Matthew 24

₁Jesus utàppù màlà molopai Katù yùwùk nàmà ya yau, ya'lon kon uyàpùppù màlà ipyak Katù yùwùk pàk yelupase. ₂“Tamù'nawàlàichi sà yamùk menyatàu?” tukaik tok yekamappoppù ya. “Ailon kulu sàlà, tewinnà tàk wà'nàmà talà tùtonpa po pen màlà, tamù'nawàlà iwettùlùkkwa màlà,” teppù Jesus uya tok pàk.

₃Jesus wechi chichiu pe Olive Tùpù po tùse, ya'lon kon uyàpùppù màlà ipyak amak yai. “Ina pàk yà'là yattai sàlà yamùk wekkupù yekamakà, molopai yà'là wekkupù àuyàpù winàkàik, molopai pata weyu wenukassak yekamanài pe,” teppù tok uya.

₄Jesus uya yeikuppù, “Enpen mettàik, ànù'là eyennakatakù'nokon. ₅Masapùla tukkan kon kappon yamùk uyàpù màlà uyesek yau, ‘Christ Iulà!’ tei'ma, molopai tukkan kon kappon yamùk yenkuttà tok uya màlà. ₆Wepanta'mantok yeta auya'nokon màlà mei molopai mei pùla. Tùse, kataimelunpatàu. Màlà yekkwa ton wekkupù màlà, tùse iwenukatok yekama màlà yamùk uya pen màlà. ₇Tewinan pata wepanta'ma màlà tùulon pata pokonpe, tùulon itepulu pe we'nàtok wepanta'ma màlà tùulon itepulu pe we'nàtok pokonpe. Iwan wechi màlà molo, molopai tùlùpùnù. ₈Tamù'nawàlà sàlà yamùk wechi màlà wapiya mule wechi'mosak kasa.

₉Màlàyau nen uchi kappon yamùk uya ayachi kon màlà molopai àtùlù kon atalumattà tok kon pe, molopai àwànà kon màlà. Tamù'nawolon kon kappon yamùk uya eyeya'noma kon màlà upàkànsau. ₁₀Màlà yattai tukkan kon uya ailon tetok tùuya'nokon upàk nonka màlà. Tùtonpa kon yeimippo tok uya màlà, molopai tok yeya'noma tok uya. ₁₁Tukke ailon pen itekale yenpoikannan usenpoika màlà molopai tukkankon kappon yamùk yennaka tok uya. ₁₂Màlà kasa àli wekatù màlà, màlàyau tukkankon kappon yamùk uya u'nùnmatok pùla iwena màlà. ₁₃Tùse mùkkàlà meluntà pe nai'nùk tùwemapù yawàlàiwenukatok tepose wepùikattà màlà. ₁₄Molopai sàlà Wakù Itekale itepulu pe we'nàtok yekale yekama màlà tamù'nawàlà wolù yawàlà pata yamùk yawolon kon pàk, molopai nen uchi iwenukatok uyàpù màlà,” teppù Jesus uya.

₁₅“ ‘Àli kulu Katù yewanma pe nai'nùk mattantok ku'nài wà'mùssakkasak wakù pata yau’ yene auya'nokon yau, màlà, Daniel Katù Maimu yenpoikanài uselupappù ipàk lùppù, ànù'là kaleta yennài, tàwà nùttui, ₁₆“màlà yensak tùya'nokon yau mùkyamlo Judea pon kon nepeik wùk pona. ₁₇Molopai kàyik tapùi ipu po nai'nùk kùsuttàtak tapluli yense tùwùk tak. ₁₈Kàyik umà yau nai'nùk kùsennappotak tùpon yense. ₁₉Àsà pe kulu iwechi màlà nossan yamùk monok ton pona, molopai echikili ton nùkwà imunka ton pona màlà wei yattai! ₂₀Àpùlematàk kon iko yattai wapùla Jew yamùk wàlàkà'tok yattai ewepe kon tukaik. ₂₁Masapùla màlà yattai wettalumattàntok wechi màlà àsà peiwa kulu, pena pata wepyattàppù motapai sàlà wei tepose wettalumattàntok wechippù yentai. Molopai màlà yekkwa tu'ma wechi molo pen màlà. ₂₂Tùse Katù uya pata weyu yamùk tonpakasak man, ikussak ya pùla iwechi yau, ànù'là uya wemapù pen màlà. Tùnanùmùssan pàkànsau Katù uya pata weyu yamùk tonpaka màlà.

₂₃“Màlàpàk uchi, ànù'là uya àpàkù'nokon, ‘Yenkà, pùsàlàichi mùkkàlà Christ,’ te wapùla ‘Mùkkàlà yenkà!’ te yau, ailon kùkatàu ipàk. ₂₄Masapùla ailon pen Christ molopai ailon pen itekale yenpoikannan usenpoika màlà. Eke ton wotoko molopai enumenkanài kupù tok uya màlà yanùnsak kon yennakatoppe tùuya'nokon, tok yennaka tùuya'nokon pe iwechi yau. ₂₅Yetatàk kon! Sàlà tekamapàsaik iweyu wapiya.

