1“Yèn masrahaké kurban keslametan lan sing dipasrahké kuwi rupa sapi, senajan lanang utawa wédok, kuwi kudu sing tanpa tyiri sing dipasrahké ing ngarepé GUSTI. 2Wong terus numpangké tangané ing endasé kurbané, sapi kuwi terus dibelèh ing ngarepé lawangé Tarup Kumpulan lan getihé disiramké ing sak ubengé mesbèh karo para imam anaké Harun. 3Sakwisé mengkono kurbané keslametan kuwi sak bagéan dijukukké dadi kurban sing dipasrahké marang GUSTI karo dibakar, ya kuwi gajihé sing mbuntel jeroané lan sakkèhé gajihé sing nèmplèk ing jeroané, 4uga menèh ginjelé loro pisan sak gajihé, ing lempèng lan ing gèmbèlané atiné, jupukana dipisah bareng karo ginjelé. 5Kuwi terus diobongi ing mesbèh karo para anaké Harun, ditumpangké ing kurban obongan sing ijik diobong ing geni; kuwi dadi kurban bakaran, sing ambuné nggawé senengé GUSTI.
6Yèn sing kanggo kurban keslametan ngadep marang GUSTI kuwi rupa wedus, senajan lanang utawa wédok, kuwi kudu sing tanpa tyiri. 7Yèn wedus gèmbèl sing dipasrahké dadi kurban, kuwi diladèkké ing ngarepé GUSTI. 8Wong numpangké tangané ing endasé kurban, wedus kuwi terus dibelèh ing ngarep Tarup Kumpulan, lan getihé terus disiramké ing sak ubengé mesbèh karo para anaké Harun. 9Sakwisé mengkono kurbané keslametan kuwi sak bagéan dijukuk diladèkké dadi kurban bakaran marang GUSTI, ya kuwi gajihé lan buntuté kabèh, diketok mèpèt ing balung mburiné lan gajihé sing nutupi jeroané uga sakkèhé gajihé sing nèmplèk ing njeruhné, 10Uga menèh ginjelé loro pisan sak gajihé sing kelèt ing kono, uga gèmbèlé atiné, jupukana bareng karo ginjelé. 11Kuwi terus diobongi karo imam ing mesbèh kanggo panganan rupa kurban bakaran dipasrahké marang GUSTI.
12Yèn kurbané rupa wedus, kuwi diladèkké ing ngarepé GUSTI. 13Wong numpangké tangané ing endasé wedus, terus wedusé dibelèh ing ngarepé Tarup Kumpulan lan getihé disiramké ing sak ubengé mesbèh karo para anaké Harun. 14Terus sak bagéan dipasrahké dadi kurban bakaran marang GUSTI, ya kuwi gajihé sing mbuntel njeruhné lan sakkèhé gajihé sing nèmplèk ing jeroané 15lan ginjelé loro pisan sak gajihé, sing kelèt ing kono, ing lempèng uga gèmbèlé atiné, jupukana bareng karo ginjelé mau. 16Kuwi terus diobongi kabèh karo imam ing mesbèh kanggo panganan rupa kurban bakaran, sing ambuné nyenengké. Sakkèhé gajihé kuwi dadi duwèké GUSTI.
17Iki pernatan sak lawasé kanggo turunanmu ing ngendi-endi panggonanmu: Ati-ati kowé aja pisan-pisan mangan gajihé lan getih.”
