David e gi Salomo a wroko fu bow a tempel
1Dan David seni kari ala edeman fu Israel fu kon na Yerusalem: den edeman fu den lo, den edeman fu den wrokoman fu kownu, den ofisiri di ben e tiri wan dusun srudati, den ofisiri di ben e tiri wan hondro srudati, den man di ben abi a frantwortu fu ala den gudu nanga den meti di kownu nanga den manpikin fu en ben abi, den heihei wrokoman na a kownu-oso, den dyadya fetiman nanga ala tra prenspari sma.
2Di den kon makandra, kownu opo tnapu, dan a taki: “Brada fu mi, mi pipel, un arki mi: Mi ben e waka nanga a prakseri tak' misrefi ben o bow wan oso pe a santa kisi fu a ferbontu fu MASRA, a futubangi fu a Gado fu wi, ben o abi wan eigi tanpresi. Mi poti ala sani klari fu a oso dati kan bow. 3Ma Gado ben taigi mi taki: ‘A no yu o bow wan oso gi a nen fu Mi, bika yu na wan fetiman èn yu meki brudu lon.’ 4Ma MASRA, a Gado fu Israel, teki mi na mindri fu mi heri famiri, fu poti mi leki kownu abra Israel fu têgo. A bigin na a lo fu Yuda, di A teki fu tiri Israel. Fu a lo dati, a teki a famiri fu mi, èn fu ala den manpikin fu mi p'pa, A ben feni en bun fu poti Mi leki kownu fu heri Israel. 5MASRA gi mi furu manpikin, èn na Salomo A teki puru na mindri ala den manpikin dati, fu teki presi tapu a kownusturu fu MASRA, di e rigeri abra Israel. 6MASRA ben taigi mi taki: ‘Na yu manpikin Salomo o bow a oso fu Mi nanga den pren. Mi teki en leki Mi manpikin èn Mi o de leki wan p'pa gi en. 7Efu a tan hori den gebod nanga den sani na san a mus tan hori ensrefi, soleki fa a e du now, Mi o sorgu tak' na soso pikin nanga bakapikin fu en sa de kownu fu têgo.’
8We dan, fesi heri Israel, a folku di MASRA tyari kon makandra, èn nanga Gado leki kotoigi, mi e taigi un taki: Un hori un na ala den gebod fu MASRA èn un du san den e taki. Dan un o man hori a bun kondre disi gi unsrefi èn libi en na baka gi den pikin nanga den bakapikin fu unu leki wan têgo gudu. 9Yu, mi boi Salomo, sabi a Gado fu yu p'pa. Dini en nanga yu heri ati èn gi yusrefi abra na En nanga wan fri wani. Bika MASRA e ondrosuku ala ati èn A sabi ala den angri nanga den prakseri fu libisma. Efu yu suku En, A o meki yu feni En, ma efu yu drai baka gi En, A o poti yu fu têgo na wan sei. 10Luku, na yu MASRA teki fu bow wan oso, di sa de wan santa presi, gi En. So, teki dek'ati èn du a wroko.”
11Dan David langa a papira gi en manpikin Salomo, di ben e sori fa a fes'sei gadri ben mus meki, den kamra baka a gadri, den kamra pe den gudu ben o tan, den kamra na loktusei, den kamra na inisei, nanga a kamra gi a santa kisi nanga a tapun fu en. 12Ala san ben kon ini a prakseri fu David, ben de tapu papira: fa den pren fu a oso fu MASRA ben mus meki, den difrenti kamra lontu den pren, den kamra fu a oso fu Gado pe den gudu ben o tan, nanga den kamra fu den gudu di sma ben poti spesrutu na wan sei gi Gado. 13A sori en tu fa sani seti gi den difrenti grupu priester nanga Lefitiman, gi a wroko ini a oso fu MASRA, nanga gi ala den wrokosani di ben o de fanowdu fu du a wroko ini a oso fu MASRA. 14A sori Salomo srefi nanga omeni gowtu noso solfru ala wrokosani gi den difrenti wroko ben mus meki, 15sobun nanga omeni gowtu den gowtu kandelaar nanga den gowtu lampu fu den ben mus meki èn nanga omeni solfru den solfru kandelaar nanga den lampu fu den ben mus meki. Ibri kandelaar ben e meki gi wan spesrutu wroko nanga someni gowtu noso someni solfru. 16A sori en tu nanga omeni gowtu den tafra ben mus meki pe den ben e poti den brede di ben de spesrutu gi Gado, nanga fu omeni solfru den solfru tafra ben mus meki. 17A sori en moro fara nanga omeni lala gowtu den wrokosani ben mus meki soleki: den forku, den beki, den watrakan, den gowtu komki nanga den solfru komki. 18Te fu kba David sori Salomo nanga omeni lala gowtu a altari ben mus meki tapu san wierook ben mus bron, nanga omeni gowtu a wagi ben mus meki, nanga omeni gowtu den kerub ben mus meki, di ben o bradi den frei abra a santa kisi fu a ferbontu fu MASRA. 19Dan kownu David taki: “Ala den sani disi mi skrifi poti tapu papira baka di MASRA sori mi fa den mus meki.”
20Te fu kba, kownu David taigi en manpikin Salomo taki: “Yu mus tranga, yu mus abi dek'ati èn yu mus du a wroko. No frede èn no lasi ati, bika MASRA Gado, a Gado fu mi, de nanga yu. A sa de alaten nanga yu, A no sa gwe libi yu, te leki yu kba bow a oso fu MASRA. 21Luku, difrenti grupu priester nanga Lefitiman de klar'klari fu du den wroko ini a oso fu Gado. Gi den difrenti sortu wroko di mus du, yu abi wrokoman tu di sabi a wroko èn di tnapu klar'klari fu du a wroko. Den edeman nanga a heri pipel tnapu klari tu fu du ala san yu o taki.”
