1MASRA taigi Moses taki: 2“Yu mus taigi a heri folku fu Israel taki: ‘Un mus santa bika Mi, MASRA, un Gado, santa.
3Lespeki un mama nanga un papa èn memre fu un hori a sabatdei leki fa Mi komanderi unu. Mi na MASRA, un Gado.
4Un no sa bemui nanga kruktu gado èn un no sa meki gowtu noso solfru popki fu den gado. Mi na MASRA, un Gado.
5Te un o tyari wan freide-ofrandi gi MASRA, un mus tyari en sowan fasi, taki A abi prisiri nanga en. 6Un sa nyan en tapu a dei di un tyari en leki ofrandi, nanga a tra dei fu en. Ma san tan kon miti a di fu dri dei, un sa bron nanga faya. 7Efu un nyan en tapu a di fu dri dei, Gado no sa abi prisiri nanga a ofrandi dati. A sa de wan groskin sani. 8A sma di nyan en fiti fu kisi strafu fu di a afrontu wan santa sani fu MASRA. Sowan sma un mus yagi fu têgo kmoto na mindri fu den Israelitisma.
9Te un o koti nyanyan ini un gron, un no sa koti kon te na a lantyi fu a gron. Un no sa drai go baka tu fu piki san didon na gron. 10Te un o piki droifi ini un droifidyari, un no sa drai go baka tu fu piki den droifi di fadon na gron. Un sa libi den dati gi den pôtiwan nanga gi den doroseisma. Mi na MASRA, un Gado.
11Un no sa fufuru. Un no sa lei èn un no sa bedrigi wan trawan. 12Te un o meki wan sweri un no mus kari Mi nen, efu un sabi taki a sani no tru. Tapu sowan fasi un e afrontu a nen fu un Gado. Mi na MASRA.
13Un no sa puru wan sani tapu wan bedrigi fasi noso nanga tranga na wan trawan anu. Un no sa hori a moni fu wan wrokoman di yu yuru, te a tamara fu en. 14Un no sa fluku wan dofuman èn un no sa poti wan sani na pasi gi wan breniman fu a fadon. Un sa lespeki Mi. Mi na Gado.
15Te un e koti krutu un mus taki den sani leki fa den de. Un no sa gi wan sma leti fu di a de wan pôtisma. Un no sa teki a sei tu fu a guduwan fu a kisi leti. Un sa taki den sani leki fa den de. 16Sma fu un eigi folku no mus sabi unu leki sma di e taki sani sondro fu prakseri bun. Yu no sa meki taki wan trawan kan lasi en libi fu di yu e takitaki sani. Mi na MASRA.
17No hori wan trawan na ati. Efu yu mus warskow wan trawan fu wan sani, yu mus kari en dan yu warskow en. Tapu so wan fasi yu no e sondu fu en ede. 18Yu no sa pai ogri nanga ogri èn yu no sa hori wan sma fu yu eigi folku na ati tu. Yu sa lobi wan trawan leki fa yu lobi yusrefi. Mi na MASRA.
