Hebrews 9

₁Wapiyalok Katù wekkutok ikupù pàk wechippù nàlà Katù yapulàtok yau, yawàlà we'nàtok yesappe molopai màlà kasa làma Katù yùwùk wechi màlà tùnamasen pe sàlà non po. ₂Sàlà tappulin tau iwakkàsak wechippù màlà asa'là patassek. Wapiyalok màlà 'Wakù Patassek' tukaik tesassen, màlà tau lanppu yapon, kùyali yapon, molopai pùlomù pusak yamùk Katù yemyak itùsak lùssan wechippù. ₃Iwakkàttukkatok yappowinà patassek wechippù màlà 'Wakù Kulu Patassek' tukaik tesassen. ₄Sàlà patassek yau appoi'nan pottàtok ipo yapon wechippù kolù pe. Molopai Katù wekkutok ikupù pàk yen kolù ke ipippàttàsak. Sàlà yamùk wechippù màlà yau, kolù yapai ikonekasak àinà yawon manna, Aaron tekessemu iwenutasak tale ke lùppù, molopai asa'lon tàk Katù winàpaino Law menukasak ipàk. ₅Màlà yepoi inchelù walai non cherubim yamùk wechippù màlà tapàli ke'ne, Katù wechi eke pe yekamannan. Tok yapàli utalenkasak wechippù màlà àli kuttok pàk usentuppantok patassek yepoi. Tùse tamù'nawàlà sàlà yamùk yekama ina uya pen sàlà, sàlà pe.

₆Sàlà kasaichi tamù'nawolon wekkupùppù màlà. paatele yamùk utàpàtùppù wapiyalok patassek yak wei kaichalà tùwotokoyi kon kusse. ₇Tùse eke kulu neken paatele utàpàtùppù màlà yakon patassek yak, molopai tewin itekkwa tùutàsen pe iwechippù kilichimochi yau, mùn pùla tùwewonsen pe pùla iwechippù. Kamo mùnù yanài pe iwechippù tùntùlù pe tùmakuyi ponaloppe molopai kappon yamùk makuyi ittui'ma pùla tok nùkupùppù ponaloppe. ₈Wakù Akkwalù uya yenpoikappù sàlà winà wapiyalok Katù yùwùk wechi molo lùppù pàk, Wakù Kulu Patassek ye'ma wechi lùppù takkose. ₉Sàlà nàlà màlà sàlà pe nai'nùk yekamanài. Lepantok tùsak molopai kamo wàsak tùsak Katù yemyak kappon yamùk makuyi ponaloppe uya là Katù yapulànnan yewan koneka wakù pe pen màlà. ₁₀Sàlà yamùk màlà tùkussan kùyali molopai tinchisen ke molopai tùpatalo'nan wekolùkantok ke. Kappon yamùk uya sàlà wema'nàtok yawà kupùppù màlà, emennak molopai wakù kulu ke imyakanma weyu uyapù ponalà.

₁₁Tùse Christ uyàpùppù man eke kulu paatele pe, wakù ton iyàssak nai'nannùk yepulu pe. Tappulin iwe'wotokomatok itau màlà penalok yentaino, molopai wakù kulu, kappon yamùk nùkonekappù pen. Ikonekasak pùkkù pe pùla iwechi sàlà wolù yau. ₁₂Itak iwewomùppù màlà tùmùnù winà. Kaapala mùnù molopai paka mule mùnù winà pùla. Tùse iwewomùppù màlà Wakù Kulu Patassek yak tewin itekkwa neken tamù'nawolon kon ponaloppe, tùmàlà pe là tàwàlàlà wepùikattàntok yepoloppù ya màlà kùponalok kon pe. ₁₃Kaapala mùnù molopai walawok paka mùnù molopai ulichan paka mule pottàsak ulumlàppàyi tùlùppù màlà kappon yamùk polo, wekolùkan toppe uselumantok walai yapai. ₁₄Màlà yentai Christ mùnù wechi màlà apàikkeppe! Tàwàlàlà tùwemassen Wakù Akkwalù yai iwettùlùppù màlà wakù kulu imattakù pùn tùtùsen pe Katù yemyak, kùmakuyi kon yepeppe. Imùnù uya usenumenkantok kù'nokon ma màlà wakù pe tapulàsen pen wotoko winàpai, tàwàlàlà tùwemassen Katù ponaloppe we'wotokoman toppe.

