1 Tesalonika 1

₁Gi a gemeente na Tesalonika, di de fu Gado a P'pa nanga fu Masra Yesus Kristus,

Disi na wan brifi fu Paulus, fu Silfanus nanga fu Timoteus. Wi e winsi taki Gado sa sori un bun-ati èn gi un freide.

₂Wi e taki Gado ala leisi tangi gi un alamala te wi e prakseri unu ini begi. ₃Wi e tan memre na fesi Gado wi P'pa den sani di un du fu di un e bribi, èn tak' un e tan wroko nanga lobi sondro fu weri. Wi e tan memre a howpu tu di un abi ini un Masra Yesus Kristus, di de fu si ini a fasi fa unu e hori doro. ₄Brada nanga sisa, wi sabi taki Gado lobi unu, èn A teki unu leki sma fu En. ₅Bika di wi tyari a bun nyunsu gi unu, a no ben de soso wortu. Ma a ben abi krakti, sobun a krakti fu a Santa Yeye, èn wi sabi krinkrin taki a bun nyunsu tru. Un srefi sabi fa wi ben tyari wisrefi di wi ben de na un mindri, èn fa wi ben e suku bun gi unu. ₆Un teki a eksempre fu wi nanga a di fu Masra. Aladi un ben nyan furu pina, un teki a boskopu nanga wan prisiri di a Santa Yeye srefi gi unu. ₇Na sowan fasi unu srefi tron wan eksempre gi ala den bribisma na Masedonia nanga Akaya. ₈Bika a wortu fu Masra kmoto na unu drape, panya go moro fara. A no na Masedonia nanga Akaya wawan, ma na ala sei den sma yere fu a bribi fu unu ini Gado. Dat' meki wi no abi fu taigi den sma noti moro fu a bribi fu unu. ₉Bika den srefi e ferteri fa unu ben teki wi na un mindri èn fa un libi den kruktu gado fu dini a trutru Gado di e libi. ₁₀Moro fara den e ferteri fa un e ferwakti taki En Manpikin di A meki kon baka na libi, sa drai kon baka fu heimel. Na En na Yesus di e puru unu ini a strafu di o kon.