1 Historia 2

₁Disi na den manpikin fu Israel: Ruben, Simeon, Lefi, Yuda, Isakar, Sebulon, ₂Dan, Yosef, Benyamin, Naftali, Gad nanga Aser.

₃Den manpikin fu Yuda ben de: Er, Onan nanga Sela. A ben meki den dri pikin disi nanga a umapikin fu Sua fu Kanaan. Ma MASRA ben kiri Er, a fosi manpikin fu Yuda, fu di a no ben libi srefsrefi leki fa MASRA wani. ₄Yuda meki tu manpikin tu nanga Tamar, a uma fu a boi fu en di ben dede. Den nen fu den boi ben de Peres nanga Serak. Ala nanga ala Yuda ben abi feifi manpikin. ₅Den manpikin fu Peres ben de Hesron nanga Hamul. ₆Serak ben abi feifi manpikin: Simri, Etan, Heman, Kalkol nanga Dera.

₇A manpikin fu Karmi ben de Akar. Na Akar ben meki a bigi ongoloku miti Israel, fu di a ben fufuru sani di ben de spesrutu gi MASRA. ₈A manpikin fu Etan ben de Asarya.

₉Den manpikin fu Hesron ben de: Yerakmeel, Ram nanga Kelubai. ₁₀Ram ben de a p'pa fu Aminadab. Aminadab ben de a p'pa fu Nakson, a tiriman fu a lo fu Yuda. ₁₁Nakson ben de a p'pa fu Salma. Salma ben de a p'pa fu Boas. ₁₂Boas ben de a p'pa fu Obed. Obed ben de a p'pa fu Isai. ₁₃Isai ben de a p'pa fu Eliab, en fosi manpikin. A di fu tu ben de Abinadab èn Sima ben de a di fu dri. ₁₄A di fu fo ben de Netanel, a di fu feifi Radai, ₁₅a di fu siksi ben de Osem èn David ben de a di fu seibi. ₁₆Den sisa fu den ben de Seruya nanga Abigail. Seruya ben abi dri manpikin: Abisai, Yoab nanga Asael. ₁₇Abigail ben de a m'ma fu Amasa. A p'pa fu Amasa ben de a Ismaelitiman Yeter.

₁₈Kaleb, a manpikin fu Hesron, kisi wan umapikin nanga en uma Asuba, di den kari Yeriot. Den manpikin fu en ben de: Yeser, Sobab nanga Ardon. ₁₉Di Asuba dede, Kaleb teki Efrat leki en uma. A uma dati meki Hur gi en. ₂₀Hur ben de a p'pa fu Uri èn Uri ben de a p'pa fu Besaleyel.

₂₁Di Hesron ben abi siksitenti yari, a teki wan fu den umapikin fu Makir, a p'pa fu Gilead, leki uma. A uma dati meki wan boi gi en di den kari Segub. ₂₂Segub ben de a p'pa fu Yair. Yair ben abi tutenti-na-dri dorpu ini a kondre Gilead. ₂₃Ma den kondre Gesur nanga Aram ben teki den dorpu fu Yair abra makandra nanga Kenat nanga den dorpu fu en. Ala nanga ala den teki siksitenti dorpu abra di ben de fu Makir, a p'pa fu Gilead.

₂₄A uma fu Hesron ben de Abia. Baka di Hesron dede Kaleb nanga Efrat kisi wan boi di den kari Askur. Na en bow a foto Tekoa.

