Wiwitan 15

₁Sakwisé kuwi mau terus ana tembungé GUSTI marang Abram sak njeruhné weweruh: “Kowé aja wedi Abram, Aku iki tamèngmu, upahmu bakal gedé banget.” ₂Semauré Abram: “Duh GUSTI, Gusti Allah, bakal ngekèki apa marang kula? Awit kula bakal ninggal ndonya tanpa anak, mesti Elièser wong Damaskus kuwi, bakal marisi sembarangé kula.” ₃Tembungé Abram menèh: “Gusti ora ngekèki turunan marang kula, mulané salah-sijiné abdi kula sing lair ing omah kula sing bakal dadi alur warisku.” ₄Terus tembungé GUSTI marang Abram, mengkéné: “Duduk wong kuwi sing bakal dadi alur warismu, nanging anak lanangmu sing lair sangka kowé sing bakal dadi alur warismu.” ₅Terus Gusti nuntun Abram metu menyang njaba lan diomongi: “Kowé ndeloka ing langit lan itungen lintangé, yèn kowé bisa.” Terus tembungé Gusti menèh: “Ya semono okèhé bakalé tyatyahé turunmu.” ₆Terus Abram pertyaya marang GUSTI, lan perkara kuwi diitung karo GUSTI dadi kabenerané.

₇Uga tembungé GUSTI marang Abram menèh: “Aku iki GUSTI sing wis nuntun kowé metu sangka Ur-Kasdim; awit bakal Tak wènèhi negara iki dadi duwèkmu.” ₈Semauré Abram: “Duh GUSTI Allah, kepriyé enggèn kula ngerti, yèn negara iki bakal dadi duwèké kula?” ₉Terus Gusti ngomongi: “Aku jupukna pedèt wédok sing umur telung taun, wedus sing umur telung taun, wedus gèmbèl lanang sing umur telung taun, manuk deruk siji lan anak dara siji.” ₁₀Kabèh mau terus pada dijukuk lan pada disigari, sigarané siji lan sijiné disèlèhké adep-adepan, mung manuké sing ora disigari. ₁₁Bareng ana manuk galak pada ngéntyloki sing dibelèh mau, terus pada digusahi karo Abram.

₁₂Bareng arep surup, Abram terus turu kepati. Dèkné terus dikwasani ing peteng ndedet sing nggegirisi. ₁₃GUSTI terus ngomong marang Abram: “Ngertia ing sak temené, turunanmu bakal dadi wong mantya ing negara sing duduk duwèké, lan bakal pada dadi batur, lan ditindes nganti 400 taun suwéné. ₁₄Nanging bangsa sing nindes kuwi ya bakal Tak ukum. Sakwisé mengkono bakal pada metu lan nggawa banda okèh banget. ₁₅Nanging kowé kuwi bakal dadi siji karo leluhurmu nganti slamet rahayu, enggonmu dikubur ing waktu wis okèh umurmu. ₁₆Sakwisé patang turunan, anak-turunanmu mengko bakal bali mréné, awit Aku ora arep nundung wong Amori, sing ngenggoni negara iki, sak durungé dosané kebek tenan.”

₁₇Bareng wis surup lan wis peteng, terus kétok ana angklo kemebul lan ontyor murup sing mlaku ing tengahé sigaran-sigaran daging mau. ₁₈Ing dina kuwi GUSTI nggawé perjanjiané karo Abram, tembungé: “Turunanmu bakal Tak wènèhi negara iki, wiwit sangka kali ing Egipte nganti tekan kali gedé Efrat, ₁₉ya kuwi negarané wong Kèni, wong Kénas, wong Kadmon, ₂₀wong Hèt, wong Fèris, wong Réfaim, ₂₁wong Amori, wong Kanaan, wong Girgasi lan wong Yébus.”