11Ma yu leki wan man fu Gado, no mus go ini den sani disi. Ma yu mus poti yusrefi fu du san bun ini Gado ai, fu libi leki fa Gado wani, èn fu bribi ini Gado. Moro fara yu mus lobi tra sma, yu mus tan hori doro, èn yu mus abi safrifasi. 12Strei a bun strei fu a bribi, grabu a libi fu têgo. Gado kari yu fu gi yu a libi dati di yu ben taki na fesi furu sma san yu e bribi. 13Na fesi Gado di e gi ala sani libi, èn na fesi Kristus Yesus di no ben frede fu taki leki fa a sani de di A ben tnapu na fesi Pontius Pilatus, mi e komanderi yu taki: 14Du ala sani soleki fa mi taigi yu, te leki a dei te wi Masra Yesus Kristus drai kon baka. Noti no mus mankeri. 15Gado sa meki Yesus drai kon baka te a yoisti ten doro. Na En na a wan enkri bun Tiriman: a Kownu fu ala kownu nanga a Masra fu ala masra. 16Na En wawan no kan dede. A e libi na ini wan faya pe no wan sma kan go. No wan sma no si En èn no wan sma kan si En. Na En mus kisi bigi nen èn na En mus abi makti fu têgo! Amen.
Wan wortu gi gudusma
17Yu mus taigi den sma di gudu dya na grontapu taki den no mus abi heimemre. Warskow den taki den no mus poti den fertrow na ini gudu di no o tan, ma den mus poti den fertrow ini Gado. Na En e gi wi ala sani bogobogo fu wi kan prisiri. 18Taigi den taki den mus du bun. Den mus de guduman na ini bun wroko. Den no mus gridi fu gi sma, èn den mus prati san den abi nanga trawan. 19Efu den du dati, dan den o abi a dyaranti taki den e poti wan bun fundamenti gi a ten di de fu kon. Dan so den o man grabu a trutru libi.
Wan kriboi wortu gi Timoteus
20Timoteus, sorgu taki yu tan hori a sani san Gado gi yu. No bemui nanga lawlaw tak'taki san no abi noti fu du nanga Gado, èn no go hori yusrefi nanga leri di no e akruderi nanga a trutru leri. Den sma e kari en “sabi,” ma a no trutru sabi. 21Fu di son sma taki tak' den abi a sabi disi, den kmopo na a pasi fu a bribi.
