Mark 10

₁Màlà pata nàmàppù nen uchi Jesus uya molopai iitàppù Judea pona tuna Jordan pàk màwinàkàik. Kappon yamùk wepilittukkappù ipyak, molopai tok yenupappù ya tùwessek kasa là.

₂Pharisee yamùk tonpa yamùk uyàpùppù ipyak yekamappopàsse ittuiche, “Masa ina pàk yekamakà, yà'là tawon ken Moses winàpaino kàyik uya tùnoppù nonka pàk?” tukaik. ₃Jesus uya tok maimu yeikuppù, “Yà'là tukaik ken Moses uya yekamappù?” tukaik. ₄Tok uya imaimu yeikuppù, “Moses uya kàyik pàk, ‘Ànoppù ànonkapai ewechi yau, kaleta imenukakà, ànoppù nonka pa,’ teppù” tukaik. ₅Tùse Jesus uya tok pàk, “Moses uya wateppù màlà masapùla sa'man pe eyewan kon wechi pàk, ₆Tùse sàlà pata non wepyattàppù motapai, ‘Katù uya màlà walawok molopai ulichan konekappù Katù Maimu uya yekamasak kasa ₇Màlàpàk màlà kàyik uya tùkàipùnù molopai tùsan tawonnan nàmà, molopai tùnoppù piyau neken tùwettoppe. ₈Molopai asa'lon kon wena tewin,’ tukaik yekamasak ya. Wa iwechi wenai asa'là tok wechi pen, tùse tewin neken. ₉Katù niki'massan tewin tok wettoppe pantakatak kappon,” teppù Jesus uya Pharisee yamùk pàk.

₁₀Tapùi tak tùwennapposak kon yau, inenupa ton uya Jesus yekamappoppù ichelupappù pàk. ₁₁Màlàyau Jesus uya yekamappù tok pàk, “Kàyik tùnoppù nonkanàippù uya tùulon mali'massak wechi màlà, ailon pe pùla wapiyalok tùnoppù winàkàik iwemakuimasak. ₁₂Màlà kasa nàlà nossan uya tùtayappù nonkasak molopai tùulon mali'massak ya yau, iwemakuimasak nàlà màlà,” teppù Jesus uya tùnenupa ton pàk.

₁₃Tùulon kon uya mule yamùk nepùppù Jesus piyak, tok yappàttoppe ya, tùse inenupa ton uya tok yàulàmappù. ₁₄Màlà yensak Jesus uya yau tùwakùli pe pùla ittuppù ya molopai tùnenupaton pàk, “Tàwà mule yamùk nùyàpùi upyak. Tok kùseleutanùttàu! Masapùla Katù wechi màlà pùsamlo walainon ponaloppe,” teppù. ₁₅“Ailon kulu sàlà, ànùlà Katù yanùmù ya pùla nai'nùk tepulu pe mule nanùnyai'nùk kasa wechi màlà, Katù ponaloppe pùla. ₁₆Màlàyau mule yamùk yanùmùppù ya tewin pàk temekun pona. Temyatù nonkai'ma tok pona, tok pùlemappù ya.

₁₇Jesus wessalattàkassak tùutà pàk tùse kàyik uyàpùppù ipyak, tese'muyok iwenappù itemlotopo molopai Jesus yekamappoppù ya, “Wakù Enupanài, yà'là kupù uya ken wema'nàtok tàwàlàlà yepotoppe uya?” tukaik. ₁₈Màlàyau Jesus uya yekamappoppù, “Yà'là pe ichi iwechi pàk uyesatà auya màlà ‘wakù’ tukaik? Wakù pùla iwechi màlà, tùse Katù neken. ₁₉Usenupantok mùttuyaik, ‘Kappon kù'wànài, anmali'mappù pen pokonpe kechii, amak pe kechii, kasei pe kechii, ànù'là kùkkaseipai ipantomù pe tukaik, ànù'là tenkuttàik tok yemamin kùsekkwatùi, asan molopai àkàipùnù tawonnan tùnamaik ekkà imaimu yawàlà tawon,’ ” teppù Jesus uya. ₂₀Màlàyau Jesus pàk, “Enupanài, tamù'nawàlà sàlà yamùk kussak uya man elekkwà pe wechi motapai,” teppù ya. ₂₁Jesus uya tù'nùn pe yeneppù, molopai ipàk, “Tewin neken nà ànkupù molo man. Itàkà apyau nai'nùk ichilanmata molopai yà'là pùnon yemyak pùlayatta tùlù pa. Màlàyau temamin ke ewechi màlà epùn po. Molopai àikkà uya'là,” teppù. ₂₂Sàlà yetasak tùuya yau, kàyik yenpata wemyakanmappù kulu molopai iitàppù màlà tùusewankono'maik, masapùla tukke mamin yesappe tùwechi pàk.

