2 Pétrus 2

₁Kayadéné ndèk mbiyèn ing antarané umaté Gusti Allah ana sing ngaku-aku nabi, mengkono uga ing tengahmu ya bakal ana guru-guru palsu, sing pada nlusupké piwulang-piwulang sing nasarké sing nuntun marang karusakan, malah bakal pada nyélaki Sing wis nebus wong-wong mau lan awit sangka kuwi bakal njalari karusakané déwé. ₂Bakal okèh wong sing niru pertingkahé wong-wong kuwi sing dikwasani hawa-nepsuné, lan awit sangka pokal-gawéné kuwi dalané Kabeneran bakal dadi tyatyatan. ₃Lan awit sangka srakahé, guru-guru palsu kuwi bakal pada ngupaya golèk untungé sangka kowé kabèh karo dongèng-dongèngé omong kosong. Nanging paukuman kanggo tumindaké kuwi wis ditetepaké lan karusakané bakal ora ketunda.

₄Jalaran Gusti Allah ora ngéman marang para mulékat sing pada nggawé dosa, mulané dityemplungké ing neraka, pada diranté, ing kono ing sak njeruhné pepeteng nganti tekan dinané pengadilan; ₅Gusti Allah uga ora ngéman jagaté jaman mbiyèn; Panjenengané mung nylametké Noah sing ngabaraké kabeneran kuwi, karo wong pitu liyané, nalika nekaké banjir bandang kanggo jagaté para wong mblarah; ₆Gusti ngukum kuta Sodom lan Gomora lan ngentèkké karo geni, kanggo pepéling marang wong ing bakalé uripé pada mblarah, ₇nanging Panjenengané nylametké Lot, sing bener, sing tansah sangsara karo tingkah lakuné wong-wong sing pada ora perduli marang angger-angger lan mung tansah nuruti hawa-nepsuné waé, ₈- jalaran wong bener iki manggon ing tengahé wong-wong mau lan ing sedina-dina krungu lan weruh pratingkah-pratingkah sing ala kuwi, terus atiné sing bener kuwi kaya kesiksa - ₉dadi ketara, yèn Gusti weruh tyarané nylametaké wong bener sangka panggoda lan nyimpen para wong duraka kuwi kesiksa ing dina pengadilan, ₁₀luwih menèh wong sing pada ngumbar hawa-nepsuné, sing ndadèkké awaké reget lan ora ngajèni pangwasané Gusti.

Wong-wong kuwi pada kemendel lan gemunggung, nganti tanpa rikuh-rikuh ora ngajèni marang para sing urip sing luhur, ₁₁nanging para mulékat déwé, senajan luwih peng-pengan lan luwih kwasa tenimbang wong-wong kuwi, ora nggunakké tembung ngolok-olok yèn nggugat wong-wong mau ing ngarepé Gusti. ₁₂Nanging wong-wong kuwi pada waé karo kéwan sing tanpa pikiran, sing uripé dadi kéwan sing mung dityekel lan dipatèni. Wong-wong kuwi pada ora ngajèni marang sing ora dimangertèni, nanging awit sangka penggawéané sing duraka, bakal pada nemoni karusakané déwé kaya kéwan alasan, ₁₃lan bakal ngalami nasip ala kanggo upahé durakané. Nguja kesenengan ing wantyi awan dianggep sakwijiné sing nyenengké. Pada dadi rereget lan blorèng, sing mendem ing sak njeruhné hawa nepsuné, yèn pada mangan lan ngombé bebarengan karo kowé kabèh. ₁₄Mripaté kebak nepsu bédang, ora jelèh-jelèh enggoné nggawé dosa. Wong-wong kuwi pada mbujuki wong-wong sing ringkih atiné. Watekké wis kulina srakah. Pantyèn wong sing pada kena bebendu! ₁₅Awit wis pada ninggal dalan sing bener, mulané pada kesasar, terus ngetutké mlakuné Biléam anaké Béor sing seneng nampa upah kanggo penggawé-penggawé ala. ₁₆Nanging Biléam diwelèhké karo banget awit sangka tumindaké sing ala kuwi, jalaran kimar tumpakané sing bisu, bisa ngomong nganggo basané manungsa, lan ngendek tumindaké nabi sing ora bener kuwi.

₁₇Guru-guru palsu kuwi kaya sumber sing asat, kaya mendung sing kebuwang karo lésus; wong-wong kuwi wis pada dityepaki panggonan ing pepeteng sing medèni banget. ₁₈Jalaran wong-wong mau pada ngutyapké tetembungan sing muluk-muluk nanging kosong, lan nggunakké nepsu bédang kanggo mbujuki wong-wong sing mentas waé utyul sangka para wong sing kesasar uripé. ₁₉Pada njanjèni kamerdikan marang wong liyané, nanging awaké déwé pada dadi baturé karusakan. Jalaran sapa sing ditelukké karo wong, kuwi ya dadi abdiné wong kuwi. ₂₀Awit yèn wong-wong mau sangka enggoné wis kenal marang Gusti lan Juruslamet kita Yésus Kristus, wis pada ngontyati regeté ndonya, nanging terus nyemplung menèh ing kono, pungkasané kahanané luwih ala tenimbang sak durungé. ₂₁Jalaran sangka kuwi, kanggo wong-wong mau luwih betyik yèn pada ora tau mangertèni dalané kabeneran, tenimbang mangertèni, nanging terus nyingkur sangka pepakon sutyi sing wis dipréntahké marang wong-wong mau. ₂₂Kahanané wong-wong kuwi tyotyok karo uniné bebasan sing bener iki, ngéné,