1Kownu Benhadad fu Aram, kari a heri legre fu en kon na wan. Makandra nanga dritenti-na-tu tra kownu, di ben de nanga ala den asi nanga den fetiwagi, den hari go na Samaria dan den lontu en fu alasei. 2Dan Benhadad seni boskopuman go na a foto na kownu Akab fu Israel, 3fu taigi en taki: “Kownu Benhadad wani ala yu solfru, yu gowtu, den moro moi uma nanga den moro steifi manpikin fu yu.” 4A kownu fu Israel seni piki en taki: “Na leki fa yu wani, masra, mi kownu. Yu kan teki mi nanga ala san mi abi.” 5Ma den boskopuman drai kon baka dan den taki: “Na disi Benhadad taki: Mi seni taigi yu taki yu ben mus gi mi a solfru, a gowtu, den uma nanga den manpikin fu yu. 6Ma tamara, den yuru disi, mi o seni den knekti fu mi, fu kon luku ini a kownu-oso fu yu nanga den oso fu den wrokoman fu yu. Ala san abi warti gi yu, den o teki tyari gwe.”
7Dan a kownu fu Israel seni kari ala den edeman fu a folku kon na wan, dan a taigi den taki: “Un srefi e si now tak' a man dati wani poti wi na ini bigi problema. Mi seni taigi en kba taki mi agri fu gi en den uma nanga den boi fu mi, mi solfru nanga mi gowtu.” 8Den edeman fu a folku piki kownu taki: “No arki san a e taki èn no du san a e taki.” 9Dan kownu taigi den boskopuman fu Benhadad taki: “Un taigi kownu, mi masra, tak' mi o du ala sani san a aksi mi a fosi leisi. Ma san a e aksi now mi no man du.” Den boskopuman tyari a boskopu dati gi Benhadad. 10Ne Benhadad seni piki Akab taki: “Den gado kan gi mi wan hebi strafu efu mi no libi Samaria na baka leki wan pikin ipi doti, di no o sari srefi fu furu wan anu fu ala den srudati nanga san mi kon.” 11Ma a kownu fu Israel seni piki en taki: “Wan srudati no e prisiri bifo a wini a feti.” 12Benhadad ben e sidon e dringi nanga den tra kownu ondro wan daki di ben meki fu wiwiri, di a kisi a boskopu fu yere. Wantron a taigi den fesiman fu a legre fu den meki densrefi klari fu go teki a foto abra.