₂₃Jesus welattàppù tùnenupa ton yense, màlàyau tok pàk “Sa'man pe nen mà iwechi màlà tà temamin kenan kon kulu pona Katù yanùmù tok uya tepulu kon pe yentai, ” teppù ya. ₂₄Inenupa ton usenumenkappù kulu màlà ichelupa pàk. Tùse Jesus uya tukka tok pàk, “Umunkà yamùk, sa'man pe Katù yanùmù kappon yamùk uya tepulu kon pe wechi màlà! ₂₅Sa'man pe pùla lùiwa iwechi màlà Camel, wepakka akkussa yenu yeuta yai yau, mùkkàlà kappon temamin kenan uya Katù yanùmù tepulu pe yentai,” teppù. ₂₆Inenupa ton usenumenkappù kulu eke pe, molopai tùyiwalà'nokon, “Ànùk yekkwa wepùikattà nen ken uchi màlà?” tukaik. ₂₇Jesus uya tok yeneppù, molopai tok maimu yeikuppù ya. “Kappon pona sa'man pe iwechi màlà, tùse Katù pona pùla. Tamù'nawolon màlà sa'man pen Katù pona,” tukaik.

₂₈Màlà yattai Peter uselupappù, “Masa yenkà tamù'nawolon nànsak ina uya molopai aya'là ina uyàssak,” tukaik. ₂₉“Ailon kulu sàlà,” teppù Jesus uya tok pàk, “Ànù'là tùwùk nànnàippù, wapùla takon non, tùlunan, wapùla tùwàlichi ton, wapùla tùpachi ton, wapùla tùsan, tùkàipùnù, wapùla tùmunkà yamùk, wapùla tù'mà nànnàippù upàkànsau molopai Wakù Itekale pàkànsau, ₃₀uya màlà yentai tukke sàlà yattai tùwùk molopai takon non, tùlunan, tùwàlichi ton, tùpachi ton, tùsan, tùkàipùnù, tùmunkà yamùk molopai tù'mà yamùk yepolo, tùwettalumattàtok pokonpe nàlà kan uchi. Molopai nùyàssai'nùk pata weyu yau, tàwàlàlà wema'nàtok yepolo ya màlà. ₃₁Tùse tukkan kon sàlà pe wapiya nai'nannùk wechi màlà àkàmlàk, molopai sàlà pe àkàmlàk nai'nannùk wechi màlà wapiya,” teppù Jesus uya.

₃₂Tok utàppù asantawàlà Jerusalem pona. Màlàyau Jesus utàppù tok wapiya. Inenupa ton usenumenkappù kulu molopai kappon yamùk tok ya'là tùwessan usenalippappù. Molopai Jesus uya tùnenupa ton neken tùpantakaik tok pàk yà'là pe kappon yamùk uya tùkuttok woton yekama tukkappù. ₃₃“Masa yetatàk kon, utàn nokon sàlà Jerusalem pona. Màlàyau Kàyik Mumu tùlù màlà Eke ton paatele yamùk yepulu ton molopai Law pàk enupannan yemyak. “Tàwà iwelikà màlà” te tok uya màlà ipàk, molopai toto yamùk yemyak itùlù tok uya. ₃₄“Molopai tok uya imottùnpa màlà, tok wetattapàtù màlà ipona. Ippoppàtù tok uya màlà molopai tok uya iwànà màlà. Molopai àsolùwau wei tùpo iwe'wuluuka màlà,” teppù Jesus uya.