₁₅Sàlà wenai Christ wechi màlà Katù molopai kappon tawonnan yakkletau tùwessen pe, emennak ikupù pàk Katù wekkuttok yau. Mùkkyamlo ikà'masak kon uya tàwàlàlà pùlemantok yepotoppe, ikupù tùuya teppù Katù uya lùppù. Sàlà wekkupùppù màlà, masapùla Jesus welikùppù màlà wapiyalok ikupù pàk Katù wekkupùppù lùppù yo'no kappon yamuk nùkupùppù tok makuyi winàpai tok pùikattàtoppe tùuya.

₁₆Kappon uya kaleta menukasak tùtonpa yamùk yemyak tùtùsen pe tùse, ànù'là yà'làlà yeponài pen, kappon sàlà ku'nàippù welikù ponalà. ₁₇Masapùla màlà ikaletayi inmenukappù wechi màlà tapulàsen pe pùla imenukanàippù wechi lùppù nulà tùse. Iwelikùppù yau neken yapulà. ₁₈Màlàpàk uchi wapiyalok ikupù pàk Katù wekkutok tùmàlà molopai kappon yamùk yakkletau wechippù màlà mùn yapulàtok iwinà pe neken. ₁₉Moses uya tamù'nawolon enupantok Law yau imenukasak yekamappù màlà kappon yamùk pàk. Màlàyau nen uchi paka munkà yamùk mùnù yanùmùppù ya màlà tuna pokonpe, molopai Enupantok yapon yappasa'mappù ya molopai kappon yamùk nàlà. Sàlà kupùppù ya màlà yei muleppù panta “hyssop” itesek molopai ichuweyu kalinilu pùpok ke yaulonsak yei pàk, ke. ₂₀Màlàyau, “Sàlà màlà mùn Katù wekkuttok ikupù pàk tùmàlà molopai kappon yamùk yakkletau yekamanài. Yawàlà ewechi kon pa eyekamappoppù kon ya lùppù,” teppù ya tok pàk. ₂₁Màlà kasa làma mùn ke tappulin polo yappasa'mappù ya molopai tamù'nawolon tapulàsen Katù namatok molopai yapulàtok yau polo. ₂₂Ailon pe iwechi màlà, Law yau, tamù'nawolon lùiwa lànen konekappù màlà wakù pe mùn ke yappasa'ma winà. Molopai mùn tùkkwanse pùla àli kuttok pàk usentupantok pùlà iwechippù màlà.

₂₃Sàlà non pon yamùk wechi neken màlà epùn pon kon nai'nùk kasa. Màlàpàk kamo tùwàse tùtùsen pe iwechippù màlà. Tùse màlà yamùk epùn yawon kon wechi màlà wakùiwa tùtùsen iche. ₂₄Masapùla Christ utàppù màlà Katù yùwùk kappon yamùk nùkonekappù pen yak molopai epùn pon kasa neken nà nai'nùk pen. Iitàppù màlà epùn pona molopai sàlà pe nen uchi Katù piyau iwechi màlà kùpùikattàtok kon pe tùuya. ₂₅Molopai Christ utàpàtùppù tukke itekkwa ettùse pen, eke kulu paatele utà Wakù Kulu Patassek yak kilichimochi kaichalà kamo mùnù pokonpe kasa. ₂₆Màlà kasa iwechi yau, iwettalumattàppù sàlà epaino tukke itekkwa wolù wekonekappù motapai. Tùse làkku ichenpoikappù màlà tewin itekkwa neken, màlà wei wenukattok yattai tùwettùlù winà kappon yamùk makuyi winàpai tok pùikattàse. _27-28Tamù'nawolon kon welikù màlà tewin itekkwa, molopai màlà ye'mappùtak Katù uya tamù'nawolon kon ittu màlà. Màlà kasa làma, Christ wettùlùppù màlà tùwelitoppe tewin itekkwa tukkan kon kappon yamùk makuyi ponaloppe. Yakon itekkwa pe ichenpoika tu'ma màlà kappon yamùk makuyi pàkànsau pùla. Tùse wepùikattàntok nepù ya màlà mùkyamlo tùmàmu'nài nan kulu ponaloppe.