1 Tesalonika 5

₁Brada nanga sisa, a no de fanowdu fu wi skrifi unu oten nanga sortu yuru a sani disi o psa. ₂Bika un srefi sabi heri bun taki a dei fu Masra o kon leki fa wan fufuruman e kon na neti. ₃A ten di den sma e taki: “Ala sani e go bun, ala sani e waka switi,” dan wantron so bigi ogri o miti den èn yepi no o de gi den. Den no o sabi na fesi, neleki fa wan bere-uma no sabi na fesi oten en bere o hati en fu meki a pikin. ₄Brada nanga sisa, un dati no de na dungru. Dat' meki a dei fu Masra no o kisi unu leki wan fufuruman. ₅Bika un alamala na sma fu a leti, sma fu deiten. Wi no de fu a dungru, wi no de fu neti. ₆Fu dat'ede wi no mus sribi leki den tra sma, ma wi mus de na ai, èn wi ai mus krin. ₇Bika te neti yu abi sma di e sribi èn tra sma di e dringi drungu. ₈Ma meki wi di de fu deiten, de nanga krin ai. Un mus weri a bribi nanga a lobi di wi abi leki wan isri bosroko fu kibri wi. Sosrefi un mus teki a howpu san wi abi tak' Gado o ferlusu wi, weri na wi ede leki wan fet'musu. ₉Bika Gado no meki wi fu strafu wi, ma fu wi kisi a libi fu têgo tangi fu wi Masra Yesus Kristus. ₁₀A dede fu wi ede fu wi sa libi fu têgo makandra nanga En, awinsi wi dede, noso efu wi de na libi ete te A e drai kon baka. ₁₁Dat'ede un mus tan gi makandra dek'ati, èn tan yepi makandra, soleki fa un e du kba.

₁₂Brada nanga sisa, wi e begi unu fu lespeki den sma na un mindri di e meki tranga muiti nanga unu, di e tiri unu na ini a nen fu Masra, èn di e taki nanga unu te un meki wan fowtu. ₁₃Un mus abi furu lobi gi den fu a wroko san den e du. Un mus libi ini freide nanga makandra tu. ₁₄Brada nanga sisa, wi e aksi unu tangitangi fu un taigi den sma di no wani wroko taki den mus fu wroko. Den sma di fredefrede, un mus gi dek'ati. Un mus yepi den sma di swaki, èn un mus abi pasensi nanga ala sma. ₁₅Un mus sorgu taki no wan sma no pai ogri nanga ogri. Ma ala ten un mus suku fu du bun gi makandra, nanga gi ala tra sma. ₁₆Ala ten un mus e prisiri. ₁₇Un mus tan begi sondro fu kon weri. ₁₈Awinsi san e psa, un mus gi Gado tangi. Bika na dati Gado wani fu unu di de wan nanga Kristus Yesus. ₁₉Un no mus tapu a Santa Yeye fu du En wroko. ₂₀Efu Gado gi wan sma wan wortu fu taki, un no mus poti a wortu na wan sei. ₂₁Ma un mus ondrosuku a sani san a sma taki, èn un mus teki san bun. ₂₂Un mus tan fara fu ala sortu ogri. ₂₃Wi e begi taki Gado di e gi freide, sa meki un kon santa ini ala fasi. Dan un heri yeye, sili nanga skin sa de sondro fowtu te wi Masra Yesus Kristus drai kon baka. ₂₄Un kan fertrow a Gado di kari unu. A e du san A pramisi.

₂₅Brada nanga sisa, un begi tu gi wi. ₂₆Gi ala den brada nanga sisa odi gi wi nanga wan santa bosi. ₂₇Mi e begi un tangitangi ini a nen fu Masra, fu un leisi a brifi disi gi ala den bribisma. ₂₈Meki a bun-ati fu wi Masra Yesus Kristus de nanga unu.