2 Samuel 11

₁Na a bigin fu a yari, ini a ten pe den kownu gwenti fu go na feti, David seni a heri legre fu Israel, ondro a tiri fu Yoab nanga den ofisiri fu en, go na feti. Den gi den Amonitisma wan bigi lasi èn den lontu Raba fu alasei. Ma David srefi ben tan na Yerusalem. ₂Wan mofoneti, David opo fu a bedi pe a ben e rostu, dan a bigin koiri tapu a daki fu a kownu-oso fu en. Fu drape a si fa wan uma e wasi. A uma dati ben moi srefsrefi. ₃Dan David seni aksi suma na a uma èn a kisi fu yere tak' a uma ben de Batseba, a umapikin fu Eliam. A ben de a wefi fu a Hetitiman Uria. ₄Ne David seni wantu knekti fu en fu go teki Batseba. Di a kon na David, David sribi nanga en. Batseba ben krin ensrefi soleki fa a wèt ben e taki tak' wan uma mus du baka en munsiki. ₅Baka wan pisten a uma kon si tak' a hori bere. Dan a seni taigi David dati. ₆Dan David seni wan boskopu gi Yoab fu a seni Uria, a Hetitiman, kon gi en. Yoab du san David seni komanderi en. ₇Di Uria doro na David, David aksi en fa Yoab nanga den srudati ben e meki en, èn fa a feti ben e waka. ₈Baka dati David taigi Uria taki: “Go na yu oso go didon pikinso.” Di Uria e gwe fu a kownu-oso, David seni wan kado go na en baka. ₉Ma Uria no go na oso. A go sribi ini a oso fu den knekti fu kownu na a bigin fu a kownu-oso. ₁₀Di David kisi fu yere tak' Uria no go na en oso, a aksi en a tra mamanten taki: “Wan heri pisten yu no ben de. Fu sanede yu no go na yu oso?” ₁₁Ma Uria piki David taki: “A santa kisi nanga den legre fu Israel nanga Yuda de na ini tenti. Yoab, a edeman nanga den ofisiri fu yu de ini a legrekampu ini a opo wei. Dan fa mi o man go na mi oso fu nyan èn dringi èn sribi nanga mi uma? Mi e sweri na a libi fu yu tak' mi no o du en!” ₁₂Dan David piki Uria taki: “Tan tide dyaso tu, dan tamara mi o seni yu gwe baka.” So Uria kon tan a dei dati na ini Yerusalem. ₁₃A tra dei David seni kari en fu kon nyan nanga en, èn David sorgu taki Uria ben kon drungu. Ma toku Uria no go na en oso a neti dati, ma a go sribi baka ini a oso fu den waktiman fu kownu.

₁₄A tra mamanten David skrifi wan brifi gi Yoab, dan a seni en gi en nanga Uria. ₁₅David ben skrifi na ini a brifi taki: “Poti Uria na a moro hebi pisi fu a feti dan un e hari gwe libi en fu den feyanti kan feni en kiri.” ₁₆Fu di Yoab ben lontu a foto Raba wan pisten kba, a ben kon sabi pe den tranga fetiman fu den Amonitisma ben de. Dan a poti Uria drape. ₁₇Di den srudati fu a foto broko kon na doro fu feti nanga Yoab nanga den srudati fu en, wantu fu den ofisiri fu David kon lasi libi. A Hetitiman Uria srefi kon dede tu. ₁₈Baka a feti Yoab seni piki David fa a feti waka. ₁₉A ben komanderi a boskopuman taki: “Yu mus ferteri kownu fa a heri feti waka, fu a bigin te kon na a kba. ₂₀Efu te yu kba ferteri en a aksi yu nanga atibron taki: ‘Fu sanede un go so krosbei fu a foto? Un sabi tak' den o sutu fu a skotu kon na un tapu. ₂₁Na fergiti un fergiti fa Abimelek, a manpikin fu Yerubeset, lasi en libi? Na wan uma ben fringi wan bigi ston fu wan miri, fu a skotu fu a foto Tebes na en tapu meki a dede. Dan fa un kan go so krosbei fu wan skotu baka?’ Efu a taki so yu mus piki en tak' a ofisiri fu en, a Hetitiman Uria, kon lasi libi tu.” ₂₂A boskopuman gwe, èn di a doro David a taigi en ala san Yoab ben komanderi en. ₂₃A taigi David taki: “A feyanti ben tranga moro wi èn den broko kon na wi tapu ini a opo wei. Ma wi feti nanga den èn den ben musu fu hari gwe baka go te na a bigi doro fu a foto. ₂₄Ne den srudati fu den di e sutu nanga bo, sutu fu a skotu kon na wi tapu. Wantu fu den ofisiri fu yu kon lasi libi, sosrefi yu knekti Uria, a Hetitiman.” ₂₅Dan David komanderi a boskopuman fu taigi Yoab taki: “No broko yu ede nanga a fasi fa sani waka. A de so kba taki dede e fadon na ini feti. No lasi ati! Go feti baka nanga a foto dan un broko en kon na gron.”

₂₆Di a uma fu Uria kisi a boskopu tak' en masra lasi libi, a low gi en. ₂₇Di a ten fu low ben kba, David meki a kon libi nanga en. David teki en leki en uma èn di a ten ben doro a uma kisi wan manpikin.

Ma MASRA ben si a sani di David du leki wan takru sani.