John 10

₁“Ailon kulu sàlà,” teppù Jesus uya. “Mùkkàlà kalinilu yamùk kulalayi mùlatta yai pùla newonyai'nùk, tùse nekainùnyai'nùk tùulon yailà, mùkkàlà amak molopai lapumanài. ₂Tùse mùkkàlà manatta yai newonyai'nùk, mùkkàlà kalinilu yamùk yesak. ₃Manatta yennài mùkkàlà yakkokanài kalinilu yamùk yesak yemyak. Molopai kalinilu yamùk mùkyamlo imaimu yetannan, tùponalok kon kà'manài mùkkàlà tok yesek pàkù'ne, molopai tok yalà ya. ₄Tùkùnnon yenpakasak tùuya yau tok wapiya tùutàsen mùkkàlà. Molopai kalinilu yamùk mùkyamlo iwenaimannan, masapùla imaimu ittu tùuya'nokon pàk. ₅Toto ya'là tok utà pen, tùse tok wepe iwinàpai, masapùla imaimu ittu tùuya'nokon pùla iwechi pàk,” teppù Jesus uya.

₆Sàlà ittutok ipàkàlà yekamappù Jesus uya tok pàk, tùse tok uya ittu pùla iwechippù.

₇Màlàyau Jesus uya tu'ma tok pàk, “Ailon kulu sàlà. Iulà mùkkàlà kalinilu yamùk kulalayi mùlatta. ₈Tamù'nawolon kon uwapiya iyàssak kon wechippù màlà amak ton molopai lapumannan pe. Tùse kalinilu yamùk uya màlà tok maimu yetappù pen. ₉Manatta Iulà. Ànù'là uyai tùwewonsen, mùkkàlà wepùikattà màlà. Iwewomù màlà molopai iwepakka teipa yepose. ₁₀Amak uyàpù màlà amak pe esse, wànse, molopai mattanù'nàse. Uyàssak sàlà wema'nàtok yesappe tok wettoppe, eke pe itesak pe tok wettoppe.

₁₁“Iulà mùkkàlà wakù kalinilu yamùk yesak. Wakù kalinilu yamùk yesak tùwemattok tùnài kalinilu yamùk ponaloppe. ₁₂Tùse mùkkàlà te'manài ke nai'nùk, tùkùnnon pen kalinilu yamùk yesappe tùwessen, wepe màlà kalinilu yamùk winàpai àsà ene uyàpù yene tùuya yau. Màlà yattai tok yachi ya màlà molopai tok ta'nùpù ya. ₁₃Mùkkàlà kàyik tùwepesen masapùla te'masen pe neken tùwechi pàk, molopai kalinilu yamùk pùnùnmanài pen mùkkàlà. ₁₄Iulà mùkkàlà wakù kalinilu yamùk yesak. Uyùkùnnon tùttuyaik molopai uyittunnan mùkyamlo. ₁₅Molopai ukàipùnù uya uyittu kasa nàlà ukàipùnù tùttuyaik. Molopai wematok tùlù uya màlà kalinilu yamùk ponaloppe. ₁₆Molo tùulon kon kalinilu yamùk uponalok kon man sàlà kulala tau pùla. Mùkyamlo nàlà nepù uya màlà, tok uya umaimu yeta màlà, molopai tewin ipata tok wechi molopai tewin itesak.

₁₇“Ukàipùnù uya u'nùnma màlà, masapùla wemattok tùlù uya pàk, molopai yanùntu'matoppe uya. ₁₈Ànù'là uya wemattok mokka uwinàpai pen, tùse uyiwalà itùnài Iulà. Uyiwalà itùtok uya yapàikketù yesak Iulà molopai yanùntu'matok uya yapàikketù yesak. Sàlà kasa ewechi màlà tetok yeposak uya màlà Ukàipùnù winàpai,” teppù.

₁₉Jew yamùk usenumenkatukkappù tùpatalà'ne, watesak Jesus uya pàk. ₂₀Tukkan kon uya, “Àli akkwalù yesappe iwechi màlà molopai iitayaupa màlà! Yà'là pe iwechi pàk yeta auya'nokon màlà?” teppù. ₂₁Tùse tùulon kon uya, “Àli akkwalù yesak winàpaino pen sàlà mayin! Yà'là kasa ken àli akkwalù uya enpùn yenu yakkoka?” teppù.