₂₆“Wapùla, kappon yamùk uya àpàkù'nokon, ‘Yenkà, wontaik yau Christ man!’ te yau, kùtàtàu, wapùla, tok uya, ‘Talà man iwe'wakkàttok tawon tau!’ te yau, ailon kùkatàu. ₂₇Masapùla Kàyik Mumu uyàpù màlà pata wekamlippù usene kak yakkletawà wei wepakkatok motapai wei wewontok motak kasa.

₂₈“I'nailàlà ekek wechi yau kassanak yamùk wepilipù màlà,” teppù Jesus uya.

₂₉“Tachin pe pùla utaimelunpantok kon weyu tùpo, ‘wei wena màlà ewalupà pe, kapùi ulenpamù pen nen uchi màlà, chilùkà yamùk wessoloka màlà kaupai, molopai kak yawon kon apàikkek ton yenu'ma màlà tok patassek yapai.’ {Isa 13.10; 34.4} ₃₀Màlàyau nen uchi Kàyik Mumu yentok ipàkàlà woton usenpoika màlà kak yau. Màlàyau nen uchi tamù'nawolon kon kappon yamùk non pon kon kalawù màlà. Kàyik Mumu uyàpù katuppluk po epùn poi, meluntà pe molopai eke pe akkwa pokonpe yene tok uya màlà. ₃₁Eke paka letù walai wai tàwù màlà, molopai tùyinchelùyi yamùk yeunoko ya màlà asakùlà'nan non pana'mu yawà. Molopai mùkyamlo uya iponalok kon inanùmùssan pilipù màlà tamù'nawàlà wolù yapai,” teppù Jesus uya.

₃₂“Tàwàichi fig yek eyenupataù. Ipanta yamùk wechi lola pe molopai àmù pe yau, molopai iwaleta yau, wàppànàtok yattai wechi mei pùla ittunnan amyamlo. ₃₃Màlà kasa làma, tamù'nawàlà sàlà yamùk yene auya'nokon yau, pata weyu wechi mei pùla, iyàpù winàkàik iwechi ittu auya'nokon màlà. ₃₄Ailon kulu sàlà, tamù'nawàlà sàlà yamùk wekkupù màlà sàlà pe nemassai'nannùk kappon yamùk welikkapù tamù'nawàlà wapiya. ₃₅Epùn molopai non utà màlà, tùse umaimu utà pen màlà.”

₃₆“Ànù'là uya iweyu molopai iwekkuttok yattai uyàpù ittu pùla man, inchelù yamùk uya là, wapùla Imu uya là, tùse Ikàipùnù neken mùkkàlà ittunài. ₃₇Kàyik Mumu uyàttok wechi màlà iwekkussak lùppù Noah yattai kasa. ₃₈Tuna'ma wapiya, kappon yamùk uta'lettàpàtùppù molopai tùwuku kon inchippù tok uya. Kàyik yamùk molopai nossan yamùk wemali'mapàtùppù, Noah wenuku kanau yak weyu tepose. ₃₉Tùse yà'làlà wekkupù ittuppù tok uya pen, tuna'ma uyàpù molopai teulankakon ya ponalà. Màlà kasa làmaichi iwechi màlà Kàyik Mumu uyàpù yau. ₄₀Màlà yattai asa'lon kon kàyik yamùk wechi màlà umà yau, tewin yanùmù màlà molopai yakon wà'nàmà ipatappù yau. ₄₁Asa'lon kon nossan yamùk wechi màlà a'naik yepa pàk. Tewin yanùmù màlà, yakon wà'nàmà ipatappù tau. ₄₂Enpen uchi ettàk kon! Masapùla yà'là yattai Eyepulu kon uyàpù ittu auya'nokon pùla man. ₄₃Sàlàichi mùttutàik, tapùi yesak kàyik uya yà'là yattai là ewalupàttau amak uyàpù ittu tùuya yau, tùwe'nùnse pùla iwechi màlà molopai amak wewontoppe tùwùk tak ikupù ya pen. ₄₄Màlàpàk uchi, iwekonekasak pe nàlà mettàik, masapùla Kàyik Mumu uyàpù màlà yeneiche ewechi kon pùla tùse.”

₄₅“Ànùk ken uchi mùkkàlà ailon molopai pukkek apyoto itepulu nùtùlùppù tùwùk tawon kon yepoi, tok yeipattàtoppe ya iwalai iweyu yattai? ₄₆Tùutauchinpasen mùkkàlà apyoto, tepulu uya teposak yau, màlà kupù tùuya tùse iwennapposak yau! ₄₇Ewaik, ailon kulu sàlà, itepulu uya màlà mùkkàlà apyoto tùlù tamù'nawolon itesappe tùwettok mainanpanài pe. ₄₈Tùse àli apyoto pe tùwechi yau, ‘Uyepulu uyàpù pen màlà tachin pe,’ te ya tùyiwalà. ₄₉Molopai nen uchi tùtonpa yamùk apyoto ton ippoppàtù pàk iwepyattà, molopai iita'lettà molopai iwetùmù tùwetùnsan pokonpe. ₅₀Màlàyau nen uchi mùkkàlà yepulu wennappo màlà tewinnà wei yattai, iyàpù yeneiche iwechi molopai ittuiche iwechi pen tùse. ₅₁Itepulu uya yattàpàtù màlà echikili pe molopai tùusennakasan talumattàtok pùkkù pe iwechi. Molo ikalantok molopai tùyà kàlàlàikkatok ya wechi màlà.”