1Mengkéné tembungé Gusti GUSTI: Gapura plataran njeruh sing madep mengétan kudu minep ing sak njeruhné nem dina, dina nyambut nggawé, nanging ing dina sabat supaya dibukak; ing dina sasi anyar uga kudu dibukak. 2Ratu kuwi enggoné bakal mlebu sangka njaba ngliwati kamaré gapura terus ngadek ing sak tyedaké tyagaké gapura kuwi. Ing waktu kuwi para imam pada ngolah kurban obongan lan kurban keslametané ratu mau, nanging ratu kuwi terus sujut nyembah ing ngarepé gapura kuwi, terus metu menèh. Nanging gapura kuwi nganti soré ora kena ditutup. 3Wong-wong ing negara ya kudu mèlu sujut nyembah ing ngarepé GUSTI ing gapura kono, ing dina sabat lan ing dina sasi anyar.
4Kurban obongan sing kudu dipasrahké karo ratu marang GUSTI ing dina sabat kuwi, wedus gèmbèl enem lan wedus gèmbèl lanang siji sing tanpa tyiri. 5Kurban panganan sing rupa wedus gèmbèl lanang kuwi kudu diolah karo glepung sak éfa, nanging kurban panganan sing rupa wedus-wedus gèmbèl liyané, kuwi gumantung karo kekuwatané lan lenga sak hin kanggo sak éfa. 6Ing sasi anyar kudu masrahaké sapi lanang nom siji sing tanpa tyiri, lan wedus gèmbèl enem lan wedus gèmbèl lanang siji sing tanpa tyiri. 7Kanggo kurban panganan, ratu kudu nyawiské glepung sak éfa karo sapi siji lan glepung sak éfa karo wedus gèmbèl lanang siji, nanging kurban panganan sing rupa wedus-wedus gèmbèl liyané gumantung kekuwatané, lan lenga sak hin kanggo sak éfa.
8Yèn ratu arep mlebu kuwi enggoné mlebu kudu ngliwati kamaré gapura lan metuné uga sangka kono. 9Nanging yèn para wong negara, ing dina riyaya mau pada nglumpuk ing ngarepé GUSTI, sing mlebu ngliwati gapura lor arep mèlu sujut nyembah, metuné liwat gapura kidul, nanging sing mlebuné ngliwati gapura kidul, metuné liwat gapura lor. Aja ana wong sing metuné liwat gapura sing mau diliwati waktu mlebuné, dadi saben wong metuné liwat ing gapura ing ngarepé. 10Nanging ratu kuwi mlebu metuné bareng karo wong-wong mau. 11Ing dina gedé lan ing dina riyaya-riyaya sing tetep, kudu ana kurban panganan; ya kuwi glepung sak éfa diolah karo sapi lanang siji lan glepung sak éfa diolah karo wedus gèmbèl lanang siji, nanging kurban panganan sing rupa wedus-wedus gèmbèl liyané kuwi gumantung kekuwatané, lan lenga sak hin kanggo sak éfa.
12Yèn ratu nyawiské kurban obongan kebungahan utawa kurban keslametan kebungahan kanggo GUSTI, kuwi dibukakké gapura ing sisih wétan lan ratu mau terus bakal masrahaké kurbané obongan lan kurbané keslametan kuwi kaya sing ditindakké ing dina sabat. Sakwisé mengkono terus metu lan gapurané terus kudu ditutup.
13Saben dina dèwèké kudu nyawiské wedus gèmbèl sing umur setaun sing tanpa tyiri kanggo kurban obongan kanggo GUSTI; kuwi kudu ditindakké saben ésuk. 14Kejaba kuwi saben ésuk kudu masrahaké kurban panganan glepung sak pranem éfa karo lenga sak pratelon hin kanggo nyampuri glepung sing betyik déwé mau; kuwi kurban panganan kanggo GUSTI, lan katetepan iki kanggo selawasé! 15Dadi saben ésuk wong-wong kudu masrahaké wedus gèmbèl lan kurban panganan lan lenga kanggo kurban obongan sing tetep.
16Mengkéné tembungé Gusti GUSTI: “Yèn ratu ngekèki sak bagéan tanah pandumané marang salah sijiné anaké, kuwi terus dadi duwèké lan dadi tanah pandumané. 17Yèn ngekèki sak bagéan tanah pandumané marang salah sijiné abdiné, kuwi terus dadi duwèké nganti tekan taun keslametan, terus bali marang ratu kuwi menèh; mung para anak ratu sing kena nduwèni dadi warisané. 18Ratu aja nganti nglanggar tanah pandumané rayat, terus pada kedesek sangka negarané kuwi; mung duwèké déwé sing kena mariské marang anak-anaké, supaya umat-Ku aja nganti ana sing kedesek sangka tanah pandumané.”
Panggonan kanggo ngolah kurban
19Aku terus digawa menyang kamar-kamaré ing sak loré panggonan sutyi, ngliwati lawang ing sandingé gapura, ing kono ing pérangan kulon déwé ana sakwijiné panggonan. 20Aku diomongi mengkéné: “Kéné iki panggonané para imam pada ngolah kurban denda lan kurban ngluwari dosa lan ngobong kurban panganan, lan kuwi ora kena digawa nang plataran njaba, supaya aja nganti nyutyèkké umaté.”
21Sakwisé mengkono aku terus dituntun nang plataran njaba lan aku dililani nang pojoké papat plataran kuwi, ing saben pojok ana platarané menèh. 22Ing pojoké papat plataran kuwi ana platarané tyilik, dawané patang puluh éluh lan ambané telung puluh éluh, kaping papaté kuwi ukurané pada. 23Platarané tyilik papat kuwi diubengi karo témbok lan ing panggonané ngisor témbok-témbok kuwi ana panggonané sing kanggo olah-olah. 24Piyambaké ngomong marang aku: “Iki pawon kanggo masak; para wong sing pada nduwèni kuwajipané ing griya sutyi enggoné ngolah kurban sing dibelèh kanggo rayat ing kéné.”
