Wema'nà Akkwa Yau
1Katù munkà yamùk i'nùn ton pe kulu ewechi kon pàk, ikasa ettàk kon 2uchi'nùnmantok ewemattok yau nechii, Christ uya kù'nùnmappù kon molopai iwettùlùppù kùponalok kon pe kasa, wakù pe tùkà'nùnsen tùtùsen Katù yauchinpanài pe kasa.
3Tùse Katù ponalok kon, esukenan kon pe ewechi kon pàk, àli imakuyippù kuttok esak ke molopai tamù'nawolon àli, ànù'là yemamin iche we'nàtok kùsettak àkklottau'nokon. Sàlà yekkwa ton winàpai mettàik. Màlà yekkwa pe là uselupan kùsettak. 4Ikasa pùla nàlà àli pe uselupantok, pakko pe àli mayin yapulàtok, àli pe wo'mattantok wechi màlà, màlàpàk kùsapulàtàu. Tùse làkku tenki katàk kon Katù pàk. 5Masapùla sàlà mùttuyatàik: ànù'là màlà yamùk ku'nài wapùla tùuseka'nonkasen uya yà'làlà yepolo pen màlà Christ molopai Katù winàpai, masapùla ànù'là yemamin iche we'nàtok wechi màlà weppeimantok itemlotopo pe.
6Ànù'là eyenkuttàtakù'nokon ailon pen mayin ke pakko pe: sàlà yamùk pàkànsau uchi màlà Katù we'naikatok uyàpù mùkyamlo tùmaimu yawàlà pùla nai'nannùk pona. 7Màlàpàk mùkyamlo yekkwa pokonpe kettàu. 8Amyamlo wechippù ewalupàttau màlà, tùse Itepulu Katù ponalok kon kappon yamùk pe ewenasak kon pàk akkwa yau ewechi kon màlà. Màlàpàk uchi emattàk kon kappon yamùk akkwa yau tùwemassan kasa. 9Masapùla akkwa màlà eke pe kulu tamù'nawolon yà'là yekkwa là ku'nài wakù pe we'nàtok, ikasa we'nàtok, molopai ailon. 10Màlà Itepulu Katù yauchinpanài iwakùli ittuiche ettàk kon. 11Àli ku'nài nan kappon yamùk pùkkù pe kettàu, màlà yamùk ewalupà ponalok kon. Tùse làkku pùsamlo pàk ikasa pùla tok wechi yekamatàk kon. 12Sàlà yamùk tok nùkussai'nùk amak yai tonantau kuli'mak man yekama yentai kulu. 13Tùse tamù'nawolon akkwa nùweyuttàppù màlà yà'là kasa là iwechi tensen. 14Masapùla akkwa màlà tamù'nawolon yà'làlà weyuttànài yentoppe. Màlàpàk, “Apakakà tùwe'nùnsen, e'wuluukakà weli'nàtok yapai! Molopai Christ uya màlà eweyuttà ,” tesak màlà.
15Màlàpàk tùttuik kulu emattàk kon. Ittunnan pen kappon yamùk kasa kemattàu, tùse làkku pukkek ton kasa emattàk kon. 16Tamù'nawolon eweyu yapulàtàk kon pukkek pe tùttuik, masapùla sàlà wei yamùk màlà àliton. 17Pakko pe uchi kettàu, tùse Itepulu Jesus wettok ikupù auya'nokon iche ittuiche ettàk kon.
18Meluntà tinchisen ke ketùntàu, amattanùpù kon ya neken màlà. Tùse làkku Wakù Akkwalù ke anùttàk kon. 19Àtonpa kon pokonpe eselupatàk kon David yelemu maimu yau, elen yamùk Wakù Akkwalù winàpaino yekkwa ton pàk eselenpatàk kon Katù winàkàik, yapulàtok itewan yau echii'ma. 20Tàwàlàlà tenki katàk kon tamù'nawolon pàk Katù Kùkàipùnù kon pàk, Kùyepulu kon Jesus Christ yesek yau. 21Àtonpa kon yo'no echittutàk kon ànùk yentai pùla, Christ namatok auya'nokon yau.
Tùtayappù Kenan kon Molopai Tùnoppù Kenan kon
22Tùtayappù kenan kon, atayappù kon yentai kettàu, Itepulu yemyau ewechi kon kasa. 23Masapùla tùnoppù kenan mùkkàlà tapàikketù kenan tùnoppù yepoi Christ wechi tapàikketù ke sochi tawon kon yepoi kasa. Molopai tok pùikattànài mùkkàlà, itesak mùkyamlo. 24Màlàpàk uchi tùtayappù kenan kon nàlà tùtayappù kon yentai pùla nechii yà'là yekwa là motau, sochi wechi Christ yemyau kasa kulu.
25Tùnoppù kenan kon, ànoppù kon i'nùnmatàk kon Christ uya sochi pùnùnmappù molopai iwettùlùppù tok ponaloppe kasa. 26Sochi konekappù ya màlà wakù pe tùmaimu yapàikettù winà, molopai wakù pe ikonekappù ya ikolùka tùuya tuna ke winà. 27Christ uya màlà sàlà kupùppù Sochi, konekatoppe tùuya tùponaloppe, tamù'nawàlà wakù pe, molopai yà'làlà iwalai pen pùla, ikopposak pùla molopai ikosokkoso'masak pe pùla, tamù'nawàlà wakù pe. 28Màlà kasa làma tàwà tùnoppù kenan kon tùnoppù kon pùnùnmai tùuchi'nùnma kon kasa. Tùnoppù pùnùnmanài mùkkàlà tùyiwalà tùuchi'nùnmasen. 29Ànù'là tewanma pe tùpun ku'nài pùn. Tùse tùusewessen làkku mùkkàlà molopai tùwemainanpasen, Christ uya sochi kupù kasa kulu. 30Masapùla kùmyamlo wechi màlà itesak pùkkù pe. 31Katù Maimu uya wate kasa, “Sàlà wenai kàyik uya tùkàipùnù molopai tùsan nàmà màlà, molopai tùnoppù pùkkù pe iwena, molopai pùsamlo asa'lon kon wena màlà tewin, ” te kasa. 32Sàlà màlà eke kulu ailon ittusak lùppù pen, tùse yenpoikasak uselupayaik Christ molopai sochi pàk. 33Tùse tàwà tamù'nawolon kon tùnoppù kenan kon tùnoppù kon pùnùnmai tùuchi'nùnma kon kasa, molopai tàwà tamù'nawolon kon tùtayappù kenan kon tùtayappù kon namai.
