10Mi breiti fu tru ini Masra tak' now, baka someni ten, un ben kan sori mi taki un e prakseri mi. Mi sabi taki langaten un ben wani du dati, ma un no ben abi a okasi. 11Mi no e taki tak' mi de na nowtu. Bika mi leri fu libi nanga san mi abi. 12Mi sabi san wani taki fu abi pikinso, èn mi sabi san wani taki fu abi bogobogo. Ala den sani dati mi sabi. Mi sabi san a wani taki te mi berefuru, èn mi sabi san na angri. Mi sabi san wani taki fu abi sani bogobogo, èn san wani taki fu no abi nofo. 13Mi kan du ala sani ini Kristus di e gi mi krakti.
14Ma un du bun tu fu yepi mi na ini mi nowtu. 15Bribisma na Filipi, un srefi sabi fa sani ben waka di mi bigin fu panya a bun nyunsu. Baka di mi kmopo na Masedonia, no wan tra gemeente gi mi wan sani, boiti unu. 16Di mi ben de na Tesalonika srefi, un ben seni wan sani kon gi mi moro leki wan leisi. 17Mi no e taki disi fu di mi wani fu un seni moni gi mi, ma fu di mi wani taki a bun san un e kisi fu san un du, e gro moro nanga moro. 18Now mi abi ala sani san mi abi fanowdu. Iya, moro leki dati srefi. Mi no e mankeri noti, fu di Epafroditus gi mi san un ben seni kon. A de leki wan switi smeri gi Gado, wan ofrandi di Gado e feni bun èn di e gi En prisiri. 19Mi Gado di gudu psa marki, o gi un ala sani san un abi fanowdu fu di un de wan nanga Kristus Yesus. 20Meki Gado wi P'pa kisi ala glori fu têgo èn ala ten! Amen.
21Taki ala den sma fu Gado odi gi mi ini Kristus Yesus. Den brada di de nanga mi, e seni odi gi unu. 22Ala den sma fu Gado e seni odi gi unu, ma funamku den wan di e wroko ini a oso fu a grankownu.
23Meki a bun-ati fu Masra Yesus Kristus de nanga un alamala.
