Romans 2

₁Màlàpàk uchi ewe'waputtàtok ike pùla iwechi màlà, masapùla tùulon kon pàk, “Suwa iwechi,” tawon àmàlà, àpàk wa te auya pe iwechi màlà masapùla màlà lùppù tok nùkussai'nùk kupù auya pàk. ₂Sàlà yekkwa ton ku'nàinan pàk ikasa “Suwa messaik,” tawon pe Katù wechi ittu man. ₃Màlàyau àmàlà, kappon pe echii'ma “Suwa man,” te auya tùulon kon pàk molopai màlà lùssan kupù auya yau, Katù uya uchi “Suwa messaik,”tetok winàpai ewepe pe mùttuyan? ₄Wapùla ka' Katù wettok wakù pe ku'nài àmàlà i'nùmla lù? Wapùla pàlikantok ya molopai tùusentuppatok yau alikyeppe eyenpàtù ya. Mùttuyan uchi yà'là pe iwechi pàk Katù wechi tùusentuppasen pe? Masapùlaichi àli pe ewettok kon winàpai ewelattà kon iche tùwechi pàk. ₅Tùse sa'man pe kulu eyewan man elattàpai pùla molopai màlà uya we'naikantok pilichak man àpona Katù we'naikatok weyu ponaloppe ikasa “Suwa messaik, ” tetok ya yattai. ₆Katù uya tamù'nawolon kon kappon yamùk ye'ma màlà tok nùkupùppù pàkàlà. ₇Tùulon kon kappon yamùk wakù kupù pàk tùwessan, apulàntok, namantok molopai tàwàlàlà wema'nàtok iwannan. Mùkyamlo yemyak Katù uya tàwàlàlà wema'nàtok tùlù màlà. ₈Tùse mùkyamlo tùpàkù'nokon neken tùsenumenkasan molopai ailon nulunpannan àli kuttoppe tùuya'nokon pàk àsà pe Katù we'naika màlà. ₉Àsà pe wettalumattàntok molopai eke pe usewankono'mantok wechi màlà molo àli ku'nàinan winàkàik, Jew yamùk winàkàik wapiya molopai nàlà Jew yamùk pen winàkàik. ₁₀Tùse Katù uya apulàntok, namantok, molopai ewan wàlàkkattok tùlù màlà tamù'nawolon kon wakù ku'nàinan yemyak, Jew yamùk yemyak molopai nàlà Jew yamùk pen yemyak. ₁₁Masapùla Katù mùkkàlà tamù'nawolon kon kappon yamùk yennài ekkaichalà.

₁₂Tùulon kon kappon yamùk Jew yamùk pen mùkyamlo Law ittunnan pen. Màlàpàk àli ku'nàinan mùkyamlo molopai tok umatta màlà màlà pùla. Jew yamùk mùkyamlo Law ittunnan, tùse àli ku'nàinan mùkyamlo. Màlàpàk tok ittu màlà Law winà. ₁₃Masapùla Law yeta tok uya winà neken nà ikasa kappon yamùk yanùnsak Katù pokonpe pen màlà, tùse làkku ikupù tok uya winà. ₁₄Jew yamùk pen mùkyamlo Law pùnon, tùse tiyiwalà'nokon Law maimu yawolon kon, Law pùla lànen tùwechii'ma'nokon. Tùmàlà'nokon pe là Law kasa tok wechi. ₁₅Sàlà uyaichi màlà, Law wechi tok yewan yau yekama. Molopai tok usenumenkatok uya nàlà tùulon yattai ikasa tok wechi molopai ikasa pùla tok wechi yekama. ₁₆Sàlà wekkupù màlà Katù uya Jesus winà tamù'nawolon tonantawon kon kappon yamùk yewan yawon ittutok weyu yattai, itekale unekama uya yekama kasa.

₁₇Àmàlà nen Jew pe tùusesassen. Law pàk ailon tawon molopai Katù ittu auya pàk tùutapulàsen àmàlà. ₁₈Katù wettok ikupù auya iche mùttuyaik, masapùla apanamasak man Law yapai, ikasa nai'nùk kupù pa. ₁₉Enpùnon ye'ma yekamanài pe ewechi mùttuyaik, ewalupàttau là nai'nannùk weyu pe ewechi. ₂₀Pakko ton panamanài pe ewechi, molopai mule yamùk yenupanài pe. Masapùla Law yawon ittutok molopai ailon yesappe ewechi pàk. ₂₁Àmàlà nen uchi tùulon kon panamanài, tùwepanamasen pen ken na' àmàlà eyiwalà? Amappe we'nà tukaik itekale yekamanài àmàlà. Amappeichi tùwessen àmàlà? ₂₂“Ànoppù pen pokonpe kettàu,” tawon àmàlà tùse ken na' ànoppù pen pokonpe tùwessen àmàlà? Ailon pen katù yemloto po tùwepeimasen pen àmàlà tùse ken na' ipatassek yau ilapumanài àmàlà? ₂₃Law yesappe ewechi pàk tùutapulàsen àmàlà Katù pàk uchi tùwe'namasen pen àmàlà Law maimu ikkwàtù auya yau? ₂₄Iwe'menukasak lùppù kasa,

₂₅Law maimu yawàlà ewechi yau, Jew yamùk yattàtok yeselu wechi màlà tapulàsen pe. Tùse imaimu yawàlà pùla ewechi yau, yà'là pe pùla iwechi màlà pùikappe là pùla. ₂₆Tùulon kon Jew yamùk pen, Law yeselu ittunnan pen wechi imaimu yawàlà yau, Katù uya ken na' wakù pe Jew kasa lùppù ekkaichalà tok yene pen tok yattàtok yeselu yawàlà tok yattàsak pùla lànen tùse? ₂₇Mùkkàlà yattàsak pe pùla nai'nùk walà tùse law maimu yawàlà nai'nùk uya “Àli pe messaik ”te màlà àpàk. Ayattàsak lànen molopai Law yesappe lànen ewechi tùse imaimu yawàlà pùla ewechi pàk. _28-29Jew kulu pen mùkkàlà polopon neken molopai iichattàtok nai'nùk ipippà pàk neken. Jew kulu wechi màlà ailon pe i'nau, attànsak màlà tùwekkussen ewan yau Wakù Akkwalù winà, polopo là ikussak lùppù imenukasak nai'nùk Law yawàlà pen. Molopai kappon yapulàtok màlà kappon winàpaino pen tùse Katù winàpaino.