₃₅James molopai John tawonnan, Zebedee munkà yamùk uyàpùppù Jesus piyak, “Enupanài, molo nen mà ina ponaloppe ikupù auya iche ina wettok man tà,” teppù. ₃₆“Yà'làichi?” tukaik Jesus uya tok yekamappoppù. ₃₇“Itepulu pe ewettok yau, apyau ina mùkupùik, tewin kamik pen eyemyatù winà ilatoi winà tùulon tukaik,” teppù tok uya. ₃₈Tùse Jesus uya tok pàk, “Enekamappo kon ittu auya'nokon pùla messatàik. Ussawù yawon ken na' uchi inchi auya'nokon? eusenpatauka kon na' usenpatauka kasa?” teppù. ₃₉Tok uya imaimu yeikuppù, “Ina uya ikupù màlà, ” tukaik. Màlàyau Jesus uya tok pàk, “Màlà tinchiyai'nàk, inchi auya'nokon, molopai usenpataukatok ike ke eusenpatauka kon,” teppù. ₄₀“Tùse unkupù pen màlà ànùk wettok upyau sàwinà'ne. Katù làkku nen mùkkàlà ànùk ponaloppe sàlà pata yamùk wekonekasak tùnài,” teppù Jesus uya.

₄₁Tùulon kon 10 pan kon inenupaton uya yetasak yau, tok usàulàmàppù James molopai John tawonnan pàk. ₄₂Jesus uya tamù'nawalà tùnenupa ton kà'mappù tùpyak molopai tok pàk, “Mùttuyatàik kappon yamùk itepulu pe tùwessan wechi kappon yamùk yepoi tapàikketù ke molopai mùkyamlo yepulu nàlà tok yepoi tok yepulu pe. ₄₃Tùse màlà kasa iwechi àkklottau'nokon pùla man. Ànù'là eke pe epaino wechi yau, tamù'nawolon kon yapyoto pe iwechi màlà. ₄₄Molopai mùkkàlà wapiya eppaino wechi màlà, alikyek pe tamù'nawolon kon yapyoto pe. ₄₅Masapùla mùkkàlà Kàyik Mumu uyàpùppù tapyoto ke esse pen màlà. Tùse kappon yamùk yapyoto pe esse iyàpùppù. Molopai takkwalù tùse tukkan kon kappon yamùk wemokka toppe makui yapai,” teppù ya.

₄₆Jericho pona tok uyàpùppù. Jericho nàmà Jesus uya tùnenupa ton molopai tukkan kon kapon yamùk pokonpe yau, enkui molopai enpùn kàyik Bartimaeus itesek Timaeus mumu yepoloppù tok uya chichiu pe asanta yenapo. ₄₇Jesus mùkkàlà Nazareth pon tukaik yetasak tùuya pàk iwentaimeppù, “Jesus, David mumu, upàk tàwà esentuppakà!” tukaik. ₄₈Kappon yamùk uya eppana iwettoppe yàulàmappù. Tùse iwentaimeppù eke peiwa, “Jesus, David mumu, upàk tàwà esentuppakà!” tukaik. ₄₉Jesus weleutappù molopai, “Ikà'matàk kon,” teppù ya. Màlà yattai tok uya enpùn kà'mappù. “Panappe ekà, e'wuluukakà, àkà'mayan,” teppù tok uya. ₅₀Enpùn uya tassan yenu'mappù, iwe'wuluukappù, molopai Jesus piyak iyàpùppù. ₅₁Màlàyau Jesus uya yekamappoppù, “Yà'là kupù uya iche messan àponalok pe?” tukaik. Màlàpàk enpùn uya Jesus pàk, “Enupanài, pata yentukka toppe uya tàwà kùpùikattàkà,” teppù. ₅₂“Itàkàichi eye'ma tawà, ailon tetok auya uya màlà àkussak wakù pe,” teppù. Màlà yattai là pata yeneppù ya màlà, molopai Jesus ya'là iitàppù asantawà.