James 5

₁Molopai uchi amyamlo temamin kenan kon kappon yamùk kùyetatàk kon! Àpokoitatàk kon molopai akalantàk kon eke pe talumattàntok nùyàsai'nùk àpona'nokon pàkànsau. ₂Eyemamin kon itesappe ewettok kon wa'motasak man molopai àpon kon kilicholok kasa nai'nùk nanùppù pe man. ₃Kolù molopai chilùpa itesappe ewettok kon wenasak man iklùn pe, molopai sàlà wechi màlà tùuselupasen pe ewinàkàik molopai àpun kon yanù màlà sàlà yamùk uya apok kasa. Mamin pilichak auya'nokon man sàlà yattai iwenukapù pe. ₄Kappon yamùk, tùwe'wotokomasan à'mà kon yau ye'mappù auya'nokon pùla man. Tok usàulàmaichi yetatàk kon! Molopai mùkyamlo ànpàmàppù kon pili'nài nan kalantok uya, Itepulu, Mùkkàlà neken Meluntà pana yeposak man. ₅Talù ewematok kon wechippù man wakù pe tùuseka'nonkaik molopai tùutauchinpaik. Kaiwan pe ewenasak kon man wàntok weyu yattaino pe. ₆Wakù yà'làlà àli ku'nàippù pen kappon talumattàsak auya'nokon man molopai iwàsak auya'nokon molopai ichi'nùnma là pùn apanta'ma kon ya pùn.

₇Kesetakkatàu uchi imàmuttàk kon ipàlikatàk utonpa yamùk, Itepulu uyàpù ponalà. Imasa yentàk kon yà'là kasa là umà pànnài wechi tùusetakkaik pùla tùnpàmàppù umla molopai iwepeta màmuku pàk. Konok màmu'nài mùkkàlà, wapiyalok molopai emennùppù tùuyàssen konok màmu'nài. ₈Molopai amyamlo nàlà tùusetakkaik pùla àpàlikatàk kon! Enpen ewettok kon i'napailà meluntà pe nechii, masapùla Itepulu uyàttok wechi mei pùla pàk.

₉Kàsàulàmatàu àtonpa kon winàkàik, utonpa yamùk, atalumattà kon tukaik. Talumattànài mei pùla man, iwekonekasak tùusenpoikatoppe. ₁₀Utonpa yamùk, Katù Maimu yenpoikannannùsan Itepulu yesek yau ittutàk kon. Eyenu kon yappolù pe tok nechii. Tùusetakkaik pùla tok wechippù tùwettalumattàtok kon yawàlà lànen kan. ₁₁Tùutauchinpasan tukaik tok yesa'nàinan kùmyamlo masapùla tok uya pàlikansak pàk. Job uya pàlikantok yetappù auya'nokon, molopai mùttuyatàik Itepulu uya Job pùikattàppù iwenukapù pe. Masapùla Itepulu Katù mùkkàlà usentuppantok yesak eke pe.

₁₂Tùse tamù'nawolon yentai, utonpa yamùk, “Ikupù uya màlà,” te auya'nokon yau, wa kùkatàu “epùn yesek là tesasse”, wapùla “non yesek là”, wapùla yà'làlà winà. “Ewaik”mùkatàik, “ewaik” te auya pe iwechi yau, wapùla “Kane” mùkatàik “kane” te auya pe iwechi yau màlà kasa neken iwechi yau, Katù uya talumattàntok yo'no ewechi kon tukaik.

₁₃Ànù'là na' molo nai àkklotau'nokon tùwettalumattàsen? Tàwà nàpùlemai. Ànù'là na' nùtauchinpayan àkklottau'nokon? Tàwà nùselenpai Katù yapulà pe. ₁₄Ànù'là na' molo nai e'nek àkklottau'nokon? Tàwà sochi yennài nan kà'mai, tùpona tok wàpùlematoppe e'nek uchipitttàtoppe molopai kalapa ke tùkalapaimatoppe tok uya Itepulu yesek yau. ₁₅Sàlà wàpùlemantok ailon tetok yau ikussak uya, e'nek kappon pùikattà màlà: Itepulu uya iwuluuka màlà molopai e'neppe pùla iwechi, molopai iwemakuimasak yau, usentupantok yepolo ya màlà. ₁₆Màlàpàk amakuyi kon yekamatàk kon àtonpa kon pàk, molopai àpùlematàk kon àtonpa kon pona, euchipittà kon pa. Masapùla wakù iwalai kappon wàpùlematok màlà meluntà pe apàikkeppe tùwe'wotokomasen. ₁₇Elijah wechippù màlà kappon pe kùkasa'nokon. Iwàpùlemappù i'napailà kulu konok pùla iwettoppe, molopai konok utappù pen 3 pe kilichimochi, molopai 6 pe kapùi ipona. ₁₈Molopai iwàpùlemappù tu'ma, molopai kak utakkokappù màlàyau konok utappù, non uya yà'làlà ipànsak lùppù yumlanùpùppù molopai yepetanùpùppù ya.

₁₉Utonpa yamùk! Tewin nà àkklottawon kon utatù ailon, iwalai winàpai, molopai tùulon kon uya inettu'ma yau, ₂₀sàlà mùttutàik: Ànù'là tùmakuyi yawon lattànài ikasa pùla iwettok winàpai uya mùkkàlà àli makui ku'nài yakkwalù pùikattà màlà weli'nàtok winàpai, molopai tukkan tok makuyi pàk usentupan màlà.