1Yosafat dede èn den beri en pe den bigisma fu en beri ini a foto fu David. En manpikin Yoram teki en presi leki kownu.
Kownu Yoram fu Yuda
2Den brada fu Yoram, den tra manpikin fu Yosafat, ben de: Asarya, Yekiyel, Sekarya, Asaryahu, Mikael nanga Sefatya. Den alamala ben de manpikin fu kownu Yosafat fu Israel. 3Den p'pa ben gi den furu gowtu, solfru nanga tra gudu. A ben gi den tranga foto ini Yuda tu. Ma a ben poti Yoram leki kownu, fu di na en ben de en fosi manpikin. 4Di Yoram ben tnapu tranga leki kownu, a kiri ala den brada fu en nanga wantu heihei man fu Israel. 5Yoram ben abi dritenti-na-tu yari di a tron kownu, èn a tan aiti yari na makti ini Yerusalem. 6A ben teki a eksempre fu den kownu fu Israel, leki fa den famiri fu Akab ben e du, bika a ben trow nanga wan fu den umapikin fu Akab èn a ben e du san no bun ini MASRA ai. 7Ma MASRA no ben wani puru a famiri fu David na pasi, fu a ferbontu di A ben meki nanga David èn fu di A ben taki tak' na soso bakapikin fu en ben o tan kownu ini Yuda.
8Di Yoram ben de na makti, den Edomitisma kmoto ondro a tiri fu Yuda èn poti den eigi kownu fu tiri den. 9Dan Yoram hari go nanga den ofisiri fu en èn nanga ala fetiwagi fu en. Drape den Edomitisma ben lontu en nanga den ofisiri fu den fetiwagi fu alasei. Ma di a ben kon dungru, Yoram broko psa na den mindri èn a wini a legre fu den Edomitisma. 10Ma Edom ben man kmoto ondro a tiri fu Yuda, te leki a dei fu tide. A srefi ten dati, den sma fu a foto Libna kmoto ondro a tiri fu Yoram tu, bika a ben drai en baka gi MASRA, a Gado fu den afo fu en. 11Yoram meki presi tu tapu den bergi fu Yuda pe den sma ben man tyari ofrandi. A ben meki den sma fu Yerusalem du afkodrei èn a kori den sma fu Yuda fu teki a kruktu pasi.
12Dan a kisi wan brifi fu a profeiti Elia. Ini a brifi ben skrifi taki: “Na disi MASRA, a Gado fu yu afo David, e taki: Yu no teki a eksempre fu yu p'pa Yosafat nanga fu kownu Asa fu Yuda, 13ma yu teki a eksempre fu den kownu fu Israel. Yu meki Yuda nanga den sma fu Yerusalem du afkodrei, leki fa a famiri fu Akab ben du. Boiti dati, yu kiri den brada fu yu di ben betre moro yu, manpikin fu yu eigi p'pa. 14Dat' meki MASRA o strafu a pipel fu yu, den pikin nanga den uma fu yu, bun hebi èn A o pori ala den sani di yu abi. 15Yusrefi o siki hebi. Yu o siki na yu bere, te leki yu heri inibere kon na dorosei.”
16Dan MASRA meki den Filistijnsma nanga den Arabiri, di e libi sei den sma fu Kus, 17hari go feti na Yuda. Den broko go ini a kondre èn den tyari ala sani gwe di ben de ini a oso fu kownu. Den tyari den manpikin nanga den uma fu en srefi gwe. Soso Yoakas, a moro yongu manpikin fu Yoram, den libi na baka. 18Baka dati, MASRA meki Yoram kisi wan siki na en bere, fu san a no ben o kon betre moro. 19Baka tu yari so, a siki meki taki en inibere kon na doro èn a dede na a takru siki dati. Ma den sma no meki wan bigi faya gi en fu gi en grani, leki fa den ben du gi den afo fu en.
20Yoram ben abi dritenti-na-tu yari di a tron kownu. A tan aiti yari na makti ini Yerusalem. Di a dede, no wan sma low gi en. Den beri en ini a foto fu David, ma no pe den tra kownu ben beri.
