o tyari gwe, èn a trawan o tan na baka.

₄₂Fu dat'ede un mus tan na ai, bika un no sabi sortu dei un Masra o kon. ₄₃Ma un mus sabi disi: Efu a man di abi a oso, ben sabi sortu yuru na neti a fufuruman bo kon, a bo tan na ai èn a no bo meki a fufuruman broko kon ini en oso. ₄₄Dat' meki un mus de klari, bika a Manpikin fu Libisma o drai kon baka na wan yuru di un no e ferwakti En.”

₄₅“Suma na a koni knekti tapu san en masra kan bow? A de a wan di a poti fu luku den tra knekti fu en, fu gi den nyanyan tapu a yuru di fiti. ₄₆A o bun gi a knekti dati efu te en masra kon baka, a si tak' a e du en wroko soleki fa a fiti. ₄₇Fu tru Mi e taigi un taki: A masra sa poti en fu luku ala den sani san a abi. ₄₈Ma efu a knekti na wan takru-ati sma, èn a prakseri taki: ‘A masra fu mi no o kon ete,’ ₄₉dan a bigin fon den tra knekti, èn a go nyan, dringi nanga sopiman, ₅₀dan a masra fu en o kon tapu wan dei di a no ferwakti, èn tapu wan yuru di a no sabi. ₅₁A o meki den kapu en pis'pisi èn poti en pe den hoigriman de. Drape den sa krei èn kaw den tifi.”