Mark 1

₁Sàlà màlà Wakù Itekale Jesus Christ yekale. Jesus mùkkàlà Katù Mumu. ₂Iwepyattàsak màlà Isaiah, Katù Maimu yenpoikanài uya imenukappù kasa. “Katù uya, ‘Yenkà, Umaimu yekamanài teunossaik awapiya. Pùsàlàichi mùkkàlà eye'ma konekanài awapiya,’ teppù. ₃Iwentaime màlà wontaik yau, ‘Itepulu ye'ma ikonekatàk, tossalà ite'ma ikonekatàk!’ ” tukaik.

₄John usenpoikappù wontaik pe iwechi yak, kappon yamùk yenpatauka pe molopai wemakuimansak lùppù yekamatok usentuppan toppe yekale yekama pe. “Amakuyi kon winàpai elattàtàk kon. Katù usentupa màlà amakuyi kon pàk” tepù ya. ₅Tamù'nawolon kon Judea molopai Jerusalem pon kon utàppù John yetase. Àli pe tùwettok kon yekamappù tok uya, molopai tok yenpataukappù ya Jordan itesek tuna kak.

₆John pon wechippù màlà camel itesek pùpok lùppù konekasak pe. Ipokùlùyi nàlà kamo pippà lùppù. Itok wechippù kailau molopai iteipa wan. ₇Itekale yekamappù ya, “Molo kàyik nùyàssan uye'mappù pàk ekeiwa uyentaino. Iulà là wepeima ittassa yewa yeukaik yentaino,” teppù ya. ₈“Eyenpatauka kon uya nen tùwessen tuna ke, tùse eyenpatauka kon ya màlà Wakù Akkwalù ke,” teppù ya.

₉Malalà tùpo Jesus uyàpùppù màlà Nazareth poi Galilee yapai, molopai John uya yenpataukappù Jordan itesek tuna kak. ₁₀Tuna kapai tùwepalùka pe, epùn utakkokasak yeneppù ya, molopai Wakù Akkwalù uttàppù ipona wakokkwa kasa. ₁₁Màlàyau mayin usetappù epùn poi, “Àmàlà mùkkàlà u'nùn Umu. Wakù pe kulu Uyauchinpanài,” tukaik

₁₂Màlà yattai là Wakù Akkwalù uya Jesus yeunokoppù wontaik pe iwechi yak. ₁₃Molo iwechippù màlà 40 pe wei kaichalà molopai Settan wechippù ittuiche. Elannek ton nà kamo yamùk pokonpe iwechippù. Màlà tùpo inchelù yamùk uyàpùppù molopai tok uya ipùikattàppù.

₁₄John yachi patikichi tak tùpo, Jesus utàppù màlà Galilee pona. Wakù Itekale yekamappù ya Katù winàpaino. ₁₅“Iwalai pata weyu wesseposak man, Katù wettok itepulu pe mei pùla man. Amakuyi kon winàpai elattàtàk kon molopai ailon katàk kon, Wakù Itekale pàk, ” teppù ya.

₁₆Galilee itesek palau usattàsak yena pàk tùusalà yau, Simon molopai ilui Andrew tawonnan yeneppù ya. Tùpunwe kon yenu'masak tok uya tuna kak. Molok yachipàk tùwessan pe tok wechippù màlà. ₁₇“Àitàk kon uya'là kappon yamùk yachinài nan pe eyenupa kon uya màlà,” teppù Jesus uya tok pàk. ₁₈Màlà yattai là tùpunwe kon yamùk nàmàppù tok uya molopai tok utàppù ya'là.

₁₉Malalà mei tùutàsak yau, James molopai John tawonnan Zebedee munkà yeneppù ya kanau yau nen tùpunwe kon yamùk yale'natàpàtù pàk tùwessan. ₂₀Màlà yattai là Jesus uya tok kà'mappù. Tùkàipùnù kon Zebedee nàmàppù tok uya tùpoitolù ton pokonpe neken. Molopai tok utàppù Jesus ya'là.

₂₁Jesus molopai ya'lon kon uyàpùppù Capernaum pona. Wàlàka'nà weyu yattai synagogue tak iwewomùppù, molo tok yenupappù ya. ₂₂Tok usenumenkappù kulu màlà i'napailà tenupa kon ya pàk. Masapùla tok yenupappù ya Law pàk enupan nan kasa pùla. Tùse tok yenupappù ya tapàikettù kenan kasa molopai ittunài pe.

