2Di den sma no ben abi watra fu dringi, den kon tnapu lontu Moses nanga Aaron. 3Dan a folku bigin meki trobi nanga Moses. Den taigi en taki: “Betre wi ben dede tu di den trawan ben dede na MASRA fesi. 4Fu sanede yu tyari a folku fu MASRA kon ini a dreisabana disi? Fu meki wi nanga den meti fu wi dede? 5Fu sanede yu meki wi hari kmoto na ini Egipte fu tyari wi kon ini a birti dyaso pe sma no man libi? Graan no e gro dyaso, figabon no e de dyaso, droifibon nanga granaki-apra no e gro dyaso. Watra srefi no dyaso fu wi dringi.” 6Ne Moses nanga Aaron kmoto na mindri den sma, dan den go na mofodoro fu a tenti pe yu kan miti nanga Gado. Drape den fringi densrefi nanga fesi na gron. Dan a glori fu MASRA ben de fu si gi den. 7Ne MASRA taigi Moses taki: 8“Teki a wakatiki dan yu e meki ala sma kon makandra. Yu nanga yu brada Aaron tu. Leti na den fesi yu mus taki nanga a bergiston, dan a sa gi watra. Yu sa meki watra kmoto ini a bergiston fu ala den sma nanga den meti fu den dringi.” 9Ne Moses teki a wakatiki di ben e tan na MASRA fesi, leki fa A ben taigi en fu du. 10Moses nanga Aaron meki ala den sma kon makandra fesi a bergiston, dan a taigi den taki: “Un arki, unu di no wan arki. Wi sa meki watra kmoto gi unu ini a bergiston disi.” 11Ne Moses opo en anu, dan a naki a bergiston tu leisi nanga en wakatiki. Dan furu watra kmoto ini a bergi taki ala sma nanga den meti fu den ben man dringi. 12Ma MASRA taigi Moses nanga Aaron taki: “Fu di un no poti un fertrow na Mi tapu, èn fu di un no meki den Israelitisma si taki Mi na wan santa Gado, un no sa tyari a folku go ini a kondre di Mi gi den.” 13Disi na a watra fu Meriba, pe den Israelitisma ben krutu nanga MASRA, èn pe A meki den si En santa fasi.
