Onnodige struikelblokken

₁₃So, meki wi no krutu makandra moro. Ma kon meki un teki a besroiti fu no de leki wan ston na pasi gi un brada. ₁₄Mi sabi krinkrin taki na ini Masra Yesus noti no takru fu ensrefi. Ma efu wan sma e bribi taki wan sani no bun, dan a no bun gi a sma dati. ₁₅Efu yu e du yu brada wan hati sani nanga san yu e nyan, dan yu no e sori lobi moro. Yu no mus meki a sani san yu e nyan meki yu brada go lasi, bika Kristus dede gi en. ₁₆Èn no gi sma okasi fu taki ogri fu a sani san yu e feni bun. ₁₇Bika a tiri san Gado e tiri unu, no abi noti fu du nanga nyanyan noso dringi. Ma a abi fu du nanga san bun ini Gado ai, nanga freide èn nanga prisiri san a Santa Yeye e gi wi. ₁₈Gado lobi te sma e dini Kristus tapu sowan fasi, èn sma e taki bun fu den tu. ₁₉So, meki wi poti wisrefi fu du sani di e tyari freide èn sani di kan yepi wi fu yepi makandra fu kon moro tranga ini bribi. ₂₀No pori a wroko san Gado du fu nyanyan ede. Ala sani bun fu nyan, ma a no bun te a sani san yu e nyan e meki taki yu de wan ston na pasi gi trawan. ₂₁Efu yu brada abi problema nanga a meti san yu e nyan, a win san yu e dringi, noso wan tra sani san yu e du, dan moro betre yu no du en. ₂₂San yu e bribi fu a sani disi, dati na wan sani fu yu nanga Gado. A sma di no e krutu ensrefi fu den sani san a e feni bun, na wan blesi sma. ₂₃Ma Gado e krutu a sma di e nyan nanga tu ati, bika a no nyan nanga bribi. Ala sani san yu e du sondro bribi, na sondu.