Yesus opo baka na dede
1Brada nanga sisa, mi e memre unu na a bun nyunsu di mi ben ferteri unu. Un bribi en èn un e libi now leki fa a taki. 2A bun nyunsu disi e ferlusu unu, efu un tan hori en soleki fa mi ben ferteri unu. Noso un bribi en fu soso. 3Bika mi ferteri unu a moro prenspari sani san mi srefi ben leri, èn dati na taki Kristus dede fu wi sondu ede soleki fa a Santa Buku ben taki. 4Den beri En, ma tapu a di fu dri dei A opo baka na dede, soleki fa a Santa Buku ben taki. 5Dan A sori Ensrefi na Kefas, baka dati A sori Ensrefi na den twarfu man di ben teki leri fu En. 6Baka dati A sori Ensrefi na moro leki feifi hondro brada nanga sisa di den ben de makandra. Sonwan fu den dede kba, ma moro furu fu den e libi ete. 7Dan A sori Ensrefi na Yakobus, baka dati na ala den boskopuman fu En. 8Na a kba, A sori Ensrefi na mi tu. Mi di de leki wan pikin di no gebore tapu en ten. 9Bika ala den boskopuman fu Yesus prenspari moro mi. Mi no warti srefi fu tyari a nen: boskopuman fu Yesus. Bika mi ben de na a gemeente fu Gado baka fu du den ogri. 10Ma Gado sori mi En bun-ati, dat' meki mi de tide san mi de. A no fu soso A sori mi En bun-ati, bika mi wroko moro tranga leki ala den trawan. Ma a no mi du a wroko. Na a bun-ati fu Gado ben de nanga mi. 11Dat' meki a no abi trobi efu na mi noso den trawan e taki. Disi na san wi e preiki, èn na disi un bribi tu.
Den dedesma o kon na libi baka
12Efu wi e ferteri un taki Kristus kon na libi baka, dan fa a kan dati sonwan fu unu e taki tak' dedesma no e opo baka? 13Bika efu a tru taki dedesma no e opo baka, dan Kristus no opo baka tu. 14Èn efu Kristus no opo baka, dan den sani san wi e ferteri unu no abi warti, èn a bribi fu unu no abi warti tu. 15Dan a sori taki wi leki ketoigi fu Gado lei gi En, bika wi ferteri taki A meki Kristus kon baka na libi. Ma efu dedesma no e opo baka, dan Gado no meki Kristus opo baka. 16Bika efu dedesma no e opo baka, dan Kristus srefi no opo baka tu. 17Èn efu Kristus no opo baka, dan a bribi fu unu na wan soso sani, dan un no kon fri fu un sondu. 18Èn dan den sma di dede nanga a bribi ini Kristus go lasi. 19Efu a howpu san wi abi ini Kristus, de soso fu wi libi dya na grontapu, dan wi de fu sari moro leki ala tra libisma.
20Ma a tru taki Kristus opo baka na dede. Na so A tron a fosiwan fu ala sma di dede kba. 21Bika fu di na wan libisma meki wi alamala abi fu dede, so a de now taki wan tra libisma e meki sma di dede o opo baka. 22Bika neleki fa Adam meki taki ala libisma e dede, na so a de tu dati Kristus e meki ala sma opo baka na dede. 23Ma ibri sma o opo te en yuru kisi. Kristus leki fosiwan, èn te A e drai kon baka, dan den sma fu En o opo baka. 24Dan a kba fu ala sani o doro te Kristus gi a tiri abra na ini anu fu Gado a P'pa, èn te A tyari wan kba kon na ala rigeri, nanga ala makti nanga krakti. 25Bika Kristus o de kownu te leki A poti ala En feyanti na ondro En futu. 26A laste feyanti san Kristus o poti na wan sei, na dede. 27Bika: “A poti ala sani na ondro En futu.” Ma te a skrifi taki A poti ala sani na ondro En futu, dan dati no e teri gi Gado. Bika na Gado poti ala sani na ondro Kristus. 28Te ala sani de na ondro a Manpikin kba, dan a Manpikin o saka Ensrefi tu ondro Gado, di ben poti ala sani na En ondro. Dan Gado o de ala sani gi ala libisma.
