Mark 12

₁Jesus uya tok yelupappù panton yau, “Kàyik uya chi'nak itek kùyali Grape itesek, pàmàppù umà yau. Umà woi kulala tùlùppù ya. Non yakappù ya grape kakklàtok tùuya yen pe, molopai kau tapùi yamùppù ya kappon uya umà yene yùwùk woton. Màlàyau kàyik yamùk yepoloppù ya umà mainanpa toppe tok uya, molopai iitàppù tùulon pata yak. ₂Kùyali wappùtok yattai, tapyoto yeunokoppù ya umà mainanpanài nan piyak grape yepose tùponaloppe. ₃Tok uya itapyoto yachippù. Tok uya ippoppàtùppù molopai tok uya yeunokoppù yà'làlà pùla. ₄Umà yesak uya tu'ma tùulon tapyoto yeunokoppù, tok uya ippai yai iwànàppù, molopai kuli'mak àsà pe tok wechippù ipàk. ₅Umà yesak uya tu'ma tùulon tapyoto yeunokoppù, molopai tok uya iwànàppù. Màlà kasa tùulon kon kupùppù tok uya. Tùulon ippoppàtùppù tok uya molopai tùulon wànàppù tok uya tukaik. ₆Umà yesak piyau màlà tewin nan nùppù kappon wechippù ineunoko i'nùn kulu imu, màlàyau mùkkàlà yeunokoppù ya, ‘Tok uya ken umu nama ko,’ tei'ma. ₇Tùse umà mainanpanài nan uya tùyiwalà'nokon, ‘Pùsàlà mùkkàlà umà yesak mumu. Iwàpai'nokon i'mà lùppù wettoppe kùponalok kon pe!’ teppù. ₈Umà yesak mumu yachippù tok uya, iwànàppù tok uya, molopai iwelichak yenu'mappù tok uya umà yapai.

₉“Yà'là pe ken umà yesak wechi? Umà yesak uyàpù màlà molopai mùkyamlo tùkka ya nen uchi, umà tùlù ya tùulon kon yemyak imainanpa toppe tok uya,” tukaik, Jesus uya panton yekamappù. ₁₀“ Katù Maimu yau ken na' yennàinan pen amyamlo?” tukaik, Jesus uya tok yekamappoppù, “ ‘Tàk tapùi yamùnnan nenpàtùppù tapulàik pùla wenasak man iche we'nàtok pe. ₁₁Sàlà kussak màlà Itepulu Katù uya molopai yene'nokon man usenumenkantok ipàk pe nàlà!’ ” teppù Jesus uya.

₁₂Jew yamùk yepulu yamùk wechippù màlà Jesus yachiiche. Masapùla sàlà panton yekama ya tùwinàkài'nokon ittusak tùuya'nokon pàk. Tùse tok usenalippappù màlà ilinà kappon yamùk pàk. Màlàpàk tok utàppù nen uchi iwinàpai.

₁₃Pharisee tonpa yamùk molopai Herod ya'lon kon yeunossak tok uya wechippù Jesus piyak, ichelupa winà yachitoppe tùuya'nokon yekamappopàsse. ₁₄Tok uyàpùppù ipyak molopai yekamappoppù tok uya. “Enupanài, ailon pe tùuselupassen pe ewechi ittuyan ina. Yà'là tukaik sa' kappon yamùk nùsenumenkayan ko tukaik là tùutaimelunpasen pen àmàlà. Masapùla ànùk pe là kappon wechi ittuiche tùwessen pen, tùse ailon pàk enupanài àmàlà Katù yeselu kappon ponalok pàk. Ina pàk tàwà yekamakà. Ikasa pùla na' iwechi pùlayatta ye'ma Rome pon pata yesak yemyak? Ina uya ken na' ye'ma, wapùla kane?” tukaik. ₁₅Tùse tok usennaka itui'ma tok pàk, “Yà'là peichi iwechi pàk uyachiiche ewechi kon màlà? Pùlayatta pun inettàk kon yentoppe uya,” teppù ya tukka tok pàk. ₁₆Màlàpàk tok uya pùlayatta pun nepùppù. “Ànùk yenpata ken sà, molopai ànùk yesek ken uchi sà?” tukaik tok yekamappoppù ya.Tok uya, “Pata yesak, Rome pon,” teppù ipàk. ₁₇Jesus uya tok pàk, “Pata yesak, Rome pon piyak ye'matàk màlà, pata yesak Rome pon ponalok, molopai Katù piyak ye'makà màlà Katù ponalok,” teppù. Màlàpàk tok usenumenkappù ipàk.

