Romans 8

₁Màlàyau sàlà pe nen uchi mùkyamlo Christ Jesus ponaloppe tùwemassan talumattàtok ike pùla iwechi màlà. ₂Masapùla Wakù Akkwalù yeselu meluntàlù wema'nàtok ne'nài Christ Jesus ponalok kon piyak uya, upùikattàsak man makui yeselu molopai weli'nàtok winàpai. ₃Law nùkupù yentaino kupùppù Katù uya masapùla Law wechi attu'mùla pàk kappon yeselu wechi attu'mùla pàk, ikupùppù ya màlà tùmu yeunoko tùuya winà, iyàssak lùppù kappon pe àli pàkànsau tùtùsen pe.Màlàpàk makui yattu'mùnkappù ya kappon pe tùwechi ke. ₄Sàlà kupùppù Katù uya màlà Law maimu yawàlà tùwemassan pe we'nà'nokon usentoppe, àli, kappon wettok iche yawàlà pùla nen uchi Wakù Akkwalù yeselu yawàlà kulu. ₅Masapùla kappon wettok iche maimu yawàlà tùwemassan wechi màlà, teselu kon wettok iche itepulu pe. Mùkyamlo nen tà Wakù Akkwalù maimu yawàlà tùwemassan wechi màlà, Wakù Akkwalù wettok iche itepulu pe. ₆Àli kappon yeselu wechi màlà weli'nàtok ne'nài pe. Tùse eusenumenkatok kon yepulu pe Wakù Akkwalù wettok màlà wema'nàtok molopai echitonpa pe we'nàtok ne'nài. ₇Màlàpàk àli usenumenkantok wechi Katù yeyaton pe màlà. Masapùla Katù winàpaino Law yawàlà pùla iwechi pàk, molopai imaimu yawàlà iwechi yentai iwechi màlà. ₈Mùkyamlo teselu kon wettok iche maimu yawolon kon uya Katù yauchinpa yentai iwechi màlà.

₉Tùse amyamlo nen mùkyamlo eyeselu kon wettok iche maimu yawàlà tùwemassan pen. Wakù Akkwalù wettok iche maimu yawàlà tùwemassan amyamlo, Katù yakkwalù wemapù kan ayau'nokon yau. Ànù'là Christ yakkwalù yesappe pùla nai'nùk wechi màlà iponaloppe pùla. ₁₀Tùse Kùlaik wemapù ayau'nokon yau, eyesak kon wechi lànen iwelichak pe àli pàkàlà tùse, ayakkwalà kon wechi màlà nulà, pàli'yau masapùla ayanùnsak kon ikasa Katù pokonpe pàk. ₁₁Wakù Akkwalù iwinàpaino, Jesus uluukanàippù wema'nàtok yak wechi ayau'nokon yau, mùkkàlà Kùlaik uluukanàippù weli'nàtok yapai wema'nàtok yak, uya nàlà tùumattasen eyesak lepa màlà wema'nàtok ke Wakù Akkwalù nemassai'nùk ayau'nokon winà

₁₂Màlàpàk uchi, utonpa yamùk, kùyeselu kon wettok iche maimu yawàlà tùwemassan pe we'nà'nokon pen nen uchi nai'nùk ₁₃Masapùla ewemapù kon eyeselu kon maimu yawàlà yau, ewelikù kon màlà, tùse Wakù Akkwalù yapàikketù winà. Àli eyeselu kon yeleutanùssak auya'nokon yau, ewemapù kon màlà. ₁₄Katù Yakkwalù yemyawon kon molopai inpininpa ton mùkyamlo Katù munkà yamùk pe tùwessan kappon yamùk. ₁₅Masapùla Wakù Akkwalù Katù uya elepatok kon màlà apyoto pe àku'nài'nokon pen molopai eusenalipa kon pa tu'ma àku'nài'nokon pen, tùse Wakù Akkwalù làkku màlà Katù munkà yamùk pe àku'nài'nokon. Molopai Wakù Akkwalù meluntàlù winà Katù pàk, “Abba! Ukàipùpù!” tawonnan kùmyamlo. ₁₆Wakù Akkwalù mùkkàlà echipatùnayi pe tùwessen kùyakkwalù kon pokonpe Katù munkà yamùk pe we'nà'nokon yekama pe. ₁₇Imunkà yamùk pe we'nà'nokon pàk, wakù inkupù tùponalok kon ponaloppe yesappe we'nà'nokon màlà Christ, imu, pokonpe. Masapùla Christ wettalumattàppù kasa wettalumattàn pàk alikyeppe we'nà'nokon yau, namantok nàlà yepolo màlà ipokonpe.