29Ma san den sma o du dan di teki dopu gi den wan di dede kba? Efu a tru taki dedesma no o opo baka, fu sanede den e teki dopu gi den? 30Fu sanede wi srefi e misi fu dede ala yuru? 31Brada nanga sisa, ala dei mi kan lasi mi libi. A sani disi tru, neleki fa mi e prodo nanga unu, fu di unu de wan nanga Kristus Yesus wi Masra. 32Libisma fasi mi kan taki tak' mi feti ini Efese nanga krasi meti. Ma sortu bun a tyari gi mi? Efu dedesma no o opo baka, dan meki un nyan èn dringi, bika tamara un o dede. 33Un no kori unsrefi! Bika takru mati e pori bun maniri. 34Un kisi unsrefi, dan un tapu nanga sondu. Na wan syen gi unu, ma mi mus taki en tak' sonwan fu unu no sabi Gado.
A skin fu sma di opo baka na dede
35Ma kande wan sma sa aksi: “Fa dedesma e kon na libi baka? Sortu skin den sa abi dan?” 36Yu don kaw! Te yu sai wan siri, a no man libi efu a no dede. 37Te yu e sai, yu no e sai a sani san mus gro kmopo fu a siri. Ma na a siri nomo fu a karu noso wan tra sani yu e sai. 38Ma Gado e gi en wan skin di En wani. A e gi ibri siri en eigi skin. 39Ala sani di e libi no abi a srefi skin. Di fu libisma de tra fasi leki di fu den meti. A skin fu den fowru di e frei, de tra fasi baka leki di fu den fisi. 40Yu abi sani na heimel nanga den eigi skin èn yu abi sani na grontapu nanga den eigi skin. Den di de na heimel moi na tapu den eigi fasi, èn den wan di de na grontapu moi na tapu wan tra fasi. 41A son e brenki wan tra fasi leki a mun nanga den stari. Srefi a wan stari e brenki wan tra fasi leki a trawan. 42Na so a o de tu nanga a opo baka fu den dedesma. A skin di den beri, na wan skin san e pori, ma te a opo baka, a o de wan skin san no man pori moro. 43A skin san beri no warti noti, ma a o opo baka nanga glori. A skin san beri ben swaki, ma te a opo baka, a o abi krakti. 44A skin san beri, na a grontapu skin, ma a o opo baka leki wan yeye skin. Bika efu wan grontapu skin de, dan wan yeye skin mus de tu. 45Na so a skrifi taki Adam, a fosi sma, ben tron wan libilibi sili. A laste Adam tron wan yeye di e gi libi. 46A yeyeskin a no a fosiwan di e kon. A grontapu skin e kon fosi, baka dati a yeyeskin e kon. 47A fosi sma na fu grontapu, a meki fu doti. A di fu tu Sma kmoto fu heimel. 48Ala libisma abi a srefi skin san a fosi libisma ben abi. Na so ala sma di de wan nanga a Wan di kmopo kon fu heimel, sa abi a srefi skin leki a di fu En tu. 49Leki fa un ben abi a fasi fu a sma di ben meki fu doti, na so un o abi a fasi tu fu a Man di kmoto fu heimel.
50Mi brada nanga sisa, disi na san mi wani taki: Wan libisma nanga en skin fu meti nanga brudu, no o man kon ondro a tiri fu Gado. Wan skin san e pori gwe no man abi prati ini sani san no e pori gwe noiti. 51Un arki! Mi o ferteri un wan kibritori. Wi alamala no o dede, ma wi alamala o kenki. 52A o psa ini wan momenti, ini a pingi fu wan ai, te a laste tutu bari. Bika a tutu o bari, èn den dedewan o opo baka nanga wan skin san no man pori moro, èn wi o kenki. 53A de fanowdu fu a skin disi di e pori, mus kenki kon tron wan skin san no man pori moro. A skin disi san o dede, mus kenki kon tron wan skin san no man dede noiti moro. 54Te a psa taki a skin disi di e pori, kenki kon tron wan skin san no man pori, èn a skin di o dede, kenki kon tron wan skin di no man dede moro, dan a sani di skrifi o kon tru taki: “Wini doro! Dede lasi! 55Dede, pe a wini fu yu de? Dede, pe a maka fu yu de?” 56A makti fu dede na a sondu, èn a sondu e feni en krakti na ini a wèt. 57Ma meki wi taki Gado tangi! Bika san wi Masra Yesus Kristus du, meki taki Gado meki wi tron winiman.
58Mi lobi brada nanga sisa, dat' meki un mus hori doro, sondro fu degedege! Ala ten un mus tan du a wroko fu Masra nanga un heri ati, fu di un sabi taki san un e du gi Masra, no de fu soso.
