John 20

₁Ko'làma Suntayakka yattai ewalupà pe lùppù tùse Mary Magdalene utàppù uluwaik motak. Molopai tàk yamasak imùlatta poi yeneppù ya. ₂Màlàyau iitàppù aitun pe Simon Peter molopai tùulon Jesus nenupappù lùppù tu'nùn pe kulu inkupùppù piyak, molopai tok pàk, “Tok uya Itepulu mokkappù neppàssan uluwaik yapai molopai ittu'nokon pùla man i'nai yailàlà tok uya inonkappù!” teppù ya. ₃Màlàyau Peter molopai tùulon nà Jesus nenupappù utàppù uluwaik motak. ₄Asakklàma aitun pe tok utàppù, tùse tuulon nà Jesus nenupappù uya Peter yentakappù molopai iwelepamùppù uluwaik motak iwapiya. ₅Màlàyau iwepeimappù uluwaik yak yense. Linen pùkkùlùssan yeneppù ya, tùse iwewomùppù pen. ₆Màlàyau Simon Peter uyàpùppù ite'mappù pàk, iwelepamùppù molopai iwewomùppù uluwaik yak, màlàyau molo linen pùkkùlùssan yeneppù ya. ₇Molopai Jesus ippai won nùppù wechippù tùulon pon kùlottau pùla, tùse yamokko'masak wechippù tùyiwalà linen winàpai. ₈Màlàyau tùulon inenupappù lùppù, wapiya uluwaik pona elepamùppù nàlà wewomùppù, yeneppù ya molopai ailon teppù ya. ₉Tok uya ittu pùla lùppù iwechippù màlà iwe'menukasak Katù Maimu yau Jesus we'wuluukatu'matok woton tetok. ₁₀Màlàyau inenupa ton nùssan wennappoppù tùpata kon pona.

₁₁Tùse Mary wà'nàmàppù satippe polopo uluwaik piyau, tùkalawù pàk. Tùkalawùi'ma iwepeimappù, uluwaik yak tenu tùlùppù ya. ₁₂Màlàyau asa'lon kon inchelù yamùk yeneppù ya, aimu'nan ipon ton, chichiupe. Jesus yàkàpù nonkappù yau, tewin ippai wechippù winà, molopai tùulon itta wechippù winà. ₁₃Molopai tok uya Mary pàk, “Nossan, yà'là pàk makalanyan?” teppù. Màlàyau Mary uya tok pàk, “Tok uya Uyepulu yalàppù man, ittu uya pùla man i'nai yailà là tok uya inonkappù,” teppù. ₁₄Wa tei'ma iwelattàppù molopai Jesus yeneppù ya molo satippe, tùse Jesus pe ittuppù ya pen. ₁₅Jesus uya ipàk, “Nossan, yà'là pàk makalanyan? Ànùk mùwayan?” teppù. Umà yennài pe tekamaik ipàk, “Yasak auya yau, yekamakà upàk i'nai yailà là inonkappù auya, yense utàtoppe,” teppù ya. ₁₆Jesus uya “Mary” teppù, màlàyau iwelattàppù iwinàkàik molopai, “Rabboni,” teppù ya Hebrew maimu pe. Ticha, te ya pe iwechi. ₁₇Jesus uya ipàk, “Kùyachii, masapùla Ukàipùnù piyak utàppù pùla lùppù man, tùse itàkà, utonpa yamùk pàk yekamata, ‘Utà sàlà Ukàipùnù piyak molopai Àkàipùnù kon piyak, molopai Ukatùyi molopai Akatùyi kon piyak!’ ” teppù. ₁₈Màlàyau Mary Magdalene utàppù itekale yalàppù ya Jesus nenupa ton nùssan piyak, “Itepulu tenpàssaik molopai suwa tukaik uyelupai,” teppù ya tok pàk.

₁₉Màlà Suntayakka ko'manpe, Jesus nenupa ton nùssan wepilipùppù tapùi tak manatta tùmleyintàpàsse tok wechippù Jew yamùk pàk tùusenalippa kon pàk. Màlàyau Jesus uyàpùppù molopai satippe tok yakkletau iwechippù, “Wàlàkka'nàtok wechi màlà apyau'nokon,” teppù ya. ₂₀Wa te tùpo temyatù molopai tùwolo tawon yenpoikappù ya tok yemyak. Màlà yattai Itepulu yensak tùuya'nokon yau inenupa ton nùssan utauchinpappù. ₂₁Màlàyau Jesus uya tu'ma tok pàk, “Wàlàkka'nàtok wechi màlà apyau'nokon, Ukàipùnù uya uyeunossak nai'nùk kasa làma eyeunoko kon uya sàlà,” teppù. ₂₂Wa te kapù tùpo, iwe'netukkappù tok pona, molopai tok pàk, “Wakù Akkwalù yepotàk kon,” teppù ya. ₂₃“Ànù'là makuyi pàk eusentuppasak kon yau, tok pàk usentuppaka'nàsak màlà, molopai ànù'là makuyi pàk eusentuppa kon pùla iwessak yau, tok pàk usentuppansak pen màlà,” teppù Jesus uya.

₂₄Tùse Thomas, munuik tukaik tesassen tewinannà inenupa ton nùssan tonpa wechippù tok piyau pùla, Jesus uyàssak yattai. ₂₅Màlàyau tùulon kon inenupa ton nùssan uya Thomas pàk, “Itepulu yenpàssan ina,” teppù. Tùse Thomas uya tok pàk, “Itemyatù yai tuik yeutappù yensak uya pùla molopai uyemyatù yemaikasak uya yak molopai iwolo yai uyemyatù yemaikasak uya pùla iwechi yau, ailon te uya pen,” teppù.

₂₆Tewin suntayakka tùpo Jesus nenupa ton nùssan wepilittu'mappù tapùi tak, molopai Thomas wechippù nàlà tok piyau. Manatta mùleyintàpàssak tùse Jesus uyàpùppù tok kùlottak, satippe, “Wàlàka'nàtok wechi màlà apyau'nokon,” teppù ya. ₂₇Màlàyau Thomas pàk, “Eyemyatù yemaikakà sailà, molopai uyemyatù yamùk yenkà. Eyemyatù yenkakà molopai yemaikakà uwolo yai. Ailon tetok auya pùla kùsettak, tùse ailon kakkà làkku,” teppù Jesus uya ₂₈Thomas uya yeikuppù, “Uyepulu molopai Ukatùyi,” tukaik. ₂₉Jesus uya ipàk, “Thomas, uyensak neken auya pàk ailon tesak auya man. Tùutauchinpasan mùkyamlo uyenei'ma pùla ailon tawonnan,” teppù.

₃₀Molo nàlà man tukke eke wotoko Jesus nùkupùppù tùnenupa ton yemlotopo tùse sàlà kaleta yau iwe'menukasak pùla iwechi màlà. ₃₁Sàlà yamùk we'menukasak màlà ailon te kon pa Jesus wechi Christ pe molopai Katù Mumu pe pàk, molopai ailon tetok auya'nokon yai tàwàlàlà wema'nàtok yesappe ewechi kon màlà itesek yai.