Tùulon kon yauchinpatàk kon
1Kùmyamlo meluntà pe nai'nannùk ailontetok yau, wechi màlà attu'mùn pùikattànnan pe molopai iche we'nàtok nokon neken kasa tùwessan pe pùla. 2Masaichi we'ma'nàpai'nokon, kùmàlà pe làkku kùyakontalù kon yenu yailà wema'nàpai'nokon wakù pe iponaloppe, meluntà pe iwenatoppe ailontetok yau. 3Masapùla Christ là wechippù iche tùwettok kasa pen màlà. Tùse iwe'menukasak nai'nùk uya,
“Mottùnpantok àmottùnpappù lùppù ike mùkyamlo uya, wettùsak man upona,” te kasa. {Psa 69.9}
4Masapùla tamù'nawolon pena imenukasak lùssan màlà kùyenupatoppe ya imenukasak lùppù, pàlikantok molopai Katù Maimu uya ewan meluntàpatok yai enpen we'nàtok yepotoppe.
5Molopai tàwàchi Katù, pàlikantok molopai ewan meluntàpatok uyàttok iwinà, àkupùi'nokon esewan kaichalà Jesus Christ ya'là ewechi kon yawà, 6tewin itewan, tewin imaimu Katù Kùyepulu kon Jesus Christ Kàipùnù yapulàtoppe.
7Àtonpa kon yanùntàk kon, Christ uya ayanùnsak kon nai'nùk kasa Katù yapulàtok ipàkàlà pe. 8Masapùla tekamayaik àpàkù'nokon Christ wenappù mà Jew yamùk yattàsak kon yapyoto pe tà Katù wechi ailon pe yekama pe ikupù tùuya teppù lùppù tùnamasan Jew yamùk tamo yamùk pàk kusse ailon pe iwettoppe. 9Molopai Jew yamùk pen uya Katù yapulàtoppe ichentuppatok pàkàlà. Iwe'menukasak kasa,
“Màlàpàk ayapulà uya màlà Jew yamùk pen kùlottau, eyesek yapulà pe elen kupù uya,” tukaik. {2Sa 22. 50, Psa 18.49}
10Molopai tu'ma,
“Atauchinpatàk kon Jew yamùk pen. Katù nanùmùssan iponalok kon kappon yamùk pokonpe,”te ya. {Isa 11.10}
11Molopai tu'ma,
“Itepulu Katù yapulàtàk kon tamù'nawolon kon Jew yamùk pen, Itepulu Katù yapulàtàk kon tamù'nawolon kon kappon yamùk!” te ya. {Psa117.1}
12Molopai tu'ma Aichaya uya,
“Jesse pa uyàpù màlà, iwuluuka màlà Jew yamùk pen yepulu pe iwettoppe, molopai enpen tok wechi màlà ipàk,” te. {Isa11.10}
13Tàwà uchi Katù enpen we'nàtok uyàttok iwinà ayanùkkai'nokon tamù'nawolon utauchinpantok ke molopai echitonpa pe we'nàtok ke, ailon te auya'nokon ipàk yawàlà, Wakù Akkwalù meluntàlù winà enpen ewettok kon yau meluntà pe kulu ewechi kon pa.
