Yeunossak kon Wotokoyi 18

₁Sàlà tùpo, Paul uya Athens nàmàppù molopai iitàppù Corinth pona. ₂Molo Jew yepoloppù ya Aquila itesek. Pontus po iwentusak lùppù, Italy poi àichen tùnoppù Prisilla pokonpe. Masapùla eke itepulu Claudius uya tamù'nawàlà Jew yamùk uya Rome nàntoppe yekamappù màlà. Paul utàppù tok yense. ₃Molopai molo iwechippù, iwe'wotokomappù tok pokonpe, masapùla tùwemattok yepoloppù ya màlà tapulin koneka tùuya winà, tok kasa nàlà. ₄Jew yamùk molopai Greek yamùk pokonpe tùuseipàtù pàk iwechippù màlà ailon tetok pe tok uya, Wàlàkka'nàtok weyu yattai'ne Jew yamùk wepilittok itak tau.

₅Silas molopai Timothy tawonnan welepansak Macedonia poi yau, Paul weppàtùppù Wakù Itekale yekama pàk Jew yamùk pàk Jesus wechi Christ pe pàk. ₆Tùwinàkàik wakù pe pùla tok wechi yau molopai àli pe tok uselupa tùpàk yau, tùpon tu'meppù ya, molopai tok pàk: “Àmùnù kon wechi appai kon po màlà! Atalumattà kon yau amyamlo uya yanùmù màlà, unkupù kussak uya man. Sàlà motapai utà sàlà Jew yamùk pen piyak.” teppù ya. ₇Màlàyau tok nàmàppù ya molopai iitàppù, Titius Justus itesek yùwùk tak emasse. Mùkkàlà wechippù Jew pen Katù namanài. Itùwùk wechippù màlà Jew yamùk wepilittok itak piyau. ₈Molopai Crispus, Jew yamùk wepilittok itak yesak uya, ailon teppù màlà Itepulu pàk, mùkkàlà molopai tamù'nawàlà itùwùk tawon kon; molopai tukke tùulon kon kappon yamùk Corinth pon kon uya itekale yetappù, ailon teppù tok uya Itepulu pàk molopai tok usenpataukappù.

₉Tewin ewalupà yattai Paul uya we'neppà'nàtok walai yeneppù, màlà yau Itepulu Jesus uya ipàk wateppù, “Kettalipai, tùse euselupa pàk lùppù ekkà molopai ke'nonkai, ₁₀masapùla aya'là wessaik. Ànù'là uya amattanùpù pen màlà masapùla tukkan kon sàlà pata yawon kon mùkyamlo uponalok kon,” teppù ya. ₁₁Màlàyau Paul wechippù molo tewin kilichimochi molopai 6 pe kapùi, kappon yamùk yenupa pàk Katù Maimu pàk.

₁₂Gallio kussak Roman yepulu pe Achaia po yau, Jew yamùk wepilipùppù molopai Paul yachippù tok uya molopai yalàppù tok uya eke ton yemloto pona. ₁₃“Pùsàlà kàyik, kappon yamùk kupùiche man Katù yapulà toppe tok uya, wema'nàtok yawà Law yawàlà pùla,” teppù tok uya. ₁₄Paul wekoneka tùuselupa pàk kùlottau, Gallio uya Jew yamùk pàk wateppù, “Sàlà wessak ikasa pùla wapùla àli kulu wàntok kussak yau, ikasa wechi màlà eyeta kon uya yau amyamlo Jew yamùk. ₁₅Tùse usàulàmantok mayin pàk, molopai esek yamùk pàk, molopai àmàlà'nokon law pàk pe iwechi yau, amyamlo pe mùkonekatàik. Màlà yekkwa enenpài pùla wessaik,” teppù. ₁₆Màlàyau tok yenpakkappù ya itepulu yamùk yemloto poi. ₁₇Sosthenes, Jew yamùk wepilittok itak yesak, yachippù tamù'nawolon kon uya molopai ippoppàtùppù tok uya eke ton yemloto po. Tùse màlà uya Gallio yaimelunpappù lùkkwà là pen màlà.

₁₈Paul wechippù màlà Corinth po ailon tawonnan piyau tachinpe, molopai tok nàmàppù ya iitàppù tuna po Prisilla molopai Aquila tawonnan pokonpe Syria pona. Cenchrea po tùppai nappù ya ikupù tùuya tetok tùuya Katù pàk kupùppù ya. ₁₉Ephesus pona tok welepamùppù, molopai màlà motau Paul uya Prisilla molopai Aquila tawonnan nàmàppù. Tùse Jew yamùk wepilittok itak tak iitàppù molopai tok useippàtùppù Jew yamùk pokonpe. ₂₀Tok uya yekamappoppù tachin peiwa tùpyau'nokon iwettoppe tùse kane teppù ya. ₂₁Tùse tok pàk yekamappù ya tùutài'ma, “Katù iwalok pe iwechi yau wennapo tu'ma màlà apyakù'nokon,” teppù ya. Molopai iitàppù Ephesus poi tuna po.

₂₂Tùwelepansak Caesarea pona yau, Paul utàppù Jerusalem pona “Wakù pe na' messatàu?” kase sochi tawon kon pàk, molopai iitàppù Antioch pona. ₂₃Molo malalà tùwechi tùpo iitàppù. Galatia molopai Phrygia tawonnan yawolon kon pata yamùk yawàlà, tamù'nawolon kon ailon tawonnan meluntàpa pe.

₂₄Màlà yattai Jew, Apollos itesek iwentusak lùppù Alexandria po uyàpùppù màlà Ephesus pona. Wakù pe tùuselupasen pe iwechippù màlà molopai wakù pe Katù Maimu ittunài pe. ₂₅Yenupasak pe iwechippù màlà Itepulu Jesus yeselu pàk, molopai eke pe kulu ànkuppai tùwettok ke ichelupappù molopai ailon Jesus yekale pàk ikasa enupanài pe iwechippù. Walà tùse John uya enpataukantok yekale neken ittuppù ya màlà. ₂₆Tùwettalipaik pùla, meluntà pe iwepyattàppù màlà tùuselupa pàk Jew yamùk wepilittok itak tau. Prisilla molopai Aquila uya yetasak yau, tok uya yalàppù màlà tùpatassek kon yak, molopai tok uya màlà yentak ikasa lùiwa kulu Katù yeselu yekamappù ipàk. ₂₇Apollos wechippù itàpai Achaia pona. Màlàpàk ailon tawonnan Ephesus pon kon uya kaleta menuka pàk ipùikattàppù, Achaia pon kon ailon tawonnan piyak, tok pawanattà pe yanùntoppe tok uya. Tùwelepansak yau wakù pe Katù wettok yai ailon tawonnan pe iwenasak kon pùikattàppù ya eke pe. ₂₈Masapùla meluntà pe yeippàttok tùuya ke Jew yamùk yentaikappù ya ayupo tukkan kon teipàsse, Katù Maimu yapai Jesus wechi Christ pe yekama pe.