Amos 2

₁Mengkéné tembungé GUSTI:

“Awit sangka dosané Moab telung perkara,

malah patang perkara,

mulané Aku ora bakal murungké putusan-Ku,

awit wis ngobongi balungé ratu Edom dadi kapur,

₂Aku bakal kirim geni menyang ing Moab,

sing mangan bèntèng Kériot nganti entèk;

lan Moab bakal entèk ing sak tengahé rusuh,

ya kuwi surak-surak waktuné trompèt diunèkké.

₃Aku bakal ngentèkké sing nyekel pangwasa ing sak tengahé,

lan sak kabèhé penggedéné Tak patèni kabèh bareng karo wong kuwi,” mengkono tembungé GUSTI.

₄Tembungé GUSTI mengkéné:

“Awit sangka dosané Yéhuda telung perkara,

malah patang perkara,

mulané Aku ora bakal murungké putusan-Ku,

awit wis pada nampik angger-anggeré GUSTI,

lan ora netepi pernatané,

nanging pada disasarké karo retya-retyané sing goroh,

sing ditutké karo para leluhuré,

₅Aku bakal ngirim geni menyang Yéhuda,

sing mangan bèntèng Yérusalèm nganti entèk.”

₆Tembungé GUSTI mengkéné:

“Awit sangka dosané Israèl telung perkara,

malah patang perkara,

mulané Aku ora bakal murungké putusan-Ku,

wis pada ngedol wong bener, awit duwit,

lan wong mlarat diijoli sepatu sak pasang.

₇Pada ngidak-idak sirahé wong mlarat ing lebu,

lan nasarké dalané wong sangsara;

anak lanang lan bapak pada nuroni wong wadon nom sing pada,

terus ngregeti marang kesutyiané asma-Ku;

₈sandangané wong mlarat sing digadèkké

pada digawé lèmèk turon sandingé saben mesbèh,

lan pada ngombé angguré wong sing pada didenda

ing omahé gusti allahé.

₉Sak temené Aku sing wis matèni bangsa Amori kanggo dèkné,

bangsa Amori sing dedekké kaya wit sanobar

lan sing kuwat kaya wit élon,

pada Tak entèkké wohé ing nduwur

lan oyoté ing ngisor.

₁₀Nanging Aku sing nuntun mlakumu metu sangka negara Egipte,

lan mlakumu Tak tuntun ing ara-ara samun suwéné

patang puluh taun,

supaya kowé bisa ngenggoni negarané wong Amori.

₁₁Aku ngangkat tunggalé anak-anakmu dadi nabi,

lan sak bagéané wong nom-nomanmu dadi nasir;

apa ora nyata mengkono, hé Israèl?”

Mengkono tembungé GUSTI.

₁₂“Nanging para wong nasir pada kok kongkon ngombé anggur,

lan para nabi pada kok tylatoni:

Aja nubuat!

₁₃Lah bumi sing kok entyiki bakal Tak horekké,

kaya kemréyoké kréta sing kabotan momotan.

₁₄Wong sing banter playuné ya meksa ora bisa mlayu menèh,

lan wong rosa ora bisa nggunakké kekuwatané,

lan wong suradadu ora bisa ngéndani.

₁₅Wong sing tukang panah ora bisa tahan,

wong sing tyepet tandangé ora bisa utyul,

lan wong numpak jaran ya ora bisa ngluwari awaké déwé.

₁₆Senajan wong klebu kendel ing antarané para suradadu,

ya bakal mlayu wuda ing dina kuwi,”

mengkono tembungé GUSTI.