₂₂Katù yùwùk kolùkappù lùppù yattai pàk Uta'lettàn weyu yattai iwenappù màlà Jerusalem po, iko pe iwechippù. ₂₃Jesus usalàppù Katù yùwùk yawàlà Solomon patassek itesek yawà. ₂₄Màlàyau Jew yamùk wepilipùppù iwoi molopai tok uya ipàk, “Yà'là pàkàlà làichi ina uya ittutok pùla ikupù auya màlà? Christ pe ewechi yau, wakù pe ina pàk yekamakà,” teppù. ₂₅Jesus uya tok maimu yeikuppù, “Tekamaikuichi àpàkù'nokon tà, tùse ailon te auya'nokon pùn. Uwotokoyi tùkussai'nùk Ukàipùnù yesek yai, màlà yamùk uya uyekama màlà. ₂₆Tùse ailon te auya'nokon pùla man, masapùla uyùkùnnon kalinilu yamùk pe pùla ewechi kon pàk. ₂₇Uyùkùnnon mùkyamlo umaimu yetannan, tok tùttuyaik. Molopai uwenaimannan mùkyamlo. ₂₈Tok lepa uya màlà tàwàlàlà wema'nàtok ke, tok umatta pen. Molopai ànù'là uya tok mokka uyemyapai pen màlà. ₂₉Ukàipùnù, uyemyak tok tùnàippù mùkkàlà tamù'nawolon yentaino, molopai ànù'là uya tok mokka Ukàipùnù yemyapai pen màlà. ₃₀Ukàipùnù molopai Iulà tawonnan mùkyamlo tewinan,” teppù Jesus uya.

₃₁Màlàyau Jew yamùk uya tàk yanùnpàttukkappù iwàtoppe tùuya'nokon ike. ₃₂Jesus uya tok pàk, “Tukke eke ton wotoko yamùk Ukàipùnù winàpaino yenpoikasak uya man eyemyakù'nokon. I'nai kulu sàlà yamùk wenai uwàpai ewechi kon nai'nùk?” teppù. ₃₃Jew yamùk uya imaimu yeikuppù, “Eke wotoko kupù auya wenai ina wechi tàk ke àwàpai pen nai'nùk, tùse Katù talumattàpe meselupayai'nùk wenai. Masapùla kappon neken àmàlà, tùse Katù pe tukaik ewekkupù,” tukaik. ₃₄Jesus uya tok maimu yeikuppù, “Àmàlà' nokon Law yau uchi iwe'menukasak pùla nai, ‘katù yamùk amyamlo teppù uya?’ tukaik. ₃₅“Ittu'nokon man Katù Maimu yau iwe'menukasak wechi ailon pe tàwàlàlà. Molopai tok yesatùppù ya, ‘katù yamùk,’ tukaik, mùkyamlo Katù Maimu wettùlùppù itemyak lùssan. ₃₆Katù uya uyanùnsak sàlà tùwotokoyi ku'nài pe, molopai uyeunossak ya sàlà non pona. Yà'là pe ken iwechi pàk, ‘Katù mùmotùnpayaik,’ te auya'nokon màlà masapùla, ‘Katù Mumu Iulà,’ te uya pàk? ₃₇Ukàipùnù wotokoyi kupù uya pùla iwechi yau, ailon kùkatàu upàk. ₃₈Tùse iwotokoyi kupù uya yau, ailon te auya'nokon upàk pùla là tùse, eke ton wotoko kupù uya pàk ailon katàk, Ukàipùnù wechi uyau yene kon pa molopai nàlà Ukàipùnù yau wechi ittukonpa,” tukaik.

₃₉Tok wechippù tukka yachiiche, tùse iwepeppù tok uya yachi pùla.

₄₀Màlàyau Jesus wennappotu'mappù Jordan latoi pona, màlà patassek wapiya kulu John uya enpatauka'nàppà motak, molopai molo iwechippù. ₄₁Tukkan kon kappon yamùk uyàpùppù ipyak, molopai tok uya, “John uya ittutok ipàkàlà kupù pùn, tùse tamù'nawolon John uselupappù lùppù, pùsàlà kàyik pàk wechi màlà ailon pe,” teppù. ₄₂Molopai tukkan kon uya ailon teppù Jesus pàk màlà pata yau.