Genesis 1

₁ Na a bigin Gado meki heimel nanga grontapu. ₂ Grontapu ben bruya èn leigi. Wan dipi dungru ben de abra a watra di ben de na grontapu. A Yeye fu Gado ben e beweigi abra a watra.

₃ Dan Gado taki: “Faya mus de.” Èn faya ben de fu si. ₄ Gado si taki a faya ben bun, dan A prati a faya nanga a dungru. ₅ Dan Gado kari a faya dei èn a dungru A kari neti. Neti tapu èn dei ben opo. Na so a fosi dei psa.

₆ Dan Gado taki: “Wan sani mus de na mindri fu a watra di e prati a watra.” ₇ So Gado meki wan sani fu prati a watra di de na loktu, nanga a watra di de na gron. Na so a psa. ₈ Dan Gado kari a sani di A meki fu prati a watra, heimel. Neti tapu èn dei ben opo. Na so a di fu tu dei psa.

₉ Dan Gado taki: “A watra na grontapu mus kon makandra na wan presi, fu drei presi kan de fu si.” Èn na so a psa. ₁₀ Gado kari a dreipresi gron. A watra di ben kon na makandra A kari se. Èn Gado si taki a ben bun.

₁₁ Dan Gado taki: “Sani mus gro na grontapu: wiwiri mus de di e gi siri èn froktubon mus de di e gi froktu nanga siri.” Èn na so a psa. ₁₂ Sani bigin gro na grontapu: wiwiri ben de di ben e gi siri, nanga bon di ben e gi froktu nanga siri. Èn Gado si taki a ben bun. ₁₃ Neti tapu èn dei ben opo. Na so a di fu dri dei psa.

₁₄ Dan Gado taki: “Faya mus de na heimel fu prati dei nanga neti. Den mus de leki wan marki gi fasti ten fu a yari, gi spesrutu dei nanga spesrutu yari. ₁₅ Den mus de na heimel fu gi faya na grontapu.” Èn na so a psa. ₁₆ Dan so Gado meki den tu bigi faya. A moro bigiwan ben o de basi deiten, a pikinwan ben o de basi te neti. Èn Gado meki den stari tu. ₁₇ Gado gi den wan presi na loktu na heimel, fu gi faya na grontapu, ₁₈ fu den ben de basi fu dei nanga neti èn fu prati leti nanga dungru. Èn Gado si taki a ben bun. ₁₉ Neti tapu èn dei ben opo. Na so a di fu fo dei psa.

₂₀ Dan Gado taki: “Den watra mus lai nanga libisani di e beweigi na ini, èn fowru mus frei psa hei na loktu abra grontapu.” ₂₁ So Gado meki den bun bigi meti di de ini a se nanga wan heri ipi libisani di e beweigi ini a watra. A meki alamala na den eigi fasi. A meki ala sortu fowru tu na den eigi fasi. Èn Gado si taki a ben bun. ₂₂ Dan Gado blesi den èn a taki: “Un meki pikin, un meki furu pikin: a watra fu den se mus lai nanga libi èn grontapu mus kon furu nanga fowru.” ₂₃ Neti tapu èn dei ben opo. Na so a di fu feifi dei psa.

₂₄ Dan Gado taki: “Libisani mus de na grontapu: meti di yu kan kweki, meti di e kroipi, nanga krasi meti. Den mus de na den eigi fasi.” Èn na so a psa. ₂₅ So Gado meki den krasi meti. A meki den meti di yu kan kweki nanga ala den sani di e kroipi na gron. A meki den alamala na den eigi fasi. Èn Gado si taki a ben bun.

₂₆ Dan Gado taki: “Meki wi meki libisma di de leki wi èn di gersi wi. Den mus de basi abra den fisi fu den se, abra den fowru di e frei na loktu, abra den meti di yu e kweki, abra heri grontapu nanga ala meti di e kroipi na gron.” ₂₇ So Gado meki libisma di ben o de leki En. Leki fa En de, na so den ben o de. A meki man nanga uma. ₂₈ Dan Gado blesi den èn a taigi den taki: “Un meki pikin, un meki furu pikin fu den furu grontapu. Un mus de basi fu grontapu. Un mus de basi abra den fisi fu den se, abra den fowru di e frei na loktu, nanga abra ala meti na grontapu di e kroipi na gron.” ₂₉ Gado taigi den moro fara taki: “Luku, Mi e gi unu ala wiwiri na grontapu di e gi siri, nanga ala bon di e gi froktu nanga siri, fu un nyan fu den. ₃₀ Ma ala tra wiwiri Mi e gi na den meti fu grontapu, den fowru di e frei na loktu, na ala den meti di e kroipi na gron nanga ala tra libi sani.” Èn na so a psa. ₃₁ Dan Gado luku ala sani di A meki èn den ben bun fu tru. Neti tapu èn dei ben opo. Na so a di fu siksi dei psa.