Den man di waka baka David
1Disi na den man di ben go na David na Siklag fu waka nanga en, a pisten di David ben abi fu kibri gi Saul, a manpikin fu Kis. Den man disi ben de dyadya fetiman tu, di ben e yepi en ini a feti. 2Den man disi ben man fringi ston nanga slinger èn sutu den bo nanga den kruktu anu èn nanga den leti anu. Den man disi di ben de fu a srefi lo fu Saul fu Benyamin, ben de: 3Akiyeser nanga Yoas, den manpikin fu Semaa fu Gibea. Akiyeser ben de a edeman fu den. Moro fara: Yesiyel nanga Pelet, den manpikin fu Asmawet. Beraka nanga Yehu fu Anatot. 4Yismaya fu Gibeon. A man disi ben de wan fu den dritenti dyadya fetiman èn a ben de a edeman fu den. Moro fara yu ben abi Yirmeya, Yakasiyel, Yokanan nanga Yosabad fu Gedera. 5Elusai, Yerimot, Bealya, Semarya nanga Sefatya fu Harif. 6Elkana, Yisia, Asarel, Yoeser nanga Yosobam. Den man disi ben de bakapikin fu Korak. 7Yowela nanga Sebadya, den manpikin fu Yerokam fu Gedor.
8Man fu a lo fu Gad ben go na David tu fu waka nanga en di David ben de ini a tranga kibripresi ini a dreisabana. Den man dati ben de dyadya fetiman, srudati di ben sabi a feti. Den ben de nanga schild nanga lansri. Den ben gersi lew èn den ben gaw leki dia. 9A fesiman fu den ben de Eser. A di fu tu ben de Obadya. A di fu dri Eliab. 10A di fu fo Mismana. A di fu feifi Yirmeya. 11A di fu siksi Atai. A di fu seibi Eliyel. 12A di fu aiti Yokanan. A di fu neigi Elsabad. 13A di fu tin Yirmeya. A di fu erfu Makbanai. 14Ala den man disi, fu a lo fu Gad, ben de edeman fu a legre. A moro pikinwan na den mindri ben man feti nanga wan hondro man, a moro heiwan nanga dusun man. 15Na den man disi ben koti a Yordanliba abra ini a fosi mun fu a yari di a watra fu a liba ben hei kon te na syoro dan den yagi den sma di ben e libi na oostsei nanga westsei fu a dal.
16Wan leisi wantu man fu den lo fu Benyamin nanga Yuda go na David na a kibripresi fu en. 17David waka kon na dorosei, dan a taigi den taki: “Efu un kon nanga bun prakseri, fu kon yepi mi, mi e teki unu nanga opo anu. Ma efu un kon fu kan go konkru mi na mi feyanti, a Gado fu wi afo sa si dati èn strafu unu, bika mi no du no wan ogri.” 18Ne a Yeye fu Gado kon tapu Amasai, a edeman fu den dritenti dyadya fetiman. A taki: “Wi na fu yu, David. Na yu wi kon yepi, manpikin fu Isai. Freide sa de nanga yu nanga den wan di e yepi yu, bika yu Gado e yepi yu!” Dan David teki den ini a grupu fu en èn a poti den leki fesiman!
19Man fu a lo fu Manase ben teki a sei fu David tu di David ben e hari gwe nanga a legre fu den Filistijnsma fu go feti nanga Saul. Ma David no ben feti gi den Filistijnsrudati moro bika den kownu fu den Filistijnsma ben seni en gwe. Den ben prakseri taki David ben o feti nanga den èn kiri den efu a ben teki a besroiti fu drai go baka na Saul. 20Na den man disi fu a lo fu Manase, ben teki a sei fu David di a ben go na a Siklag: Adna, Yosabad, Yediael, Mikael, Yosabad, Elihu nanga Siletai. Ala den man disi ben de edeman fu grupu fu wan dusun fetiman fu a lo fu Manase. 21Na den ben e yepi David te a ben e go feti nanga tra grupu. Den alamala ben de dyadya fetiman en den tron tiriman fu a legre fu David. 22Ala dei sma ben e kon fu waka baka David, èn so a legre fu en ben kon tron wan bun bigi legre.
23Disi na den nomru fu den fetiman di kon nanga ala den fetisani na David na Hebron, fu yepi en tron kownu na a presi fu Saul, soleki fa MASRA ben pramisi: 24fu a lo fu Yuda: siksi dusun aiti hondro fetiman nanga schild nanga lansri, di ben de klar'klari fu feti. 25Fu a lo fu Simeon: seibi dusun wan hondro dyadya fetiman. 26Fu a lo fu Lefi: fo dusun siksi hondro man. 27Na den mindri yu ben abi Yoyada, wan edeman fu den bakapikin fu Aaron, di ben kon nanga dri dusun seibi hondro man fu en. 28Moro fara Sadok, wan yongu dyadya fetiman, makandra nanga en famiri, tutenti-na-tu edeman. 29Fu a lo fu Benyamin, a lo pe Saul ben kmoto tu, dri dusun man. Ma moro furu fu den sma fu a lo fu Benyamin ben tan na a sei fu a famiri fu Saul. 30Fu a lo fu Efraim: tutenti dusun aiti hondro dyadya fetiman. Ala den man dati ben abi bigi nen ini den famiri. 31Fu afu fu a lo fu Manase: tin-na-aitidusun. Den man disi ben kon spesrutu fu poti David leki kownu. 32Fu a lo fu Isakar: tu hondro edeman makandra nanga den fetiman fu a lo fu den. Den sma fu a lo disi ben sabi fa fu luku efu a ben de a yoisti ten fu du wan sani, fu den ben kan sabi san Israel ben mus du. 33Fu a lo fu Sebulon: feifitenti dusun man di ben klar'klari fu feti nanga ala sortu fetisani. 34Fu a lo fu Naftali: wan dusun edeman, makandra nanga dritenti-na-seibi dusun fetiman nanga schild nanga lansri. 35Fu a lo fu Dan: tutenti-na-aiti dusun nanga siksi hondro fetiman di ben klar'klari fu feti. 36Fu a lo fu Aser: fotenti dusun fetiman di ben klar'klari fu feti. 37Fu den lo di ben e libi na a tra sei fu a Yordanliba, a lo fu Ruben, Gad nanga a tra afu fu a lo fu Manase, wan hondro nanga tutenti dusun man di ben abi ala sortu fetisani.
38Ala den bun fetiman disi, ben kon na Hebron nanga wan prakseri nomo, fu yepi David tron kownu fu heri Israel. Ala den tra Israelitisma ben agri nanga a sani dati tu, fu meki David tron kownu. 39Dri dei langa den tan drape nanga David. Den ben e nyan, den ben e dringi, bika den famiri fu den ben seti ala sani poti gi den kba. 40Den alamala, srefi den lo di ben e libi fara, soleki Isakar, Sebulon nanga Naftali, ben tyari nyanyan sani kon tapu buriki, kameel nanga kaw, soleki: blon, drei figa, rosen, win nanga oli. Den tyari bun furu kaw, skapu nanga krabita kon tu, bika Israel ben e prisiri.
