A wondru fu a oleif-oli
1Wan leisi wan uma fu wan fu den profeiti go krei en nowtu gi Elisa. A uma taigi en taki: “Yu knekti, mi masra, dede. Yu sabi tak' a ben de wan man di ben e lespeki MASRA. Now wan sma di wi mus pai, kon fu teki den tu pikin fu mi fu den go wroko gi en leki srafu.” 2Dan Elisa aksi en taki: “San mi kan du gi yu? Taigi mi san yu abi na oso.” A uma piki en taki: “Na soso wan pikin batra oleif-oli mi abi na oso.” 3Ne Elisa taigi en taki: “Gwe go leni leigi bari na den birtisma fu yu, leni omeni leki yu man. 4Dan yu nanga den boi fu yu mus go na inisei, un mus sroto a doro na un baka, dan un kanti a oleif-oli di yu abi na ini den bari. Den wan di furu, un mus poti na wan sei.” 5So a uma gwe. A go na inisei nanga den boi fu en, dan den sroto a doro na den baka. Den boi fu en ben e tyari den bari kon èn a uma ben e tan kanti nomo. 6Di den bari furu, a taigi wan fu den boi fu en taki: “Tyari ete wan tra bari kon.” Ma a boi piki en taki: “Bari no de moro.” A srefi momenti dati, a oleif-oli tapu fu lon. 7Di a uma go ferteri a man fu Gado fa sani waka, a piki en taki: “Go seri a oli, dan yu e pai yu paiman. A moni di o tan abra o sari fu yu nanga den boi fu yu libi.”
Elisa nanga a uma fu Sunem
8Wan dei Elisa go na a foto Sunem. Wan gudu uma di ben e libi drape aksi en tangitangi fu a tan nyan na en oso. Sensi a dei dati, ala leisi te Elisa ben e psa na a foto dati, a ben e go nyan na a uma. 9Wan leisi a uma taigi en masra taki: “A no abi misi tak' a man di e kon furufuru na wi, na wan santa man fu Gado. 10Meki wi meki wan pikin kamra gi en tapu a plata daki fu a oso, dan wi poti wan bedi, wan tafra, wan sturu nanga wan lampu na ini. Dan a man kan tan drape te a kon baka na wi.”
11Wan bun dei, Elisa doro drape baka. Dan a go ini a kamra tapu a daki go rostu. 12Baka dati a kari en knekti Gehazi, dan a taigi en taki: “Go kari a uma fu a oso gi mi.” Di Gehazi go kari en, a uma waka kon tnapu fesi Elisa. 13Dan Elisa taigi Gehazi taki: “Taigi en tak' wi e si ala a muiti di a e meki gi wi. Aksi en efu wan sani de di wi kan du gi en. Efu nanga kownu noso a edeman fu a legre wi mus tak' gi en, a no abi trobi.” Ma a uma piki den taki: “Den famiri fu mi e luku mi bun.” 14Ma Elisa taigi Gehazi baka taki: “Wan sani mus de di wi kan du gi a uma.” Gehazi piki taki: “We, a no abi manpikin èn a masra fu en grani kba.” 15Ne Elisa taki: “Go kari en.” Di Gehazi go kari a uma, a uma kon dan a tan tnapu na a doro. 16Dan Elisa taigi en taki: “Tra yari, a srefi ten disi, yu o hori wan manpikin ini yu anu.” Ma a uma taki: “Tye, mi masra, yu na wan man fu Gado, fu sanede meki yu e kori mi?” 17Ma a uma kon hori bere èn a kisi wan boi, a srefi ten fu a tra yari, leki fa Elisa ben taki.
18Di a boi kon moro bigi, a go wan dei na en p'pa, di ben de ini a wei e koti grasi nanga den wrokoman. 19Ma wantronso a boi bari gi en p'pa taki: “Mi ede, mi ede!” Dan a p'pa taigi wan fu den knekti taki: “Opo en tyari go na en m'ma.” 20So wan knekti opo a boi tyari go na en m'ma. A m'ma hori a boi tapu en bowtu te bakadina, dan a boi dede. 21Dan a m'ma go na tap'sei, a poti a boi tapu a bedi fu a man fu Gado dan a sroto a doro. 22Baka dati a go na dorosei, a kari en masra, dan a taigi en taki: “Seni wan fu den knekti fu yu kon nanga wan buriki. Mi wani go es'esi na a man fu Gado èn drai kon baka.” 23A man aksi en taki: “Fu sanede yu wani go na en tide? Tide a no nyunmunfesa noso sabatdei.” Ma a uma piki en taki: “No broko yu ede.” 24Di a meki a buriki klari fu tyari en, a taigi en knekti taki: “Yu mus wipi den buriki fu den tan lon. Soso te mi taigi yu, yu mus tan tnapu.”
