Kolosé 3

₁Awit sangka kuwi yèn kowé wis pada mèlu ditangèkké bareng karo Kristus, pada nggolèkana sembarang ing nduwur, ya kuwi panggonané Kristus ana, sing njagong ing sak tengené Gusti Allah. ₂Pada nggatèkna apa sing nang nduwur, aja ing bumi. ₃Awit kowé wis pada mati lan uripmu kuwi kebuntel bareng karo Kristus, ing Gusti Allah. ₄Yèn Kristus sing dadi urip kita kuwi bakalé ngétok, kowé ya bakal pada mèlu ngétok karo Panjenengané ing kamulyan.

₅Mulané kowé pada matènana samubarang sing kadonyan ing awakmu, ya kuwi laku bédang, tumindak rusuh, ngumbar hawa nepsu, kepénginané daging, mengkono uga pikiran srakah, sing pada karo nyembah marang brahala, ₆kabèh kuwi njalari nesuné Allah [marang para wong duraka]. ₇Ing mauné kowé ya pada nglakoni mengkono, nalika kowé ijik pada rumaket marang perkara-perkara mau. ₈Nanging saiki, kuwi mau kabèh buwangen, ya kuwi nesu, brangasan, sing ala, pitenah lan tembung-tembung kotor sing kok utyapké. ₉Aja nganti kowé pada goroh-gorohan menèh, awit kowé wis pada ngutyuli kamanungsan lawas sak pertingkahé, ₁₀lan wis nganggokké kamanungsan anyar sing tansah dianyarké, supaya pada olèh kaweruh sing bener miturut gambaré Sing Nyiptaké; ₁₁ing kono wis ora ana wong Yunani utawa Ju, wong disunat lan wong sing ora disunat, wong Barbar utawa wong Skit, abdi utawa wong merdéka, nanging Kristus kuwi sing sak kabèhé lan ing samubarang kabèh.

₁₂Mulané awit kowé wis pada dadi pilihané Gusti Allah, sing wis disutyèkké lan ditrésnani, pada nduwéa welas asih, loma, andap asor, alusé pikiran, lan sabar. ₁₃Pada sabar-sinabara, ngapura-apuranen yèn ana sing nduwé niat kepéngin mbales alané, kayadéné Gusti Allah enggoné wis ngapura kowé, kowé uga tumindaka mengkono. ₁₄Lan sing ngungkuli kuwi kabèh: nandangana katrésnan, kuwi sing ndadèkké siji lan nyampurnakké. ₁₅Supaya tentrem-rahayuné Kristus ngwasani ing atimu, awit ya kaya mengkono kuwi enggonmu pada dityeluk dadi awak siji. Pada memujia maturkesuwun. ₁₆Supaya tembungé Kristus manggon ing tengahmu karo lubèr, terus enggonmu pada wulang-wulangan lan éling-élingké nganggo sak kabèhé kawityaksanan uga lan ngidungké masmur, kidung pamuji lan kidung kasukman, kowé pada pasrah maturkesuwun marang Gusti Allah sak njeruhné atimu. ₁₇Lan kabèh apa sing kok tindakké karo tembung utawa karo penggawé, kuwi kabèh lakonana ing asmané Yésus, karo maturkesuwun marang Gusti Allah, Bapak kita lantaran Panjenengané.

₁₈Para wong wadon, pada manuta marang bojomu lanang, kaya sak pantesé ing Gusti.

₁₉Para wong lanang, bojomu wadon trésnanana lan aja nganti kok kasari.

₂₀Para botyah, pada manuta marang wong tuwamu ing kabèh perkara, awit kuwi ndadèkké senengé Gusti. ₂₁Para bapak, aja nglarakké atiné anakmu, supaya aja nganti semplak.

₂₂Para batur, manuta marang bendaramu ing ndonya iki ing kabèh perkara, aja mung ing ngarepé waé enggonmu nggawé senengé, nanging karo sak kabèhé ati awit sangka wedi marang Gusti, ₂₃lan kabèh apa sing kok tindakké kuwi tindakna karo sak kabèhé atimu kayadéné kanggo Gusti, ora kanggo manungsa. ₂₄Kowé wis pada weruh, yèn Gusti bakal ngekèki warisan sing wis ditemtokké kanggo berkahmu. Kristus kuwi bendara, lan kowé dadi abdiné. ₂₅Sapa waé sing nggawé kesalahan, kuwi bakal nanggung kesalahané, awit Gusti ora mbédakké wong.