2 Peter 1

₁Sàlà màlà kaleta Simon Peter, Jesus Christ yapyoto molopai ineunokoppù winàpaino, mùkyamlo wakù pe kùkatùyi wettok molopai pùikattànài Jesus Christ yai. Ilepasak kon ailon tetok wakù kulu, ina uya ailon tetok walai ke piyak inmenukappù.

₂Tàwà wakù pe we'nàtok Katù winàpaino molopai echitonpa pe we'nàtok apyau'nokon nechii eke pe kulu, ipùkkù lùppù pe pùla tamù'nawàlà Katù molopai Jesus Kùyepulu kon ittutok auya'nokon yai.

₃Katù yapàiketù uya tamù'nawolon iche kulu we'nàtok ke lepansakù'nokon màlà wema'nàtoppe molopai imaimu yawàlà we'nàtoppe. Sàlà yeposak màlà kùuya'nokon masapùla ittu kùuya'nokon pàk mùkkàlà kùkà'manàippù kon tapulàtoppe molopai wakù pe tùwettok pùkkù pe we'nàtoppe ittutok kùuya'nokon yai. ₄Sàlà kasa lepansak kon ya màlà Katù yeselu wakù molopai eke ton kulu wakù pe we'nàtok itùlù tùuya teppù lùppù tùuya ke, màlà yanùmù auya'nokon winà mattanù'nài àli ànkuppai we'nàtok molo nai'nùk non po winàpai ewepe kon pa, molopai àuyàpù kon pa Katù yeselu pùkkù pe esse. ₅Sàlà kasaichi iwechi pàk, ànùttu kon mùkuttàik kulu ailon tetok auya'nokon tonpattà kon pa wakù pe we'nàtok ke; molopai wakù pe ewettok kon pona ittunài pe we'nàtok; ₆ittunài pe ewettok kon pona eyesak kon pe ewettok kon; eyesak kon pe ewettok kon pona pàlikantok; pàlikantok auya'nokon pona wakù pe esuken Katù kasa we'nàtok; ₇wakù pe esuken Katù kasa ewettok kon pona tonpa pàk usentupantok molopai tonpa pàk usentupan pona pùnùnmantok. ₈Sàlà yamùk wechi ayau'nokon, molopai iwekatù yau, ewepeta kon pa àkupù kon ya màlà molopai tapulàsen pe Kùyepulu Jesus Christ tùttuik we'nàtok yau. ₉Tùse sàlà yamùk pùla nai'nùk wechi màlà enpùla molopai mei yene ya pùla, molopai àli tùnkupùssan kukappù puttàka'nùssak ya.

₁₀Màlàpàk uchi, utonpa yamùk, ànùttu kon ikuttàk kon Katù uya kà'mantok molopai ayanùntok kon ya ittu kon pa, masapùla sàlà kupù auya'nokon yau meluntà pe ewechi kon màlà ewekkawai'ma kon pen. ₁₁Molopai Katù uya epùn mùlatta yakkoka màlà eke pe, ewewomù kon pa tàwàlàlà itepulu pe Kùyepulu, Kùpùikattànài Christ Jesus wettok yak.

₁₂Sàlà kasa iwechipàk eyenu kon yappontà pàk wechi màlà tàwàlà sàlà yamùk pàk, ittukassak lànen auya'nokon tùse, molopai ewekonekasak kon meluntà pe ailon ananùmùppù kon yau tùse. ₁₃Ailon ukayaik ikasa emeluntàpa kon uya eyenu kon yappontà uya sàlà yamùk pàk winà pàk, nulà wechi kùlottau. ₁₄Tùttuyaik tachin pe tùpo pùla sàlà tùukàtasen esak nonka uya miya Kùyepulu kon Jesus Christ uya yekamappù upàk kasa. ₁₅Tamù'nawàlà unùttu kupù uya kulu màlà welikùppù ye'mappùtak sàlà yamùk ittutok auya'nokon tàwàlà yawàlà woton koneka pàk.

₁₆Ikuppàssak kon nà panton yekama ina uya pùn Kùyepulu kon Jesus Christ uyàpù meluntà pe yekama ina uya àpàkù'nokon yau. Tùse tenu kon ke ina uya itakkwayi yeneppù. ₁₇Molo ina wechippù wùk po namantok molopai itakkwayi ke ilepasak Katù Ikàipùnù uya yattai, mayin uyàpù ipyak eke itakkwayi yau epùn poi yattai, “Pùsàlà mùkkàlà u'nùn kulu Umu, uyauchinpanài kulu!” tukaik. ₁₈Ina uya tùmyamlo'nokn pe neken echii'ma sàlà mayin uyàpù epùn poi yetappù, ipokonpe ina wechi wakù wùk po yau.

₁₉Màlàpàk kulu ina nùttuyan Katù Maimu yenpoikannannùssan yekale wechi ailon pe. Màlàpàk uchi wakù ikuttàk kon mei pùla tok nekamappù yene auya'nokon yau, akkwa yene auya'nokon ewalupàttau kasa, yene pàk mettàik pata wemapà yene auya'nokon kaiwonok uyàpù ewalupàttau pata wemapù ponalà kasa. ₂₀Tamù'nawolon wapiya, sàlà ittutàk kon: Katù yekale Katù Maimu yawon yenpoika ànù'là uya tùyiwalà pùla iwechi màlà. ₂₁Masapùla Katù yekale yekamasak lùppù uyàpùppù kappon yeselu neken winàpai pùla, tùse Katù Maimu yekamannannùssan yau Wakù Akkwalù wechippù; màlàpàk tok uya itekale Katù winàpai iyàssak lùppù yekamappù.