2 John 1

₁Sàlà màlà kaleta Iulà amoko, John nùmenukappù. Wakù kulu Nossan molopai imunkà yamùk piyak imenukasak lùppù, u'nùn pe unkupù ton amyamlo. Iulà pe neken là pùla, tùse tamù'nawolon kon ailon ittunnan, mùkyamlo tù'nùn kon pe àkussatàu, ₂masapùla ailon wechi kùyau'nokon pàk molopai tàwàlàlà kùpyau'nokon iwechi màlà.

₃Tàwà Katù Kùkàipùnù kon molopai Jesus Christ Kùkàipùnù kon Mumu kùlepai'nokon wakù pe we'nàtok ke, usentuppantok ke, molopai echitonpa pe we'nàtok ke; tàwà màlà yamùk kùponaloppe nechii ailon molopai uchi'nùnmantok yau.

₄Utauchinpatai kulu àmunkà tonpa yamùk wemapù ailon yau yeposak uya pàk, Kùkàipùnù kon maimu yawàlà. ₅Màlàpàk eyekamappo uya sàlà, wakù kulu Nossan, uchi'nùnmanpai'nokon uchi man. Sàlà tùmenuka yai'nùk apyak màlà emennak pen suwa mettàik tetok; itesappe we'nàtokù'nokon sàlà iwepyattà motapai. ₆Sàlà uchi'nùnmantok uselupa yai'nàk ipàk uya màlà yekama wema'nà'nokon Katù Maimu yawàlà. Sàlà màlà enupantok, enetappù kon iwepyattà motopai: “Tamù'nawàlà emattàk kon tùuchi'nùnmaik,” tawon.

₇Tukke ennakannan utàppù man sàlà wolù yau, pùsamlo Jesus Christ wemassak kappon pe pàk ailon tawonnan pen. Mùkkàlà yekkwa mùkkàlà ennakanài, Christ yeyaton mùkkàlà. ₈Elanneppe ekkà tùttuik màlà itepeppe ewe'wotokomappù kon lachima auya'nokon tukaik, tùse eyepeppù kon yepolo kon pa tamù'nawàlà itonpappù pe là pùla.

₉Ànù'là Christ maimu yawà tùwessen pen, tùse tentaikase nemassai'nùk yawàlà pùla wechi màlà Katù pùla. Ànù'là Christ maimu yawà tùwessen wechi màlà Katù Kùkàipùnù molopai Imu tawonnan yesappe. ₁₀Ànù'là uyàssak apyak sàlà Christ maimu ne'nài pen wechi yau, kùsewonnùpùi àwùk tak, molopai, “Echitonpa pe we'nàtok wechi màlà apyau,” kùkai là. ₁₁Masapùla ànù'là “Ewonkà” tawon wena màlà ipatùnayi pe, àli kuttok ya yau.

₁₂Tukke unekama molo man àpàkù'nokon, tùse ikupù uya pen sàlà kaleta pàk; tùse akakklanpa uya pàk enpen wessaik, eyelupase Iulà pe, i'napailà tùutauchinpaik we'nàtoppe.

₁₃Àtonpa munkà yamùk “Wakù pe na' messatàu?” nùkayan.