25Dan a teki pasi go na a man fu Gado, di ben de tapu a Karmelbergi. Di a man fu Gado si en fu farawe e kon, a taigi en knekti Gehazi taki: “Luku, a uma fu Sunem e kon. 26Lon go miti en es'esi, dan yu aksi en taki: ‘Ala sani e go bun nanga yu, yu masra nanga yu boi?’ ” Di Gehazi aksi a uma, a piki: “Ala sani e go bun.” 27Ma di a doro na a man fu Gado tapu a bergi, a grabu den futu fu en hori. Gehazi waka go na en fu hari en puru, ma a man fu Gado taigi en taki: “Libi en. Yu no e si tak' na sari a e sari? Ma MASRA no taigi mi san e du en.” 28Ne a uma taigi Elisa taki: “Mi masra, a no mi ben aksi yu fu wan boi. Mi ben taigi yu tak' yu no mus kori mi?” 29Dan Elisa taigi Gehazi taki: “Seti yu krosi, teki a wakatiki fu mi dan yu e lon gwe es'esi. No tan tnapu fu taki sma odi, èn no piki te sma e tak' yu odi. Dan yu e poti a tiki fu mi tapu a fesi fu a boi.” 30Ma a m'ma fu a boi piki Elisa taki: “Mi e sweri na a libilibi MASRA, sosrefi na yu eigi libi tak' mi no e kmoto dyaso sondro yu.” Ne Elisa opo, dan a gwe nanga en.
31Gehazi di ben de na den fesi, poti a wakatiki tapu a fesi fu a boi, ma a boi no gi no wan marki tak' a kon na libi. Ne Gehazi drai gwe go miti Elisa, dan a taigi en taki: “A boi no kon na libi.” 32Di Elisa doro, a si taki a boi ben didon dede tapu a bedi fu en. 33Ne a sroto a doro, fu en wawan ben kan de nanga a boi, dan a begi MASRA. 34Di a kba, a go didon tapu a boi. A poti en mofo tapu a mofo fu a boi, a poti en ai tapu den ai fu boi, èn a poti den anu fu en tapu den anu fu a boi. A tan didon so tapu a boi te leki a skin fu a boi ben kon waran. 35Dan Elisa opo, a waka go waka kon ini a kamra, dan a go didon baka tapu a boi. Ne a boi koso seibi leisi, dan a opo en ai. 36Elisa kari Gehazi dan a taigi en taki: “Kari a uma.” Di Gehazi kari en, a go na Elisa. Dan Elisa taigi en taki: “Yu kan opo a boi fu yu.” 37A uma go ini a kamra, a trowe ensrefi na den futu fu Elisa èn a boigi dipi fu gi Elisa grani. Baka dati, a opo a boi fu en dan a gwe.
A wondru nanga a nyanyan
38Di Elisa drai go baka na Gilgal, wan angriten ben de ini a kondre. Wan leisi di ala den profeiti ben sidon na en fesi, a taigi en knekti taki: “Poti a moro bigi patu na faya, dan yu e bori nyanyan gi den profeiti.” 39Dan wan fu den profeiti go ini a wei go suku gruntu. Ma a feni soso wan busifroktu di ben gersi pikin panpun èn di ben e gro leki panpun. Ne a piki so furu fu den froktu leki san a ben man tyari ini en dyakti. Di a drai go baka, a koti den pis'pisi poti na ini a patu, sondro fu sabi efu den bun fu nyan. 40Baka dati den man puru den nyanyan fu nyan. Ma fa den poti en na den mofo na so den bari taki: “Man fu Gado, a nyanyan disi o kiri wi!” Den no ben man nyan en srefsrefi. 41Ne Elisa taki: “Un tyari pikinso blon kon.” A poti a blon ini a patu, dan a taigi den taki: “Un puru gi den sma meki den nyan.” Èn noti no ben de fu du nanga a nyanyan ini a patu moro.
A wondru nanga den brede
42Wan leisi wan man fu Baal-Salisa tyari tutenti brede gi a man fu Gado. Den brede disi ben meki fu groto, a fosi groto di ben koti di a ten fu koti nyanyan ini den gron ben doro. A ben tyari pikinso graan kon tu. Dan Elisa taigi en knekti taki: “Gi den profeiti fu den nyan.” 43Ma a knekti taigi en taki: “A nyanyan no sari fu gi wan hondro sma.” Ma Elisa taigi en baka taki: “Gi den profeiti fu den nyan. Bika na disi MASRA e taki: ‘Den o nyan èn a o tan abra.’ ” 44Ne a knekti poti a nyanyan gi den profeiti, den nyan èn a ben tan abra srefi leki fa MASRA ben taki.
