Matthew 15

₁Màlàyau Pharisee yamùk tonpa yamùk molopai enupannan Law pàk, uyàpùppù màlà Jesus piyak Jerusalem poi molopai tok uya yekamappoppù. ₂“Ya'là pe ken iwechi pàk màlà aya'lon kon wechi kùtamo kon yamùk nùtùlùppù kùyemyakù'nokon enupantok maimu yawàlà pùla? Temyatù kon kukannan pen neichi mùkyamlo ko tùuta'lettà kon wapiya lù!” tukaik. ₃Jesus uya yeikuppù, “Molopai yà'là pe ken uchi iwechi pàk Katù uya enupantok maimu yawolon kon nà pen amyamlo, molopai eyiwalà'nokon neken eusenupatok kon yawàlà tùwessan? ₄Masapùla Katù uya, ‘Àkàipùnù kon molopai asan kon inamatàk kon,’ molopai, ‘Ànù'là àli pe tùkàipùnù pàk wapùla tùsan pàk tùuselupasen wànà màlà,’ teppù. ₅Tùse kappon yamùk yenupannan amyamlo. “Kappon wechi yà'làlà tùnapulà yek tùkàipùnù wapùla tùsan pùikattàtok yesappe tùse, ‘Katù ponalok sàlà,’ te ya yau, ₆tùkàipùnù nama ya pen nen uchi màlà.” Sàlà kasaichi Katù Maimu ku'nàinan amyamlo yà'là pen kasa, ewinàpaino Enupantok yawàlà ewechi kon pa,” tukaik. ₇“Tùusennakasan amyamlo! Ikasa kulu Isaiah wechippù man pena àpàkù'nokon tùuselupatok yau!

₁₀Màlàyau Jesus uya tukkan kon kappon yamùk kà'mappù tùpyak molopai tok pàk, “Yetatàk kon uchi, molopai ittutàk kon! ₁₁Màlà kappon mùtak tùutàsen màlà àli pe iku'nài pen. Tùse làkku, màlà intapai nepakkayai'nùk màlà àli pe iku'nài,” teppù ya.

₁₂Màlàyau Jesus ya'lon kon uyàpùppù ipyak molopai, “Pharisee yamùk wakùlipe pùla na' euselupasak mùttuyan?” teppù tok uya. ₁₃“Tamù'nawolon yei Ukàipùnù epùn pon nùpàmàppù pen kalaka màlà,” tukaik Jesus uya yeikuppù. ₁₄“Tàwà tok nechii. Enpùnon mùkyamlo enpùn yanàinan. Molopai enpùn uya tùulon enpùn yalà yau, asakklàma tok wepuka màlà non yakasak yak,” teppù Jesus uya. ₁₅Peter uselupappù, “Ina pàk sàlà panton nekama yekamakà,” tukaik. ₁₆Jesus uya tok pàk, “Ittuichi auya'nokon pùla lùppù kulu nai? ₁₇Ittuichi auya'nokon pùla nai? Kùyali mùta yak tùtùsen màlà lotta yak tùutàsen, molopai tùwepakkasen esak yapai. ₁₈Tùse màlà tùwepakkasen inta yai màlà tùuyàssen itewan yapai, màlà yekkwa ton màlà àli pe kappon ku'nài. ₁₉Masapùla itewan yapai àli pe usenumenkantok uyàpù màlà, wàntoppe ya iku'nài, tùulon noppù pokonpe iwettoppe, molopai tùulon kon àli ton imakuyichan kuttoppe ya tesak ke, amappe iwettoppe, molopai kasei pe molopai àli pe ichelupatoppe tùulon kon pàk. ₂₀Sàlà yamùk uchi màlà kappon ku'nài àli pe. Tùse uta'lettàn mùyak tùkukase pùla uya kappon kupù àli pe pen màlà.”