₁₈Sadducee yamùk uyàpùppù Jesus piyak Pùsamlo wechippù màlà iwelichak lùppù we'wuluuka pen tawonnan pe. ₁₉Tok uya Jesus pàk, “Enupanài, Moses uya sàlà enupantok menukappù man ina ponaloppe. ‘Kàyik welikù tùnoppù tùnànse tùmunkà ke pùla yau, mùkkàlà kàyik yakon uya màlà inoppù lùppù yanùmù tùnoppù pe mule yamùk yepotoppe tùuya'nokon mùkàlà iwelichak lùppù munkà pe,’ tukaik,” teppù. ₂₀“7 kaichalà màlà walawotichi wechippù. Wapiyalok wemali'mappù molopai iwelikùppù imunkà pùla. ₂₁Yakon uya mùkkàlà lùppù mali'mappù molopai iwelikùppù, imunkà woton pùla làma. Molopai tok solùwano wechippù màlà kasa lùppù. ₂₂Tamù'nawàlà tok tonpassan wechippù wa, 7 pan kon uya mùkkàlà nossan kupùppù tùnoppù kon pe. Tùse imunkà pùla tok welikùppù, molopai àkàmlàk lùppù nàlà nossan welikùppù. ₂₃Ànù' noppù pe ken iwechi weli'nà tùpo we'wuluukantok yattai tok we'wuluukasak yau? Tamù'nawàlà 7 kaichalon kon kàyik yamùk uya màlà tùnoppù kon pe ikupùppù!” teppù tok uya.

₂₄Jesus uya tok pàk, “Ikasa pùla sa' messatàik! Masapùla Katù Maimu ittu auya'nokon pùla iwechi pàk, molopai imeluntàlù ittu auya'nokon pùla nàlà iwechi pàk,” teppù. ₂₅“Iwelichak kon we'wuluukasak yau, epùn pon kon inchelù yamùk kasa nen uchi tok wechi màlà tok wemali'ma pen. ₂₆Iwelichak kon wewuluukasak yekamasak auya'nokon pàk, Moses nùmenukappù ken na uchi yene auyanokon pùla iwechi màlà apok ipokon yuk yekale? Màlà motau iwe'menukasak màlà Katù uya Moses pàk, ‘Iulà mùkkàlà Abraham Katùyi molopai Isaac Katùyi, molopai Jacob Katùyi,’ teppù. ₂₇Pàli'yawon kon Katuyi nen mùkkàlà, Iwelichak kon Katùyi là pen nen. Ikasa pùla kulu messatàik!” teppù Jesus uya tok pàk.

