1 Samuel 6

₁Di a santa kisi fu MASRA ben de seibi mun ini a kondre fu den Filistijnsma, ₂den Filistijnsma kari den priester nanga den lukuman fu den kon na wan. Dan den aksi den taki: “San wi mus du nanga a santa kisi fu MASRA? Un taigi wi san wi mus du fu kan seni en go baka na en tanpresi.” ₃Den priester nanga den lukuman piki den taki: “Te un o seni a santa kisi fu a Gado fu Israel gwe baka, un no mus seni en gwe sondro wan sani. Un mus seni en gwe nanga wan paiman gi a Gado fu Israel. Dan fosi un o kon betre, èn dan un o kon sabi fu sanede A e tan strafu unu.” ₄Dan den sma aksi den taki: “Ma sortu paiman un mus seni gi En?” Den priester nanga den lukuman piki den taki: “Feifi gowtu butsweri nanga feifi gowtu moismoisi. Bika Filistea abi feifi foto nanga feifi tiriman, èn ala den foto nanga den tiriman kisi a srefi strafu. ₅So un mus teki den butsweri di opo na un skin nanga den moismoisi di e pori a kondre leki eksempre, dan un e meki gowtu wan fu den. Dan un mus gi a Gado fu Israel grani nanga den sani dati. Kande A sa tapu a strafu di A e strafu unu, den gado fu unu nanga a kondre fu unu. ₆Un no mus tranga un yesi, leki fa Farao nanga den sma fu Egipte ben du. Bika den ben abi fu meki den Israelitisma gwe, baka di A meki den firi a krakti fu En. ₇We dan, un meki wan nyun wagi. Dan un sorgu gi tu kaw di abi pikin na bobi ete. Ma a mus de kaw di no wroko gron ete. Dan unu e span den kaw dati fesi a wagi. Den pikin fu den un mus go poti na kawpen. ₈Te un du dati un mus poti a santa kisi fu MASRA tapu a wagi. Den gowtu sani di un o gi leki paiman un mus poti ini wan pikin kisi. Dan un e poti a kisi dati sei a santa kisi tapu a wagi. Te un du dati, un mus meki den kaw tyari a wagi go pe den wani. ₉Ma un mus luku bun pe den e go. Efu den teki a pasi di e go na Bet-Semes, a tanpresi fu a santa kisi, dan na a Gado fu den Israelitisma ben meki a bigi ogri disi miti unu. Ma efu den teki wan tra pasi, a o de wan marki dati a no En e strafu unu, ma dati na wan ogri miti unu.” ₁₀Den Filistijnsma du san den priester nanga den lukuman taigi den. Den teki tu kaw di ben abi pikin na bobi ete, èn den span den fesi a wagi. Den pikin fu den den libi ini a kawpen. ₁₁Dan den poti a santa kisi fu MASRA tapu a wagi, nanga a pikin kisi ini san den gowtu moismoisi nanga den gowtu butsweri ben de di den ben meki. ₁₂Di den kaw e gwe, den waka langalanga go na a sei fu Bet-Semes. A heri pasi den ben e bari, ma den no beni srefsrefi go na let'sei noso na kruktusei. Den tiriman fu den Filistijnsma ben waka baka den kaw go te na a kontren fu Bet-Semes.

₁₃A pisten dati den sma fu Bet-Semes ben e koti tarwe ini den dal mindri den bergi. Di den opo den ede, den si a santa kisi èn den ben breiti fu si en. ₁₄Den kaw hari a wagi go na a gron fu Yosua, wan man fu Bet-Semes. Dan den tan tnapu drape sei wan bigi ston. Dan den sma naki a wagi broko èn den priti a udu meki udufaya. Dan den srakti den kaw èn bron den leki wan ofrandi gi MASRA. ₁₅Den Lefitiman ben puru a santa kisi fu MASRA nanga a pikin kisi nanga den gowtu sani tapu a wagi èn den ben poti den tapu a bigi ston. Tapu a dei dati den sma fu Bet-Semes bron meti èn den srakti meti leki ofrandi gi MASRA. ₁₆Di den feifi tiriman fu den Filistijnsma si san psa, den drai a srefi dei go baka na Ekron. ₁₇Den Filistijnsma ben poti feifi gowtu butsweri leki paiman gi MASRA: wan gi Asdod, wan gi Gaza, wan gi Askelon, wan gi Gat nanga wan gi Ekron. ₁₈Ma den gowtu moismoisi ben furu leki ala den foto fu den Filistijnsma, di den feifi tiriman ben e tiri. Dati ben de den bigi tranga foto te nanga den dorpu tu. A bigi ston tapu a dyari fu Yosua fu Bet-Semes, pe den Lefitiman ben poti a santa kisi fu MASRA, de drape te tide leki wan kotoigi fu den sani disi di psa drape.

₁₉Ma dan MASRA kiri furu fu den sma fu Bet-Semes, fu di den ben luku a santa kisi fu En. A kiri seibitenti sma. Èn a folku ben e sari fu di MASRA kiri someni fu den. ₂₀Dan den sma fu Bet-Semes aksi taki: “Suma kan tnapu fesi MASRA, a santa Gado disi? A santa kisi mus gwe fu dyaso, ma na suma wi o seni en go?” ₂₁Ne den seni boskopuman go na den sma fu Kiryat-Yearim, fu go taigi den taki: “Den Filistijnsma tyari a santa kisi fu MASRA kon baka. Un saka kon teki en, dan un tyari en gwe.”