1Sàlà màlà Paul, Katù yapyoto, Jesus Christ neunokoppù winàpaino.
Uyanùmùppù màlà molopai uyeunokoppù Katù nanùmùssan uya ailon tetok pùikattàse, molopai tok yenupase yà'là kasa ailon pe kulu Katù ponaloppe wema'nàtok pàk, 2màlà enpen we'nàtok, tàwàlàlà wema'nàtok po iwekkusak. Katù, kasei pe tùwessen pen uya, kùlepa kon tùuya teppù lùppù sàlà wema'nàtok, sàlà non molopai yawon kon wepyatà wapiya, 3molopai iwalai iweyu yattai màlà yenpoikappù ya Wakù Itekale tekale yau. Sàlà tùlùppù màlà uyemyak, molopai yekamanài Iulà, Katù kùpàikattànài'nokon uya enupantok yawàlà.
4Kaleta tùmenukayaik Titus piyak, umu kasa kulu unkupù ailon tetok ipùkkù pe we'nà nai'nùk yau:
Tàwà Katù Kùkàipùnù kon molopai Christ Jesus kùpùikattànàippù elepai wakù pe we'nàtok molopai echitonpa pe we'nàtok tùwinàpaino ke.
Titus Wotokoyi Crete Po
5Ànàmàppù uya Crete po yà'làlà kupù pa ikasa màlà yamùk tùkussen pe lùppù nai'nùk, molopai sochi yennài nan woton kon yanùmù pa tamù'nawolon patassek yamùk yau. Enupantok uya lùppù kan mùttuik tà: 6Pùsàlà kappon sochi yennài wechi màlà wakù pe itekale; tewin neken inoppù iwechi màlà, molopai imunkà wechi màlà ailon tawonnan pe molopai àli pe là itekale pùla, wapùla mayin yawolon pe pùla là tuwessen pe pùla. 7Masapùla Katù wotokoyi yesappe iwechi pàk, sochi yennài wechi màlà ikasa pùla là tùwemassen pe pùla. Yà'làlà ànkuppaino tùyiwalà teselu yau pe pùla iwechi màlà, wapùla asse'ne tùwe'naikasen pe pùla, wapùla tùwetùnsen pe pùla, wapùla àsà pe pùla, wapùla pùlayatta pàk tùuseka'nonkasen pe pùla. 8Tùutauchinpaik kappon yamùk yanùnnài pe tùwùk tak molopai màlà wakù pe nai'nùk pùnùnmanài pe. Tesak yepulu pe tùwemassen pe yà'làlà àli ànkuppai tùwettok winàpai, ikasa, wakù pe Katù yenu yau, molopai tùttuik tùwemassen pe. 9Wakù Itekale pàk meluntà pe tùwemassen pe, ailon tetok ipàk pe enupantok uya panamantok yawàlà. Sàlà kasa tùulon kon meluntàtanpù ya màlà ailon enupantok ke, molopai nàlà iwalai pen yekama ya mùkyamlo ailon yeya'noma yai'nannùk pàk.
10Masapùla molo tok man tukke, mùkyamlo, Katù Maimu yawolon kon pen molopai tùulon kon yennakannan tùusennakatok kon tùpantomù kon ke, mùkyamlo kulu Jew yamùk usattàtok pàk enupantok yawolon kon. 11Tok uselupa yeleutanùpù pe là nen iwechi màlà, masapùla kappon yamùk yaimelunpayan tok, tok munkà pokonpe màlà enupantok tùuya'nokon yekama tùuya'nokon ke, màlà kappon yenupatok yek pen ke, àli pàkànsau pùlayatta yepotoppe tùuya'nokon. 12Crete pon kàyik, tok maimu yenpoikannan tonpa, mùkkàlà uya, “Crete pon kon mùkyamlo kasei ton tàwàlà, molopai àsà ton kamo yamùk walai non, molopai emya'nek ton kappon yamùk tùse eke pe tùuta'lettàsan,” teppù. 13Molopai wa teppù ya lùppù màlà ailon. Sàlà kasa iwechi pàkànsau tok yàulàma auya màlà àsà pe, iwalai meluntà ailon tetok wettoppe tok piyau, 14molopai Jew yamùk pantomù ailon pen kupù pàk tok wechi tukaik molopai kappon yamùk uya enupantok mùkyamlo kappon yamùk ailon nulunpannannùsan nekamappù pàk ailon te tukaik. 15Tamù'nawolon màlà wakù esukenan, mùkyamlo esukenan kon pona; tùse yà'làlà wechi màlà esuken pùla mùkyamlo àli pe iwenasak kon pona molopai ailon tawonnan pen pona, masapùla tok usenumenkatok wenasak màlà àli pe molopai tok usenumenkatok yaimelunpa àli, tok nùkupùppù uya pàk. 16Tok uya, “Katù ittunài Iulà,” te màlà; tùse tok welaikatok uya yenpoika pùla iwechi màlà. Akùlù ton mùkyamlo, molopai mayin yawolon kon pen, wakù ku'nàinan pe tok wechi pùla iwechi.