₂₅Den manpikin fu Yerakmeel, a fosi manpikin fu Hesron, ben de: Ram, a fosiwan, dan yu ben e kisi Buna, Oren, Osem nanga Akia. ₂₆Ma Yerakmeel ben abi wan tra uma ete di ben nen Atara. En ben de a m'ma fu Onam. ₂₇Den manpikin fu Ram, a fosi manpikin fu Yerakmeel, ben de: Maas, Yamin nanga Eker. ₂₈Den manpikin fu Onam ben de Samai nanga Yada. Den manpikin fu Samai ben de Nadab nanga Abisur. ₂₉A uma fu Abisur ben nen Abihail. Den pikin di a meki gi Abisur ben de Akban nanga Molid. ₃₀Den manpikin fu Nadab ben de Seled nanga Apaim. Seled dede sondro fu kisi pikin. ₃₁Apaim ben de a p'pa fu Yisi. Yisi ben de a p'pa fu Sesan. Sesan ben de a p'pa fu Aklai. ₃₂Den manpikin fu Yada, a brada fu Samai, ben de Yeter nanga Yonatan. Yeter dede sondro fu kisi pikin. ₃₃Den manpikin fu Yonatan ben de Pelet nanga Sasa. Den alamala ben de bakapikin fu Yerakmeel. ₃₄Sesan no ben abi manpikin. A ben abi soso umapikin. A ben abi wan knekti fu Egipte di ben nen Yarka. ₃₅Dan Sesan gi wan fu den umapikin fu en leki frow na en knekti Yarka. A uma meki wan boi di den kari Atai. ₃₆Atai ben de a p'pa fu Natan èn Natan ben de a p'pa fu Sabad. ₃₇Sabad ben de a p'pa fu Eflal èn Eflal ben de a p'pa fu Obed. ₃₈Obed ben de a p'pa fu Yehu èn Yehu ben de a p'pa fu Asarya. ₃₉Asarya ben de a p'pa fu Heles èn Heles ben de a p'pa fu Elasa, ₄₀Elasa ben de a p'pa fu Sisemai èn Sisemai ben de a p'pa fu Salum, ₄₁Salum ben de a p'pa fu Yekamya èn Yekamya ben de a p'pa fu Elisama.

₄₂A fosi manpikin fu Kaleb, a brada fu Yerakmeel, ben de Mesa. Na en bow a foto Sif. Maresa bow Hebron. ₄₃Den manpikin fu Hebron ben de: Korak, Tapua, Rekem nanga Sema. ₄₄Sema ben de a p'pa fu Rakam, di bow a foto Yorkeam, èn Rekem ben de a p'pa fu Samai. ₄₅Samai ben abi wan boi, Maon, èn na en bow a foto Bet-Sur.

₄₆Kaleb ben abi wan uma nanga san a ben e libi tu. A uma disi ben nen Efa. Nanga Efa Kaleb kisi Haran, Mosa nanga Gases. Haran kisi wan manpikin di a kari Gases tu. ₄₇Den manpikin fu Yodai ben de: Regem, Yotam, Gesam, Pelet, Efa nanga Saaf.

₄₈Maaka, wan fu den uma nanga san Kaleb ben e libi tu, ben kisi Seber nanga Tirkana. ₄₉Baka wan pisten a kisi Saaf, di bow a foto Madmana, nanga Sewa, di bow den foto Makbena nanga Giba.

Kaleb ben abi wan umapikin tu di ben nen Aksa.

₅₀Disi na tra bakapikin fu Kaleb. A fosi manpikin fu Kaleb nanga Efrat ben de Hur. Den manpikin fu Hur ben de Sobal, di bow a foto Kiryat-Yearim, ₅₁Salma, di bow a foto Betlehem, nanga Haref, di bow a foto Bet-Gader. ₅₂Sobal, di bow a foto Kiryat-Yearim, ben de a afo fu den sma fu Haroe nanga afu fu den sma di ben e libi na Menukot. ₅₃Den famiri di ben e libi na Kiryat-Yearim ben de den famiri fu: Yeter, Put, Suma nanga Misra. Den sma fu Sora nanga Estaol ben de bakapikin fu den sma fu Misra. ₅₄Den sma di ben e libi na Betlehem, na Netofa, Atrot-Bet-Yoab, afu fu den sma fu Manakat nanga den Soritisma ben de bakapikin fu Salma. ₅₅Moro fara den famiri ini Yabes di ben de skrifiman. Dati ben de a famiri Tira, a famiri Sima nanga a famiri Suka. Den sma disi na Kenitisma fu Hamat, fu pe den Rekabitisma ben kmoto tu.