1 John 1

₁Ina emenukayatàu wema'nàtok Maimu pàk. Molo iwessak lùppù iwepyattàppù motapai. Ina uya yetappù màlà molopai ina uya yeneppù tenu kon ke; ewaik, ina uya yeneppù molopai ina yemyatù uya yappàtùppù. ₂Sàlà wema'nàtok wenasak tensen pe yau, ina uya yeneppù, màlàpàk ina uselupa sàlà ipàk, molopai ina uya tàwàlà wema'nàtok Kùkàipùnù winàpaino yekama àpàkù'nokon sàlà, ina pàk yekamasak lùppù. ₃Màlà ina neneppù lùppù molopai ina netappù yekama nàlà ina uya àpàkù'nokon, ina kùlottau echitonpa pe we'nàtok yau ewechi kon pa Kùkàipùnù molopai Imu Jesus Christ pokonpe. ₄Ina uya sàlà menuka sàlà utauchinpantok wettoppe tamù'nawàlà.

₅Sàlàichi màlà Itekale ina netappù Imu winàpai molopai ina nekamayai'nùk àpàkù'nokon: Katù mùkkàlà akkwa molopai ewalupà là pùla kulu iwechi màlà yau. ₆Echitonpa pe ipokonpe ina man tei'ma'nokon, nàlà wema'nà ewalupàttau yau, kasei pe we'nà màlà asakklàma kùmaimu yau molopai welaikantok yau. ₇Tùse wema'nà akkwa yau, akkwa yau iwechi nai'nùk kasa yau, echitonpa pe we'nà màlà kùtonpa pokonpe, molopai Jesus Christ, Imu, mùnù uya kùkuka kon màlà tamù'nawàlà kùmakuyi kon winàpai.

₈“Imakuyi pùn nen Iulà,” te kùuya'nokon yau, usennakan nokon màlà molopai ailon pùla iwechi màlà kùyau'nokon. ₉Tùse Katù pàk kùmakuyi kon yekama yau, ailon mùkkàlà molopai iwalai ku'nài. Màlàpàk kùmakuyi kon pàk ichentupa màlà kùpàkù'nokon molopai wakù pe kùma kon ya màlà tamù'nawolon àli winàpai. ₁₀“Wemakuimasak pùla iwechi màlà.” te kùuya'nokon yau, kasei pe tùwessen pe màlà Katù kupù'nokon molopai imaimu wechi kùyau'nokon pen.