₂₃Molo iwechippù kàyik àli akkwalù yen, synagogue tau. Iwentaimeppù suwa tukaik, ₂₄“Yà'là pe ina wechi iche messan, Jesus Nazareth pon? Ina mattanùsse na' àuyàssak màlà? Eyittuyan Iulà ànùk pe là ewechi. Àmàlà mùkkàlà wakù kulu Katù Maimu yenpoikanài!” tukaik. ₂₅Jesus uya ipàk meluntà pe, “Eppana ekkà, epakkakà mùkkàlà kàyik yapai!” teppù. ₂₆Àli akkwalù uya kàyik yalo'mappù ipla meluntà pe. Iwentaimeppù eke pe, molopai iwepakkappù mùkkàlà yapai. ₂₇Tukkan kon usenumenkappù kulu màlà ipàk. Tok usekamappopàtùppù tùyiwalà'nokon, “Yà'là ken uchi sàlà, tùulon nà emennak enupantok? Pùsàlà kàyik tapùikettù ke man àli akkwalù yamùk yapyontàtok yesappe molopai tok wechi imaimu yawàlà” teppù tok uya. ₂₈Màlà yattai là màlà tok uya Jesus pantomù yekamappù pata yamùk Galilee yawolon kon yawàlà.

₂₉Jesus molopai inenupaton uya Synagogue nàmàppù, tok utàppù tossalà Simon molopai, Andrew tawonnan yùwùk tak. James, John tawonnan pokonpe tok utàppù. ₃₀Simon yewoppù wàkàmi'masak wechippù màlà tekwek tau. “Iwàkkàmi'masak man,” teppù tok uya Jesus pàk. ₃₁Màlàpàk Jesus utàppù ipyak. I'màssakappù ya itemyatù pàk. Màlà yattai là iwàkkàmi'makapùppù, màlà pelà tok yeipa woton konekappù ya.

₃₂Ko'man pe, wei patappù pe e'nek ton nepùppù kappon yamùk uya Jesus piyak molopai àli akkwalù yesak ton nà. ₃₃Molopai tamùnawàlà kappon yamùk màlà pata yawon kon wepilipùppù manatta pona. ₃₄Tukkan kon ipiitàppù ya tùpatalo'nan itepalan ton, molopai àli akkwalù yamùk là yenpakkappù ya. Tok uselupatok yattai ke Jesus uya tok lepappù pen, masapùla tok uya tùyittu pàk.

₃₅Ko'làma kulu, wei wepakka wapiya, Jesus we'wuluukappù molopai tapùi nàmàppù ya. Iitàppù tùkenan pata yak. Màlà motau iwàpùlemappù. ₃₆Tùse Simon molopai itonpa yamùk utàppù iwase. ₃₇Yeposak tùuya'nokon yau, “Tamù'nawolon kon eyiwayan,” teppù tok uya Jesus pàk. ₃₈Tùse Jesus uya tok maimu yeikuppù “Utànnokon sàlà tùulon pata pona, molo nàlà Wakù Itekale yekama uya màlà. Masapùla màlà kusse uyàssak nai'nùk,” teppù Jesus uya tok pàk. ₃₉Màlàyau Wakù Itekale yekama pàk iwechippù molo synagogues tau'ne Galilee yawàlà. Molopai àli akkwalù yamùk yempakkapàtùppù ya.

₄₀Welei pàk e'neppe tùwessen uyàpùppù Jesus piyak. Tese'mu yok iwenappù ipyau molopai ipawanattàppù ya. “Uyipittàpai ewechi yau, uyipittà auya màlà. Tùttuyaik ikuttok auya meluntàlù wechi molo,” teppù ya. ₄₁Màlàyau Jesus usentupappù ipàk. Temyatà yenkappà ya molopai yappàtùppù ya. “Ewaik, eyipittà uya, echipittàk,” teppù ya. ₄₂Màlà yattai là welei pùla kàyik wenappù. Ichipittàppù nen uchi wakù pe. ₄₃Jesus uya àsà pe yelupappù molopai yeunokoppù ya, “Itàkàichi sàlà pe mailàlà tùusennakaik pùla,” tukaik. Yeunokoi'ma, ₄₄“Masa yetakà, yà'làlà kùkai ànù'là pàk. Tùse itàkà eye'ma tawàlà esekamata paatele pàk. Molopai yà'làlà àntùlù itùta Moses uya yekamappù kasa, euchipittàsak molopai ewekolùkasak ittutoppe tamù'nawolon kon uya,” teppù Jesus uya ipàk. ₄₅Tùse kàyik uselupappù ipàk tùutà pe eke pe kulu. Ichelupappù kulu màlà Jesus utà pata yak tene tùse yeselùkek pùla. Tùse tùkenan pata yawàlà neken nen uchi iichalàppù. Molopai kappon yamùk uyàpùppù ipyak tamù'nawà màlà yawolon pata yamùk yapai.