2 Corinthians 3

₁Sàlà na' nùsetayan ina utapulà tu'ma tùpàkù'nokon kasa làmà? Tùulon kon kappon yamùk kasa ka' ina uya apulàntok kaletayi iche kulu ina nai apyakù'nokon lù wapùla apyapai'nokon? ₂Amyamlo là mùkyamlo ina kaletayi, imenukasak lùppù ina yewan pàk, tamù'nawolon kon nùttu molopai tok nene pe. ₃Yenpoikasak auya'nokon man kaleta Christ winàpaino pe ewechi kon, ina wotokoyi yepeppù pe. Imenukappù màlà kaleta menukatok palu ke pùla molopai tàk pàk pùla, tùse kappon yewan yamùk pàk Wakù Akkwalù tàwàlà tùwemassen Katù winàpaino ke.

₄Ina uya sàlà te màlà masapùla ailon tetok ina uya wechi Katù yau pàk Christ yai. ₅Masapùla yà'làlà pùla man ina yau ina kupù woton sàlà wotoko ku'nài pe tùmeluntàlù ke ina wettoppe. Meluntà itesak pe ina nai'nùk màlà tùuyàssen Katù winàpai. ₆Masapùla mùkkàlà uchi mùkkàlà ina ku'nàippù meluntà pe emennak ikupù tùuya tetok Katù uya ponaloppe ina we'wotokomatoppe, imenukasak lùppù law winàpaino pen, tùse Akkwalù winàpaino. Imenukasak lùppù màlà weli'nàtok ne'nài, tùse Akkwalù mùkkàlà wema'nàtok ke lepanài.

₇Tùse màlà uya weli'nàtok nepùppù. Law menukappù màlà tàk pàk, màla kasa làma Katù yakkwayi usenpoikappù màlà itùsak yau. Katù yakkwayi waliwomùppù lànen tùse, Moses yenpata pon akkwa wechippù màlà meluntà pe kulu Israel yamùk uya tenu kon kupù ipàk pùla iwechippù. ₈Màlà yentai lùiwa ken na' uchi wakù pe kulu wotoko Akkwalù yau nai'nùk wechi pen? ₉Law kappon yamùk talumatàtok iwinà wechippù màlà tùnamasen pe, tùnamasen peiwa wotoko iwalai ne'nài wechi màlà! ₁₀Masapùla ekeiwa namantok wechi molo pàk, namantok akkwa pe kulu iwessak lùppù pena waliwomùpù man te là ina uya. ₁₁Masapùla namantok wechippù malalà iko'mansak lùppù yau yau, eke peiwa namantok wechi màlà molo tàwàlàlà tùwemassen yau!

₁₂Màlàpàk enpen tùwettok kon yesappe tùwechi kon pàk, ina usenalipa pùla iwechi màlà. ₁₃Moses walainon pen ina, mùkkàlà tenpata waputànàippù Israel yamùk uya akkwa useulanka molopai iwaliwomù yene tukaik. ₁₄Tok usenumenkatok utakkosak kulu wechippù màlà. Molopai sàlà tepose tok usenumenkatok waputtàsak màlà lùppù kaleta yamùk penalok ikupù tùuya tetok Katù uya yawon uya man. Masapùla Christ yau neken màlà yamappù màlà. ₁₅Sàlà pe lànen Law yene tok uya yau, màlà waputtànài tok usenumenkatok waputtàyan lùppù. ₁₆Tùse ànù'là welattàsak Itepulu winàkàik pe iwechi yau, waputtànài yamasak màlà. ₁₇Itepulu uchi mùkkàlà nai'nùk Akkwalù molopai Itepulu Yakkwalù wettok imotau yau, iwemokkasappe we'nàtok wechi màlà molo. ₁₈Tamù'nawolon kon kùmyamlo uchi mùkyamlo Itepulu yakkwayi yenpoikannan itenpata wapu pùla echii'ma, molopai ikasa tùwemyakamasan tàwàlàlà tùwessen akkwa pokonpe. Itepulu winàpai nùyàssai'nùk, uchi mùkkàlà Akkwalù.