John 16

₁“Sàlà yamùk yekama uya sàlà àpàkù'nokon ewelattà kon uwinàpai tukaik. ₂Tok uya eyenpakka kon màlà Jew yamùk wepilittok itak yamùk tapai. Wei nùyàssan ànù'là àwànài'nokon uya Katù ponaloppe tùwe'wotokoma kon pe tok uya yekama màlà. ₃Sàlà yamùk kupù màlà tok uya, masapùla Ukàipùnù wapùla Iulà ittu tùuya'nokon pùla iwechi pàk. ₄Sàlà yekamappù uya àpàkù'nokon, iweyu uyàssak yau ittu kon pa, màlà yamùk àpàkù'nokon unekamapù lùssan, sàlà yamùk yekama uya pùn àpàkù'nokon wapiya masapùla apyau'nokon wechi pàk.” teppù Jesus uya.

₅“Tùse utà sàlà mùkkàlà uyeuno'nàippù piyak. Tùse ànù'là amyamlo uya i'nai yailà là utà yekamappo pùn. ₆Mesewankono'mayatàik kulu masapùla sàlà yamùk yekamasak uya àpàkù'nokon pàk. ₇Tùse ailon kulu sàlà. Wakù wekkuttoppe àponalok kon pe utà sàlà. Utà pùla iwessak yau, Àpùikattànài'nokon uyàpù apyakù'nokon pen. Tùse utàsak yau yeunoko uya màlà apyakù'nokon. ₈Tùuyàssak yau mùkkàlà uya màlà sàlà wolù yawon kon makuyi yenpoika, ikasa we'nàtok, molopai nàlà Katù uya talumattàntok. ₉Tok makuyi yenpoikaya màlà, masapùla ailon te tok uya upàk pùla iwechi pàk. ₁₀Tok usenumenkatok iwalai pen yenpoika ya màlà, masapùla Ukàipùnù piyak utà pàk molopai tok uya uyene pen nen uchi màlà. ₁₁Tok usenumenkatok ikasa pùla man talumattàntok pàk, masapùla sàlà wolù yepulu talumattàsak pàk.

₁₂“Tukke lùppù àpàkù'nokon unekama molo man, tùse yanùmù auya'nokon yeselùkek pùla man sàlà pe. ₁₃Tùse mùkkàlà Ailon Akkwalù uyàssak yau, ayalà kon ya màlà tamù'nawolon ailon yawàlà. Tùyiwalà ichelupa pen màlà, tùse yà'làlà tùneta yekama ya màlà. Molopai yà'làlà tùuyàpù woton yekama ya màlà àpàkù'nokon. ₁₄Mùkkàlà uya màlà uyapulàtok nepù uponalok yalà tùuya molopai yenpoika tùuya àpàkù'nokon winà. ₁₅Tamù'nawolon Ukàipùnù itesak pe nai'nùk màlà uponalok. Màlàpàk uchi Akkwalù uya màlà uselupatok yalà molopai yekama ya àpàkù'nokon, te uya nettai nùk,” teppù Jesus uya.

₁₆“Malalà tùpo uyene auya'nokon pen màlà, molopai malalà tùpo tu'ma uyene auya'nokon,” teppù Jesus uya. ₁₇Màlàyau Jesus nenupa ton tonpa uya tùtonpa kon pàk, “Yà'là te ya uya ken uchi màlà, ‘Malalà tùpo uyene auya'nokon pen màlà, molopai malalà tùpo tu'ma uyene auya'nokon,’ te. Molopai ‘masapùla Ukàipùnù piyak utà pàk?’ te ya,” teppù. ₁₈“Yà'là te ya ken uchi màlà ‘Malalà tùpo nùkayai'nùk? Ittu'nokon pùla man yà'là pàk là iichelupa,” teppù tok uya. ₁₉Jesus uya màlà sàlà pàk tok wechi tekamappopai yeneppù, màlàpàk tok pàk, “Àtonpa kon uchi mekamappoyatàu, yà'là teuya ‘Malalà tùpo uyene auya'nokon pen, molopai malalà tùpo tu'ma uyene auya'nokon,’ te uya pàk? ₂₀“Ailon kulu sàlà, akalawù kon màlà molopai eusewankono'ma kon, tùse wolù yawon kon utauchinpa màlà. Tùusewankono'maik ewechi kon màlà, tùse eusewankono'matok kon welattà màlà utauchinpantok pe. ₂₁Nossan mùkkàlà tùwentu yau e'nek pe tùwessen, masapùla tùweyu uyàssak pàk. Tùse mule yenpakkakassak tùuya yau e'nek pe tùwechippù puttàka'nù'nài, masapùla mule wentusak wolù yak pàk tùutauchinpa pàk. ₂₂Màlà kasa là sàlà pe eusewankono'matok kon yattai man. Tùse eyene kon uya tu'ma màlà. Molopai autauchinpa kon màlà. Molopai ànù'là uya autauchinpatok kon mokka pen màlà.

₂₃“Molopai màlà wei uyàssak yau uyekamappo auya'nokon yà'làlà pàk pen màlà. Ailon kulu sàlà, yà'làlà yekamappo auya'nokon Ukàipùnù pàk uyesek yai yau, elepa kon ya màlà. ₂₄Sàlà tepose yà'là là yekamapposak auya'nokon uyesek yai pùla man. Yekamappotàk kon, molopai yepolo auya'nokon màlà, molopai autauchinpatok kon wechi màlà tamù'nawàlà,” teppù Jesus uya tok pàk.

₂₅“Sàlà yamùk yekamappù uya àpàkù'nokon ittutok ipàkàlà pokon pe. Tùse wei nùyàssan sàlà kasa tu'ma uselupatok yattai pen, tùse wakù pe Ukàipùnù yekama uya màlà àpàkù'nokon. ₂₆Màlà wei yattai yekamappo auya'nokon màlà uyesek yai. Iulà pe Ukàipùnù yekamappo uya màlà àponalok kon pe te uya pen sàlà. ₂₇Ukàipùnù mùkkàlà tùmàlà pe tù'nùn pe àku'nài'nokon. Masapùla à'nùn kon pe ukussak auya'nokon pàk, molopai Katù winàpai uyàssak pàk ailon tesak auya'nokon pàk. ₂₈Ukàipùnù piyapai uyàpùppù màlà wolù yak. Sàlà yattai wolù nàmà uya sàlà molopai wennappo Ukàipùnù piyak,” teppù Jesus uya.

₂₉Màlàpàk Jesus nenupa ton uya ipàk, “Sàlà pe nen uchi wakù pe meselupayaik, ittutok ipàkàlà pùla. ₃₀Ina nen uchi nenyan tamù'nawolon ittu auya. Molopai ànù'là uya eyekamappopàtù iche pùla ewechi. Màlàpàk nen uchi ailon nùkayan ina Katù winàpaino pe ewechi pàk,” teppù. ₃₁Jesus uya tok maimu yeikuppù, “Ailon mùkapàssatàik nen uchi sàlà pe! ₃₂Tùse wei nùyàssan, molopai iyàkkassak man, ewetta'nùttok kon yattai. Ewemeippàtù kon màlà apata kon yak tewin pàk, molopai unàmà auya'nokon màlà tewincha. Tùse tewincha pùla wessaik, masapùla Ukàipùnù upyau man. ₃₃Sàlà yamùk yekamappù uya màlà àpàkù'nokon, àwàlàkatok kon yesappe ewechi kon pa uyau. Sàlà wolù yau ewettalumattà kon màlà. Tùse emeluntàtatàk kon! Wolù yentaikasak uya man,” teppù Jesus uya.