₂₈Tewinnà Law pàk enupannan tonpa uyàpùppù uselupan yetase. Wakù pe Sadducee yamùk maimu yeiku Jesus uya yetasak tùuya pàk iyàpùppù ipyak yekamappoik. “Tamù'nawolon enupantok kùlottau i'nai wechi màlà tùkussen pe kulu tùulon kon yentai?” tukaik. ₂₉Jesus uya imaimu yeikuppù, “Tùkussen kulu enupantok kùlottawon màlà, ‘Yetatàk kon, Israel yamùk! Itepulu kùkatùyi mùkkàlà tewinan neken Itepulu. ₃₀Itepulu Akatùyi i'nùnmakà, tamù'nawàlà eyewan ke, tamù'nawàlà ayakkwalù ke, tamù'nawàlà eusenumenkatok ke, molopai tamù'nawàlà emeluntàlù ke,’ tawon. ₃₁Sàlà màlà yakon tùkussen kulu enupantok. ‘Kappon i'nùnmakà eyiwalà mechi'nùnmayai'nùk kasa,’ tawon. Sàlà yamùk asa'lon enupantok yentaino pùla iwechi màlà,” tukaik. ₃₂Law pàk enupanài uya Jesus pàk, “Ikasa messaik, Enupanài, ailon pe tewinan mùkkàlà Katù. Molopai ànù'là katù pùla iwechi màlà, tùse mùkkàlà neken. ₃₃Katù i'nùnmakà tamù'nawàlà eyewan ke, tamù'nawàlà eusenumenkatok ke, tamù'nawàlà ayapàikketù ke. Molopai ayakontalù i'nùnmakù eyiwalà mechi'nùnmayai'nùk kasa mùkapàssaik. Wakù pe iwa màlà sàlà asa'lon enupantok yawàlà we'nà wechi, tùpottàsen nà tùlù Katù yemyak yentai molopai kamo tùlù yentai,” teppù ya. ₃₄Jesus uya ikasa yeichak ya yetasak tùuya pàk, “Mei pùla messaik Katù yanùmù auya eyepulu pe piyau,” teppù ipàk. Màlà motapai tamù'nawolon kon usenalippappù enekamappopai pùla.

₃₅Jesus uya kappon yamùk yenupa Katù yùwùk tau yau, “Atta ken uchi iwechi pàk màlà Law pàk enupannan uya Christ mùkkàlà David pa te nai'nùk?” teppù. ₃₆“David uya Wakù Akkwalù yapàikketù yau, ‘Itepulu uya Uyepulu pàk, Eleutakà upyau, kamik winà pùla, eyeyaton yamùk nonka uya atta yokkoik ponalà,’ teppù. ₃₇David uya tùmàlà pe Christ yesatù ‘Uyepulu’ tukaik tùse, yà'là kasa ken uchi ipa pe iwechi màlà?” teppù Jesus uya tok pàk.

Tukkan kon kappon yamùk uya Jesus uselupa yetappù tùutauchinpaik. ₃₈Tok yenupa tùuya yau tok pàk, “Masa Law pàk enupan nan yeselu mentàik, asapai nokon mùkyamlo kusan tùpon kon yau, molopai kappon yamùk uya telupa kon ichelok kon tukkan kon kappon yamùk kùlottau. ₃₉Molopai wakù kulu aponok po eppai nokon synagogues tau, wakù kulu uta'lettàntok patassek motau eppai nokon. ₄₀Itayappù iwelichak lùppù yùwùk mokkan nan mùkyamlo, kusan pe tùwàpùlemassan wakù pe tùwechi kon pe tukaik. Tok uya màlà eke kulu wettalumattàntok yepolo,” teppù Jesus uya.

₄₁Katù yùwùk tau Jesus weleutasak wechippù pùlayatta yen kaichalà. Tukkan kon kappon yamùk uya pùlayatta tùlù yeneppù ya. Molopai tukkan kon ipùlayattayi kek ton uya, tukke pùlayatta tùlùppù. ₄₂Italumayippù sa'ne nossan itayappù iwelichak lùppù uya asa'lon lùkwà kalukuli pùlayatta pun tùlùppù malalon kulu. ₄₃Màlàyau tùnenupa ton kà'mappù ya tùpyak. Tok pàk, “Ailon kulu sàlà, pùsàlà entuppa'no sa'ne nossan itayappù iwelichak lùppù uya eke peiwa itùsak man, tùulon kon yentai. ₄₄“Masapùla tok uya màlà eke pe iwechi pàk màlà yapai itùsak. Tùse pùsàlà nossan uya màlà tamù'nawàlà tùpyawon tùwematok ipàk pan tùsak,” teppù Jesus uya.