₁₈Tùttuyaik wettalumattàn nokon nai'nùk sàlà pe wechi màlà tamù'nawolon namantok tùusenpoika woton pe nai'nùk kùyau'nokon ma'le kulu. ₁₉Tamù'nawolon Katù nùkonekassan enpen man tùmunkà yamùk yekama ya yentok yattai màmuku pàk. ₂₀Masapùla inkonekassan wechippù màlà tapulàsen pe pùla itùwalà pùla tùse Katù yiwalà, masapùla enpen tùwechi pàk. ₂₁Inkonekassanùssan kupù màlà imokkasappe kàtantok nappàtù pe pùla, molopai imunkà yamùk tonpa pe inonka inamatoppe. ₂₂Masapùla ittu'nokon man sàlà wei tepose tamù'nawolon ikonekasak ya'nùmù icheka'nonka tùwentusen wechi'mosak utaimelunpa kasa. ₂₃Tùse ikonekasak neken pen, kùmyamlo nàlà Wakù Akkwalù yesappe nai'nannùk wapiya kulu Katù uya lepantok yesappe nai'nannùk, kùmyamlo nàlà na'nùnyan molopai nùseka'nonkayan kù'nau'nokon Katù uya tùponalok kon pe kùyesatù kon màmuku nai'nùk pàk. Molopai tamù'nawàlà kùmokka kon ya kùyesak kon ukàtatok winàpai màmuku pàk . ₂₄Masapùla sàlà enpen we'nàtok yai wepùikattànsakù'nokon màlà. Tùse enpen we'nàtok ipàk yene'nokon yau, enpen we'nàtoppe pùla nen uchi iwechi màlà. Masapùla ànùk ken enpen tùwessen tùnene pàk? ₂₅Tùse enpen we'nà'nokon kùnene kon pen pàk yau, imàmu'nàinan kùmyamlo tùusetakaik pùla.

₂₆Màlà kasa làma Wakù Akkwalù nàlà tùuyàssen kùpùikattàse, masapùla attu'mùla we'nà'nokon pàk. Masapùla yà'là kasa wàpùleman wakù pe ittu'nokon pùla iwechi pàk, Wakù Akkwalù mùkkàlà tùutaimelunpaik ta'nùmùi'ma tùwàpùlemasen kùponalok kon pe, yekama yentaino mayin yau. ₂₇Molopai Katù, kappon yamùk yewan yennài, mùkkàlà Wakù Akkwalù usenumenkatok ittunài. Masapùla Wakù Akkwalù mùkkàlà Katù pawanattànài Katù munkà yamùk ponaloppe Katù yeselu yawàlà.

₂₈Masapùla ittu'nokon man tamù'nawàlà yà'làlà yau Katù we'wotokoma, mùkyamlo tù'nùnmannan ponaloppe, wakù wekkuttoppe yai teselu yawàlà, mùkyamlo tùnkà'massan teselu yawàlà ponaloppe. ₂₉Masapùla Katù uya màlà tùnanùmù woton kon ittukassak pena, tùmu kasa nen uchi tok wettoppe, ipùkkù pe tok wena wettoppe, Tùmu wettoppe wapiyaloppe tukkan kon tùtonpa yamùk kùlottau. ₃₀Màlàpàk Katù uya màlà tùnùttussan wapiya kà'mappù. Tok kà'mappù ya neken pen màlà, tuse ikasa nàlà tok yanùmùppù ya tùpokonpe. Ikasa neken tok yanùmùppù ya tùpokonpe pen màlà tùse tùnamatok pùkkù pe nàlà tok kupùppù ya màlà.

₃₁Yà'là te'nokon ken uchi sàlà yamùk wechi kùyemloto kon po pàk. Katù wechi kùwinà yau, ànùk wechi ken kùyeyaton pe. ₃₂Tùmu wenai iwechippù pen màlà, tùse itùlùppù ya tamù'nawolon kon kùponalok kon pe iwelittoppe! Tùmu ke kùlepappù kon ya kùlepa kon ya pen ken na' uchi tamù'nawolon yà'làlà ke wakù pe tùwettok yapai? ₃₃Ànùk uselupa ken àli pe Katù nanùmùssan iponalok kon kappon yamùk pàk? Katù mùkkàlà ikasa tok wechi yekamanài! ₃₄Ànù'là uya ken na' uchi tok talumattà? Ànù'la pùla iwechi màlà masapùla Christ Jesus mùkkàlà iwelichak lùppù, molopai iwuluukasak lùppù weli'nàtok yapai molopai sàlà pe namantok patassek kamik pen Katù yemyatù winà man. Katù pawanattànài mùkkàlà kùponalok kon pe! ₃₅Ànùk uya ken uchi kùpantaka kon Christ uya pùnùnmantok winàpai? Utaimelunpatok uya ka' ikupù lù, wapùla yà'làlà sa'man, wapùla talumattàntok, wapùla iwan pe we'nàtok, wapùla italumayippù pe we'nàtok, ipon pùla we'nàtok, wapùla yà'làlà àsà pe nai'nùk, wapùla weli'nàtok? ₃₆Katù Maimu uya,