Paul, Jew Yamùk Pen Pàk Itekale Yekamanài
14Utonpa yamùk, Iulà uyiwalà nùttuyan wakù pe we'nàtok ke awanùssak kon, tamù'nawolon tùttusan ke molopai kappon yenupanài yeppe ewechi kon àkklottau'nokon. 15Tùse sàlà kaleta yau we'namatok pùla kulu weppàssaik màlà yamùk pàk eyenu yapontà kon uya pàk. We'nama pùla weppàssaik masapùla Katù uya ulepasak wakù pe we'nàtok ke pàk. 16Màlàpàk Jesus Christ yapyoto pe tùwe'wotokomasen pe wenasak man Jew yamùk pen ponaloppe. Patele pe wechi kasa tùwe'wotokomasen Iulà, Wakù Itekale Katù winàpaino yekama pàk, Jew yamùk pen tùtoppe tùtùsen pe Katù nanùmù yeppe, itùsappe Katù yemyak tok wettoppe Wakù Akkwalù winà. 17Màlàpàk uchi Christ Jesus yau utauchinpa kulu sàlà, Katù wotokoyi yau we'wotokoma pàk. 18Màlàpàk yà'là yekkwa là pàk uselupaiche wechi pen sàlà. Màlà neken Christ nùkupùppù uyai pàk uselupa, Jew yamùk pen nepù uya Katù Maimu yawàlà tok wettoppe pàk, uselupappù lùpù pàkàlà molopai unkupùppù winà. 19Sàlà kupùppù uya yensappe pùla nai'nùk wapiya, enumenkanài molopai usenalippantoppe ku'nài meluntàlù winà, molopai Wakù Akkwalù meluntàlù winà. Màlàpàk mei pai Jerusalem poi Illyricum pùkkù yak, Wakù Itekale yekamasak uya man tamù'nawàlà, Christ yekale. 20Jesus yekale usekamappù yau pen pata yau Wakù Itekale enekamapaino Iulà tàwàlà, tùulon kon nùpyattàppù pàk we'wotokoma tukaik. 21Katù Maimu uya,
“Mùkyamlo Jesus yesek yekamappù ipàk pen ton wapiya, uya yene màlà, molopai mùkyamlo yetannannùssan pen uya ittu màlà,” te kasa. {Isa 52.15}
22Yetasak auya'nokn pàk sàlà pàkànsau echipalà'ne uwakkàtùppù màlà apyakù'nokon uyàpù tukaik.
Paul Wekkuttok Rome Kakklanpa Pàk
23Tùse nen uchi uwotokoyi yenuka'nùssak uya man sàlà yawolon pata yamùk yau, molopai tukke kilichimochi eyense'nokon àippai wessak man. 24Màlàpàk “sàlà pe'ne eyene kon uya” te uya sàlà Spain pona utà yau. Akakklanpasak kon uya malalà tùpo, wepùikattàtok yepolo uya ewinàpai'nokon pàk enpen wessaik utàtoppe màlà pata motak, 25Sàlà pe, utàyaik Jerusalem pona Katù ponalok kon kappon yamùk pùikattàse molo. 26Masapùla ailon tawonnan Jesus pàk Macedonia pon kon molopai Achaia pokon kon utauchinpasak man tùtùsen tùlù pàk yà'là pùnon sa'ne ponaloppe Katù ponalok kon Jerusalem pon kappon yamùk kùlottau nainannùk pùikattàtok. 27Màlà kupù pàk tok utauchinpasak wechippù màlà tùyiwalà'nokon. Tùse mùkyamlo yà'là pùnon sa'ne pùikattà nen tok uya màlà, masapùla Jew yamùk uya wakù Katù winàpaino intùlùppù pùkkù pe Jew yamùk pen masak pàk, màlàpàk uchi Jew yamùk pen uya Jew yamùk pùikattà màlà itesappe tùwettok kon ke. 28Sàlà wotoko yenuka'nùssak uya yau, molopai tamù'nawàlà itùsak lùppù tok ponaloppe tùsak uya tok yemyak yau, Spain pona utà màlà molopai akakklanpa kon uya màlà utà pe màlà motak. 29molopai tùttuyaik uyàpù apyakù'nokon yau, uyàpù tamù'nawolon Christ winàpaino wakù pokonpe.
30Apawanattàyatàu Iulà utonpa yamùk, Kùyepulu kon Jesus Christ winà molopai uchi'nùnmantok Wakù Akkwalù nùtùlù winà. Àwàpùlematok kon yau epanta'matà kon uponaloppe. 31Màpùlematàik uyesappe Katù wettoppe ailon tawonnan pen Judea pon kon winàpai, molopai we'wotokomatok Jerusalem po wettoppe auchinpanà pe molonkonnà Katù ponalok kon kappon yamùk pona. 32Katù yeselu yawàlà welepantoppe apyakù'nokon tùutauchinpaik kulu, molopai uyakwalù tùkà'maik àkklottau'nokon wettoppe. 33Tàwà uchi Katù, echitonpa pe we'nàtok yesak, tamù'nawàlà apyau'nokon nechii. Emen.
