Yeunossak kon Wotokoyi 12

₁Sàlà yekkwa yattai Kin Herod wepyattàppù màlà sochi tawon kon talumattà pàk. ₂James, John lui, wàtoppe kasupala sà wino'nan yà ke ikupùppù ya. ₃Sàlà uya Jew yamùk yauchinpa yensak tùuya yau, Peter yachitoppe ikupùppù ya nàlà. Sàlà wekkupùppù màlà Uta'lettàntok yapuluwetanùssak pen pùlomù pussak pàk yattai. ₄Peter yachi tùpo itùlùppù ya màlà patikichi tak, màlà motau asakùlà'ne ipatassek, asakùlà'ne'ne ipantakasak kon soicha yamùk uya yentoppe itùlùppù ya. Herod wekkupùppù inepù pàk Jew yamùk piyak, Usentaka'nàppà yattai Uta'lettàntok ye'mappùtak. ₅Màlàpàk Peter kupùppù màlà patikichi tau, tùse sochi tawon kon wechippù tùwàpùlema kon pàk kulu ipona.

₆Màlà yewalupàyi tau Herod uya inepù patikichi tapai kappon yamùk piyak wapiya, Peter we'nùmùppù màlà asa'lon kon soicha yamùk yakkletau. Yaulonsak wechippù màlà asa'là chin ke, molopai nàlà yennàinan wechippù màlà patikichi mùlatta po yene pàk. ₇Asse'ne kulu Katù inchelùyi usenpoikappù màlà molo. Molopai akkwa ulenpamùppù itau iwettok tau. Inchelù uya Peter wànàppùya iwolo yai, yenpakappù ya molopai, “Asse'ne! E'wuluukakà,” teppù ya. Molopai tewinanpa yaulontok wepukappù itemyatù poi. ₈Màlàyau Inchelù uya, “Epokùlùyittàkà molopai essapattuyitàkà,” teppù ipàk. Peter uya ikupùppù molopai inchelù uya, “Àpon pùloppon itùkà àwoi molopai uya'là àikkà,” teppù. ₉Peter uya iwenaimappù patikichi tapai. Ittu ya pùla iwechippù màlà yà'là kasa là inchelù nùkupùppù wechi ailon pe; we'nepà'nàtok walai yene tùuya pe yekamappù. ₁₀Tok uya wapiyalok ennàinan pata yentakappù, molopai yakon. Molopai màlà tùpo tok uyàpùppù pata we'na mùlatta ayan motak, pata yak tùutakkokasen motak. Manatta utakkokappù màlà tok ponaloppe tùyiwalà, molopai tok wepakkappù. Tok utàppù wapiyalok asantawà, màlàyau asse'ne inchelù uya Peter nàmàppù.

₁₁Màlàyau Peter uya iwekkussak lùppù tùpàk ittuppù, molopai, “Tùttuyaik nen uchi, Katù uya tùyinchelùyi yeunossak, molopai Herod meluntàlù winàpai umokkasak ya, molopai tamù'nawolon Jew yamùk wettok ànkuppai winàpai,” teppù ya.

₁₂Yà'là kasa là tùwettok ittui'ma, iitàppù Mary, John yan yùwùk tak Mark tukaik nàlà tesassen yan yùwùk tak. Tukke kappon yamùk wepilichak wechippù màlà molo molopai tok wàpùlemappù màlà Katù uya Peter pùikattà toppe. ₁₃Peter uya manatta wànàppù polopo, màlàyau apyoto ema'non Rhoda itesek uyàpùppù yeiche. ₁₄Peter maimu ittuppù ya màlàyau itauchinpasak kulu wechippù màlà, iwennapoppù màlà manatta takkokaik pùla, molopai Peter wechi polopo yekamappù ya tok pàk. ₁₅“Eusennaka màlà, autayaupa màlà!” teppù tok uya ipàk. Tùse, iicheka'nonkappù ailon pe iwechi pàk. Màlàyau tok uya yeikuppù, “Itinchelùyi mùkkàlà,” tukaik. ₁₆Màlà yattai Peter wechippù manatta wàpàtù pàk lùppù. Tok uya manatta yakkokappù molopai yensak tùuya'nokon yau, tok usenumenkappù kulu màlà. ₁₇Tok yekamappoppù ya temyatù ke eppana tok wettoppe, molopai yà'là kasa là Itepulu uya tùnessak patikichi tapai yekamappù ya tok pàk. “Sàlà mekamatàik James molopai kùtonpa kon yamùk pàk,” teppù ya molopai iitàppù tùulon yailà.

₁₈Pata wemassak yau, eke pe yachisak kon yennài nan utaimelunpantok wechippù màlà molo: yà'là pe lànan Peter wechippù pàk. ₁₉Herod uya tok yapyontàppù iwa pàk, tùse tok uya yepolo pùla wechippù. Màlàpàk yachisak kon yennài nan yekamappo pàtùppù ya molopai tok tùkka toppe tok uya iitapyontàppù.

Sàlà tùpo Herod utàppù Judea poi Caesarea pona àko'manse.

₂₀Herod we'naikasak wechippù kulu màlà kappon yamùk Tyre molopai Sidon pon kon pàk. Màlàpàk tok utàppù tamùkke Herod yense. Wapiya Blastus nepùppù tok uya tùwinàkàik nokon; mùkkàlà wechippù màlà eke Herod yùwùk yesappe. Màlàyau tok utàppù Herod piyak echitonpa pe wema'nàtok yennaik, masapùla teipa kon yeponài nan pe tùwechi kon pàk kin pata yapai.

₂₁Tùnanùmùppù wei yattai Herod wepontàppù kin pon yak, iweleutappù tapon pona, molopai kappon yamùk yelupappù ya. ₂₂“Kappon uselupa pe pùla man tùse katù uselupa pe!” tukaik tok wentaimeppù. ₂₃Tewinan pa Itepulu inchelùyi uya Herod ippokoppù, masapùla Katù yapulà ya pùla iwechi pàk. Weluwe yamùk uya yanùppù màlà molopai iwelikùppù.

₂₄Katù Maimu wechippù tùutalenka pàk lùppù molopai tukkan kon kappon yamùk uya yetappù màlà.

₂₅Barnabas molopai Saul tawonnan uya tùwotokoyi kon yenuka'nùpùppù molopai tok wennapoppù Jerusalem poi molopai tok uya John yalàppù ta'là' nokon, Mark tukaik tesassen.