Romans 13

₁Tamù'nawolon kon uchi pata yesappe nai'nannùk maimu yawàlà nechii. Masapùla yà'là yekkwa là apàikkek wechi molo pùla iwechi màlà tùse Katù winàpaino neken. Molopai molo nai'nùk pata yapàikketù tùsak màlà màlà motak Katù winà. ₂Ànù'là molo nai'nùk maimu yawolon pen, uya Katù nùnonkappù yentaika màlà. Molopai ànù'là màlà ku'nài uya talumattàntok nepù màlà tùpona. ₃Masapùla pata yesappe nai'nannùk mùkyamlo wakù ku'nàinan usenalippatok ipàk ton pen tùse mùkyamlo àli ku'nàinan usenalippatok ipàk. Usenalippantok pùla na' eppai messatàu pata yesak tapàikketù ke nai'nùk pàk? Wakù pe nai'nùk uchi ikuttàk kon molopai ayapulà kon ya màlà. ₄Masapùla Katù yapyoto mùkkàlà ne'wotokomayai'nùk àpàkànsau'nokon. Tùse àli kussak auya'nokon yau, esenalippatàk kon ipàk, masapùla wàntok tùuya meluntàlù yesak mùkkàlà. Katù yapyoto mùkkàlà molopai Katù we'naikatok ku'nài àli ku'nài pona. ₅Màlàpàk uchi pata yesappe nai'nannùk maimu yawàlà mettàik. Katù we'naikatok pàkànsau neken pùla, tùse tùwanmùla wema'nàtok pàkànsau nàlà.

₆Katù yapyoto pe tùwe'wotokomasan mùkyamlo, tùwotokoyi kon kupù pàk. Sàlà kasa iwechi pàk tùuse'masan amyamlo pùlayatta ke pata yesan yemyak. ₇Tamù'nawàlà ewe'womatok kon me'matàik, pata ponaloppe te'masen pe iwechi yau màlà me'matàik, wapùla yàlàlà yepeppù pe iwechi yau, me'matàik, kappon tùnamaik we'nàtok pe là iwechi yau, kappon mùnamatàik, wapùla kappon yapulàtok pe là iwechi yau mapulàtàik.

₈Kappon kù'womatàu, tùse echi'nùn pe we'nàtok ke neken me'womatàik, masapùla nù'là ku'nài tù'nùn pe wechi màlà Law yawàlà. ₉Law yau màlà, “Atayappù pen wapùla ànoppù pen pokonpe kettàu,” “Ànù'là kappon kù'wàtàu, Amappe kettàu, Ànù'là yemamin iche kettàu,” tawon {Ex 20.13-15,17, Deu 5 17-19, Deu 5.21}, tamù'nawolon sàlà yamùk molopai tùulon kon sàlà pokon pan kon wepilichak màlà tewinan enupantok pe, “Àtonpa kon ikuttàk à'nùn kon pe euchi'nùnma kon kasa,” tawon yau. ₁₀Màlàpàk ànù'là, tùtonpa ku'nài tù'nùn pe uya là àli kupù iwinàkàik pen màlà. Uchi'nùnmantok wechi màlà tamù'nawolon Law maimu yawàlà.

₁₁Sàlà uchi mùkuttàik, masapùla yà'là yekkwa yattai là iwechi ittu auya'nokon pàk. We'nùnnàtok yapai aupakatok kon yattai uyàssak man. Masapùla wepùikattàntok kon yattai mei pùla lùiwa man sàlà pe ailon teppù'nokon wapiya yentai nen uchi. ₁₂Ewalupà wenukassak lùiwa nen uchi man, wei welepansak lùiwa man. Ewalupà ponalok yà'làlà kupù pàk we'nàtok nokon yeleutanùppai'nokon man. Wepanta'mantok ike weinai yanùnpai'nokon man. ₁₃Welaikanpai'nokon uchi wakù pe, kappon yamùk weinai tùwemassan kasa, tùwechipottùmase là pùla tùwentaimepàsse pùla wapùla wetùnnàtok pùla, àli imakuyippù ànkuppai esak wannà ke we'nàtok pùla wapùla esak wettok ànkuppai pùla, wepanta'mantok pùla wapùla kùlùmàlunnàtok pùla. ₁₄Tùse Itepulu Jesus Christ ke epontàtàk kon, molopai àli ànkuppai ewettok kon yeselu pàk tùusenumenkaik molopai yawàlà kettàu.