2 Korinte 8

₁Brada nanga sisa, wi wani ferteri unu fa Gado sori den gemeente fu Masedonia En bun-ati. ₂Bigi nowtu ben miti den fu tesi den. Ma den ben breiti psa marki èn den ben gi ala san den ben man gi, aladi den na trutru pôtisma. ₃Mi kan taigi unu taki den gi san den ben man gi. Iya, srefi moro leki dati, sondro fu sma dwengi den. ₄Den ben tan begi wi tangitangi fu gi den a okasi tu fu seni moni gi den sma fu Gado. ₅San den du ben de moro leki san wi ben ferwakti. Den gi densrefi fosi na Masra, dan den gi densrefi fu yepi wi, fu di Gado ben wani dati. ₆Dat' meki wi aksi Titus fu go doro nanga a wroko disi di a ben bigin fu du drape na unu, èn fu tyari a lobi wroko disi kon na wan kba. ₇Un abi ala sani bogobogo. Un abi bribi, un sabi taki bun, un sabi furu, un abi a angri fu yepi trawan, èn un abi lobi san wi wiki na ini unu. Dat' meki now un mus gi bogobogo tu fu yepi trawan. ₈Mi no e komanderi unu fu du en, ma mi wani sori unu tapu a angri di trawan abi fu yepi sma, fu si efu un abi trutru lobi tu. ₉Bika un ondrofeni a bun-ati fu wi Masra Yesus Kristus. A ben gudu, ma fu un ede A tron wan pôtisma èn fu di A tron wan pôtisma, un kan kon gudu. ₁₀Mi o gi un wan rai san bun gi unu. A yari di psa un bigin fu du a wroko disi. Ma a no dati wawan, un ben de den fosiwan tu di ben wani fu du en. ₁₁Dan now un mus klari a wroko disi. Nanga a srefi angri di un ben abi di un bigin, un mus kba a wroko tu. Un mus gi someni leki un man gi. ₁₂Bika efu wan sma wani gi, dan wi e ferwakti taki a o gi san a abi. A no abi fu gi san a no abi. ₁₃A no mus de so taki fu di un wani yepi trawan unu srefi e kon ini problema. Na prati un mus prati sani nanga makandra. ₁₄Now di un abi moro leki san un abi fanowdu, un kan puru den na ini den nowtu. Dan bakaten, te den abi moro leki san den abi fanowdu, dan den kan puru unu na nowtu. Na so un e prati sani nanga makandra. ₁₅Soleki fa a skrifi taki: “A sma di ben piki furu no ben abi tumsi furu. Èn a sma di ben piki pikinso nomo, no ben mankeri noti tu.”

₁₆Mi e taki Gado tangi tak' A gi Titus a srefi angri tu san A ben gi mi fu yepi unu. ₁₇Bika di wi aksi en fu kon yepi unu, a ben wani. Ma ensrefi ben angri fu yepi un kba. Na so a teki pasi fu kon na unu, sondro fu wi seni en. ₁₈Wi seni wan brada kon nanga en di abi wan bun nen na ala den gemeente fu a fasi fa a e wroko fu panya a bun nyunsu. ₁₉Moro fara, den gemeente srefi ben poti en fu go makandra nanga wi te wi e du a lobi wroko disi. A wroko disi san wi e du, e gi Masra grani èn a e sori taki wi de klar'klari fu yepi trawan. ₂₀Tapu sowan fasi wi no e gi sma okasi fu no fertrow wi te a bigi moni disi de ini wi anu. ₂₁Bika wi wani du san bun, no ini Gado ai wawan, ma ini a ai fu libisma tu. ₂₂Wi seni wan tra brada kon nanga den tu. A ben sori wi furu tron ini furu sani dati a abi wan angri fu yepi. Ma now a e angri moro ete, fu di a e fertrow unu trutru. ₂₃Titus na mi mati èn a e wroko makandra nanga mi fu yepi unu. Den tu tra brada, na den gemeente seni den èn den e gi Kristus grani. ₂₄Dat' meki un mus sori den lobi, meki den gemeente si dati. Dan na so den o si taki a no fu soso wi ben meki bigi gi unu.