1 Timothy 2

₁Wapiya kulu, tok ponalà'ne kappon yamùk pona àwàpùlema pa eyekamappoyan Iulà. Tamù'nawàlà tok pùikattàtoppe Katù uya màpùlemaik molopai tenki tetok auya tok pàk mekamaik Katù pàk. ₂Kin yamùk, molopai tamù'nawolon kon potolù yamùk ponaloppe, wema'nàtoppe eppana àsà pùla molopai echitonpa pe, wakù pe Katù kùpùikattànài tauchinpaik molopai iwalai iteselu pe tùwelaikaik we'nàtoppe. ₃Sàlà màlà wakù molopai Katù Kùpùikattànài yauchinpa ya màlà, ₄tamù'nawolon kon wepùikattà ichelok mùkkàlà molopai ailon ittu tok uya iche tùwessen. ₅Masapùla Katù mùkkàlà tewinan, molopai tewinan nàlà molo man Katù molopai tamù'nawolon kon kappon yamùk yakkletawon, mùkkàlà kàyik Christ Jesus. ₆Iwettùsak lùppù tamù'nawolon kon kappon yamùk pùikattàtoppe tùuya. Sàlà ichi màlà Katù nenpoikappù wolù yawon kon nùttu pe iwekkuttok yattai tok wepùikattàtoppe. ₇Màlàpàk uchi sàlà uyeunossak kappon yamùk Jew yamùk pen yenupanài pe molopai ailon yekale yekamase. Ailon pe uselupa sàlà, kasei pe wechi pen!

₈Sochi pàk we'nà yattai'ne kàyik yamùk wàpùlema iche wessaik, kàyik yamùk Katù yemyak iwettùsak kon molopai temyatù kon tenkaik tùwàpùlemasan yek tùwe'naikaik pùla wapùla tùusàulàmaik pùla.

₉Ulichamichi wepontà nàlà wakù pe, tùttuik, tipippà kon tùwaputtàse iche wessaik, tùusema'nonpaik kolù ke wapùla pearl ke pùla, teseluttàpàsse tùppai tùkappàse pùla, molopai epekkek kulu là pon ke tùwepotàik pùla, ₁₀tùse wakù pe iwelaikatok, Katù ittunnan ulichamichi welaikatok kasa. ₁₁Ulichamichi usenupa nen màlà eppana echii'ma molopai tamù'nawàlà àssà'mùla entuppak tùuchittuse. ₁₂Enupantoppe tok uya tok ku'nài pen Iulà wapùla kàyik yamùk yentai tok wettoppe ikupù uya pùla man. Tàwà eppana tok nechii. ₁₃Masapùla Adam konekappù màlà wapiya, molopai màlà tùpo nen uchi Eve konekappù màlà. ₁₄Molopai Adam pen mùkkàlà yennakasak lùppù; ulichan làkku mùkkàlà yennakasak lùppù molopai Katù Maimu ikkwà'nàippù. ₁₅Tùse ulichan wepùikattà màlà tùumunkàta yai, ailon tetok, uchi'nùnmantok, esuken we'nàtok molopai tùttuik wema'nàtok, wakù pe tipippà tùwaputtàik tùwepontàsen pe tùwechi yau tàwàlà.