₂₁!Jesus uya màlà pata nàmàppù molopai iitàppù pata Tyre molopai Sidon tawon piyawon yak. ₂₂Canaan pon nossan màlà pata yau tùwemassen uyàpùppù màlà ipyak, “Uyepulu, David Mumu, upàk tàwà esentuppakà! Uyema'nomù yau àli akkwalù man molopai àsà pe kulu man,” teppù ya. ₂₃Tùse Jesus uya yà'là teppù ipàk pen màlà. Ya'lon kon uyàpùppù ipyak molopai ipawanattàppù tok uya, “Yeunokà! Kùwenaimayan molopai eke pe nentaimepàssan!” tukaik. ₂₄Màlàyau Jesus uya yeikuppù, “Yeunossak Iulà iitassak kon kalinilu yamùk Israel pon kon kappon yamùk piyak neken,” tukaik. ₂₅Màlà yattai nossan uyàpùppù molopai iwepeimappù Jesus pùta piyau. “Kùpùikattàkà, Uyepulu!” teppù ya. ₂₆Jesus uya yeikuppù, “Ikasa pùla màlà mule yamùk yeipa yanùmù molopai a'a yamùk yemyak itùlù wechi,” tukaik. ₂₇“Ailon màlà, Uyepulu, tùse a'a yamùk lànen iwà'nànsak lùppù wepukasak tesak yeipa yapon poi na'nài!” teppù ya. ₂₈Màlàyau Jesus uya yeikuppù, “Meluntà ailon tetok ya àmàlà, nossan! Iche ewettok wekkupù màlà àponaloppe,” tukaik. Molopai màlà yattai kulu itema'nomù uchipittàppù màlà.

₂₉Jesus uya màlà pata nàmàppù molopai iitàppù Galilee pon palau yawàlà. Iwenukuppù ikklù pona molopai iweleutappù molo. ₃₀Tukke kappon yamùk uyàpùppù màlà ipyak. Tùusasan pen, enpùnon, sesenpan kon nà nepùppù tok uya. Tùuselupasen pen nà. Molopai tukke tùulon kon e'netton nepùppù tok uya. Molopai Jesus pùta piyak tok nonkappù tok uya, molopai tok ipittàppù ya. ₃₁Kappon yamùk usenumenkasak wechippù màlà tùuselupasen pen uselupa yene tùuya'nokon yau, sesenpan uchipittàsak pàk, tùusasen pen usalà pàk, molopai enpùnon uya yene pàk. Molopai Israel Katùyi yapulàppù tok uya.

₃₂Jesus uya màlà ta'lon kon kà'mappù tùpyak molopai, “Usentuppayaik pùsamlo kappon yamùk pàk, masapùla upyau tok wessak man àsolùwau wei molopai tok nùnapù woton pùla man. Molopai tok tewesse pùla tok eneunoppai pùla wessaik, masapùla nen yattai pùla tok wenpulumanpàtù te'ma kon tau,” teppù ya. ₃₃Ya'lon kon uya yekamappoppù, “I'nailà ken uchi sàlà wontaik yau kùyali yepolo ina uya, pùsamlo tukkan kon kappon yamùk yewettoppe?” tukaik. ₃₄“Yà'là kaichalà ken uchi pùlomù pusak yesappe messatàu?” tukaik Jesus uya tok yekamappoppù. “7 pe man molopai molok yamùk lùkkwà tukke pùla,” tukaik tok uya yeikuppù. ₃₅Màlàyau Jesus uya kappon yamùk weleutatoppe non pona yekamappù. ₃₆Màlàyau 7 pan pùlomù pusak molopai molok tawon yanùmùppù ya, tenki teppù ya, molopai nen uchi ipilipàtùppù ya, molopai ta'lon kon yemyak itùlùppù ya. Molopai ya'lon kon uya kappon yamùk yemyak itùpàtùppù. ₃₇Tamù'nawolon kon uta'lettàppù màlà iche tùwettok kon yawàlà. Jesus ya'lon kon uya iwà'nànsak lùppù yanukuppù màlà 7 pe walicha yamùk tanùkkapàsse. ₃₈Kàyik yamùk iita'lettàsak kon wechippù màlà tukke 4000 pe, tùse nossan yamùk molopai mule yamùk pokonpe pùla tok ittusak. ₃₉Màlàyau nen uchi Jesus uya kappon yamùk yeunokoppù màlà, iwenukuppù kanau yak, molopai iitàppù Magadan yawolon pata pona.